LESEN 05
Baebol i Mesej Blong God We i Kam Long Yumi
Jehova i givim wan naesfala presen—66 buk we i kam wan volium, hemia Baebol. Be maet yu stap askem se: ‘?Baebol i kam olsem wanem? ?Hu i raetem?’ Blong ansa long ol kwestin ya, i gud yumi tokbaot olsem wanem mesej blong God i kam long yumi.
1. ?Sipos ol man oli raetem Baebol, from wanem yumi talem se i kam long God?
I gat samwe 40 man oli raetem Baebol mo i tekem bitim 1,600 yia blong raetem, stat long 1513 B.K.T. go kasem 98 K.T. Ol man ya oli blong defdefren bakgraon. Nating se i olsem, evri buk blong Baebol oli joen gud. ?Olsem wanem i posibol? From we i kamaot long God. (Ridim 1 Tesalonaeka 2:13.) Ol man ya oli no raetem tingting blong olgeta. Be “tabu spirit i putum tok ya long tingting blong olgeta, nao oli talemaot tok we i kamaot long God.”a (2 Pita 1:21) God i yusum tabu spirit blong givim tingting o pulum olgeta blong oli raetem ol tingting blong hem.—2 Timoti 3:16.
2. ?Hu i save gat Baebol?
“Olgeta man we oli stap long wol, long olgeta kantri, long olgeta traeb, long olgeta lanwis, mo long olgeta grup blong man” oli save ridim gud nius long Baebol. (Ridim Revelesen 14:6.) God i wantem se Baebol i stap long plante moa lanwis i bitim eni narafala buk. Klosap evri man oli gat Baebol. Hemia i tru, nomata wanem ples mo lanwis blong man.
3. ?Olsem wanem Jehova i protektem Baebol?
Oli raetem Baebol long skin blong animol mo papiras we oli save roten kwiktaem. Mo ol man we oli laekem Baebol, oli raetemdaon ol kopi blong Baebol bakegen mo bakegen. Nating se ol haeman oli traem blong distroem Baebol, be sam man oli rere blong lusum laef blong olgeta blong protektem. Jehova i no letem wan man o eni samting i stopem hem blong toktok wetem yumi. Baebol i se: “Tok blong God blong yumi i stap olwe.”—Aesea 40:8.
DIGIM MOA
Faenemaot olsem wanem Baebol i kamaot long God, olsem wanem hem i protektem, mo i mekem se ol man oli save gat.
4. Ridim Baebol blong faenemaot se i kamaot long hu
Plei VIDEO. Mo ridim 2 Timoti 3:16, mo tokbaot ol kwestin ya.
Sipos ol man oli raetem Baebol, ?from wanem yumi talem se hem i Tok blong God?
?Yu yu bilif se God i givim tingting blong hem long ol man blong oli raetemdaon?
Maet wan sekretari i raetem leta, be mesej i kam long bos we i talem. Sem mak, ol man oli raetem Baebol be mesej blong hem i kam long God
5. Oli no save distroem Baebol
Sipos Baebol i kamaot long God, yumi ekspektem se hem i mas protektem. Long histri, ol haeman oli traem blong distroem Baebol. Ol lida blong jos oli traem blong haedem. Nating se ol man oli agensem mo oli kilim man i ded from, be plante man oli rere blong ded blong protektem Baebol. Blong save wan man we i mekem olsem, plei VIDEO, mo askem ol kwestin ya.
Naoia yu save bigfala wok we ol man oli mekem blong protektem Baebol. ?Hemia i pulum yu moa blong ridim? ?From wanem yu ansa olsem?
Ridim Ol Sam 119:97, mo tokbaot kwestin ya:
?Wanem i pulum plante man blong oli transletem mo givimaot Baebol, nating se laef blong olgeta i stap long denja?
6. Wan buk blong evri man
Baebol i wan buk we oli transletem mo givimaot moa i bitim ol narafala buk. Ridim Ol Wok 10:34, 35, mo tokbaot ol kwestin ya:
?From wanem God i wantem se oli transletem mo givimaot Tok blong hem long plante man?
?Wanem sam samting long Baebol we yu laekem?
Klosap
100%
blong populesen blong wol
oli gat Baebol long wan lanwis we oli kasemsave
I stap long bitim
3,000
lanwis
fulwan o sam haf blong hem
5,000,000,000
Hemia namba blong Baebol we maet oli wokem
i bitim eni nara buk
SAM MAN OLI SE: “Baebol i wan olfala buk we ol man nomo oli raetem.”
?Wanem tingting blong yu?
?Wanem pruf i soem se Baebol i Tok blong God?
SAMARI
Baebol i Tok blong God, mo hem i meksua se olgeta man oli save gat.
Tingtingbak
?I minim wanem taem yumi talem se God i pulum man blong i raetem Baebol?
?Wanem tingting blong yu long bigfala wok ya blong transletem mo givimaot Baebol, mo we i stap kasem tede?
?Wanem tingting blong yu taem yu save bigfala samting we God i mekem blong toktok wetem yu?
FAENEMAOT
Ridim histri blong Baebol—stat long ol olfala hanraet go kasem ol translesen blong tede.
“?Olsem Wanem Baebol i Stapgud Kam Kasem Taem Blong Yumi?” (Wekap!, Jenuware 2008)
Faenemaot olsem wanem Baebol i stapgud, nating se tri samting i traem blong spolem.
Faenemaot ol denja we ol man oli fesem blong transletem Baebol.
Oli raetemdaon ol kopi blong Baebol mo oli transletem plante taem. ?Olsem wanem yumi save sua se mesej blong hem i no jenis?