LESEN 04
?God Hem i Hu?
Bifo we bifo finis, ol man oli stap wosipim plante god mo woman god. Be Baebol i tokbaot wan God we hem “i hae moa long ol narafala god.” (2 Kronikel 2:5) ?Hu ya? ?Mo wanem i mekem se hem i hae moa long ol narafala god? Long lesen ya, traem luk olsem wanem God ya i introdiusum hem wan long yu.
1. ?Wanem nem blong God, mo olsem wanem yumi sua se hem i wantem yumi save nem ya?
Long Baebol, God i introdiusum hem wan long yumi. Hem i talem se: “Mi mi Jehova. Hemia nem blong mi.” (Ridim Aesea 42:5, 8.) “Jehova” i wan translesen blong wan Hibru nem we i min se “Hem i Mekem i Kam.” Jehova i wantem se yumi save nem blong hem. (Eksodas 3:15) ?Olsem wanem yumi sua long samting ya? !Long Baebol, nem blong hem i stap bitim 7,000 taem!a Nem ya Jehova i nem blong “trufala God blong heven mo wol.”—Dutronome 4:39.
2. ?Baebol i talem wanem long saed blong Jehova?
Baebol i talem se long olgeta god we ol man oli stap wosipim, Jehova nomo i trufala God. ?From wanem? I gat plante risen. Jehova i gat olgeta paoa, mo hem nomo i “Hae God long fulwol.” (Ridim Ol Sam 83:18.) Hem i “God We i Gat Olgeta Paoa,” hemia i min se hem i gat paoa blong mekem eni samting we hem i jusum blong mekem. Hem i “mekem olgeta samting,” olsem yunives mo olgeta laef long wol. (Revelesen 4:8, 11) Hem i no olsem ol narafala, Jehova i stap oltaem mo bambae hem i stap foreva.—Ol Sam 90:2.
DIGIM MOA
Jekem from wanem ol taetel blong God oli defren long nem blong hem. Biaen lanem olsem wanem mo from wanem hem i talemaot nem blong hem long yu.
3. God i gat plante taetel, be wan nem nomo
Blong faenemaot olsem wanem taetel blong wan man i defren long nem blong hem, plei VIDEO ya, mo tokbaot kwestin ya.
?Olsem wanem wan taetel olsem “Masta” i defren long wan nem?
Baebol i talem se ol man oli wosipim plante god mo masta. Ridim Ol Sam 136:1-3, mo tokbaot kwestin ya:
?Hu i “God blong ol god” mo “Masta blong ol masta”?
4. Jehova i wantem se yu save nem blong hem mo yu yusum
?Wanem i soem se Jehova i wantem we yu save nem blong hem? Plei VIDEO, mo tokbaot kwestin ya.
?Yu ting se from wanem Jehova i wantem se ol man oli save nem blong hem?
Jehova i wantem se ol man oli yusum nem blong hem. Ridim Rom 10:13, mo tokbaot ol kwestin ya:
?From wanem i impoten blong yusum nem blong God, Jehova?
?Yu yu harem olsem wanem taem wan man i tingbaot nem blong yu mo i yusum?
?Yu ting se Jehova i harem olsem wanem taem yu yusum nem blong hem?
5. Jehova i wantem se yu kam fren blong hem
Woman ya Soten blong Kambodia, i talem se taem hem i save nem blong God, samting ya i halpem hem blong “harem gud bitim eni narafala samting.” Plei VIDEO, mo tokbaot kwestin ya.
Long video ya, ?Soten i mekem wanem taem hem i save nem blong Jehova?
Bifo we yu kam fren blong wan man, plante taem yu save nem blong hem. Ridim Jemes 4:8a, mo tokbaot ol kwestin ya:
?Jehova i invaetem yu blong mekem wanem?
?Olsem wanem yu kam klosap moa long God taem yu save nem blong hem mo yu yusum?
SAM MAN OLI SE: “I gat wan tru God nomo taswe i no nid blong talem nem blong hem.”
?Yu yu bilif se Jehova i nem blong God?
?Olsem wanem yu save eksplenem se God i wantem we yu yusum nem blong hem?
SAMARI
Jehova i nem blong trufala God nomo. Hem i wantem se yumi yusum nem ya blong kam klosap long hem.
Tingtingbak
?Wanem i mekem se Jehova i defren long ol narafala god?
?From wanem yumi mas yusum nem blong God?
?Wanem i soem se Jehova i wantem yu kam klosap long hem?
FAENEMAOT
Jekem faef gudfala risen we i pruvum se God i stap.
?From wanem i stret nomo blong bilif se God i stap?
Faenemaot from wanem yumi mas yusum nem blong God, nating se yumi no save stret wei blong talem olsem bifo.
?I impoten blong talem nem blong God? Traem luk from wanem yumi save se hem i gat wan nem nomo.
a Blong gat moa infomesen long mining blong nem blong God, mo from wanem sam Baebol oli tekemaot, yu luk Apendiks A4 long Baebol Long Niu Wol Translesen.