LESEN 36
Tok Tru Long Evri Samting
Evriwan i wantem gat ol fren we oli tok tru. Jehova i ekspektem se ol fren blong hem tu oli tok tru. Be i no isi from we wol ya i fulap long ol man we oli stap giaman. ?Wanem ol gudfala samting we i save kamaot taem yumi tok tru oltaem?
1. ?From wanem i rili impoten blong yumi tok tru oltaem?
Taem yumi tok tru long ol narafala, yumi soemaot long Jehova se yumi lavem hem mo respektem hem. Tingbaot, Jehova i save evri samting we i stap long tingting blong yumi mo ol samting we yumi stap mekem. (Hibru 4:13) Hem i save taem yumi jus blong tok tru, mo samting ya i mekem hem i glad. Tok blong hem i talem se: “Jehova i no laekem nating ol man blong trik, be Hem i fren gud wetem ol man we oli gat stret fasin.”—Ol Proveb 3:32.
2. ?Evri dei yumi mas tok tru long hu?
Jehova i wantem se yumi evriwan i “mas tok tru long” yumi. (Sekaraea 8:16, 17) ?Hemia i minim wanem? Sipos yumi stap toktok wetem ol famle, olgeta long wok, ol Kristin brata sista, mo ol haeman blong gavman, yumi no mas giaman o givim rong infomesen. Ol man we oli tok tru oli no stil o ravem narafala. (Ridim Ol Proveb 24:28 mo Efesas 4:28.) Mo oli pem evri takis blong olgeta. (Rom 13:5-7) Yes, oli “mekem i stret nomo long olgeta samting.”—Hibru 13:18.
3. ?Yumi kasem wanem blesing taem yumi tok tru oltaem?
Taem yumi gat fasin ya blong tok tru oltaem, ol narafala bambae oli trastem yumi. Mo olgeta long kongregesen bambae oli stapgud olsem wan famle. Mo tingting blong yumi i no jajem yumi. Fasin blong yumi blong tok tru, i “save flasem tijing blong God ya we i Sevia blong yumi,” mo pulum olgeta aotsaed long kongregesen blong kam long tru wosip.—Taetas 2:10.
DIGIM MOA
Luk olsem wanem fasin blong tok tru i save afektem yu mo Jehova, mo lanem olsem wanem blong tok tru long ol defdefren situesen.
4. Fasin blong tok tru i mekem Jehova i glad
Ridim Ol Sam 44:21 mo Malakae 3:16, mo tokbaot ol kwestin ya:
Long tingting blong yu, ?from wanem i no waes blong haedem wan samting long Jehova?
Taem yu jus blong tok tru nating se i had, ?Jehova i harem olsem wanem?
Taem pikinini i tok tru, hem i mekem perens blong hem i glad. Taem yumi tok tru, yumi mekem Jehova i glad
5. Tok tru oltaem
Plante man oli ting se i no posibol blong tok tru oltaem. Be makem from wanem yumi mas tok tru oltaem. Plei VIDEO.
Ridim Hibru 13:18. Folem vas ya, oltaem yumi mas mekem wanem long . . .
ol famle blong yumi.
wok o long skul.
wan defren situesen.
6. Fasin blong tok tru i givhan long yumi
I tru maet yumi kasem problem taem yumi tok tru. Be hemia stret samting blong mekem. Ridim Ol Sam 34:12-16, mo tokbaot kwestin ya:
?Olsem wanem laef blong yu bambae i gud moa taem yu tok tru?
Ol hasban mo ol waef we oli tok tru, oli mekem mared blong olgeta i strong
Ol wokman we oli tok tru, bos blong olgeta i trastem olgeta
Ol man we oli tok tru, ol haeman blong gavman oli glad long olgeta
SAM MAN OLI SE: “Sipos yu giaman smol hemia i oraet nomo.”
?Olsem wanem yumi save se Jehova i no laekem nating fasin blong giaman?
SAMARI
Jehova i wantem se olgeta fren blong hem oli tok tru long evri samting we oli talem mo mekem.
Tingtingbak
?Oltaem yumi mas tok tru long hu?
?From wanem i no waes blong ting se yu save haedem samting long Jehova?
?From wanem yu wantem tok tru oltaem?
FAENEMAOT
?Olsem wanem ol perens oli save tijim ol pikinini blong olgeta blong oli tok tru?
?From wanem i gud blong kipim promes we yu mekem?
From wanem i gud blong pem takis nating se oli no yusumgud mane ya.
?Wanem i givhan long wan man blong giaman blong i kam wan man blong tok tru oltaem?
“I Learned That Jehovah Is Merciful and Forgiving” (Wajtaoa, 1 Mei 2015)