LESEN 56
Givhan Blong Mekem Kongregesen i Joengud
Taem yumi stap wetem ol narafala brata sista, yumi haremgud olsem King Deved i talem, i se: “!I gud tumas mo i naes tumas, taem ol brata oli stap wanples we oli joen gud!” (Ol Sam 133:1) Fasin blong yumi blong joengud i no kamaot olsem nomo. Yumi evriwan i givhan blong mekem se yumi joengud.
1. ?Wanem i spesel long saed blong ol man blong God?
Sipos yu go long wan miting long narafala ples, maet yu no kasemsave long lanwis blong ples ya, be i gat plante samting we i mekem yu harem se yu no wan strenja. ?From wanem i olsem? From we long evri ples, oli yusum sem buk nomo blong stadi Baebol. Mo yumi evriwan i traehad blong soem lav long ol narafala. Nomata yumi stap long weples, yumi evri wan i “singaot long nem blong Jehova, blong [yumi] joen gud blong wosipim hem.”—Sefanaea 3:9, futnot.
2. ?Yumi save mekem wanem blong promotem fasin joengud?
“Yufala i mas strong blong lavlavem yufala long fulhat blong yufala.” (1 Pita 1:22) ?Olsem wanem yu save folem advaes ya? Hemia taem yu no fokas long slak fasin blong ol narafala, be long ol gudfala fasin blong olgeta. I gud blong save ol brata sista we oli kamaot long ol defdefren bakgraon, bitim we yu stap joen wetem olgeta ya nomo we oli laekem ol sem samting olsem yu. Mo tu, sakemaot ol nogud filing we maet yumi gat long olgeta we oli defren long yumi.—Ridim 1 Pita 2:17.a
3. ?Bambae yu mekem wanem taem yu gat problem wetem wan Kristin?
Yumi stap joengud, be yumi ol sinman tu. Samtaem maet yumi mekem ol narafala oli kros o harem nogud. Taswe Baebol i talem long yumi se: “Yufala i mas glad blong fofogivim yufala,” mo i talem tu se: “Jehova i glad oltaem blong fogivim yufala, ale yufala tu i mas mekem sem mak.” (Ridim Kolosi 3:13.) Yumi mekem Jehova i harem nogud plante taem, be hem i gohed blong fogivim yumi. Taswe hem i wantem se yumi mas fogivim ol brata sista blong yumi. Sipos yu luksave se yu yu mekem narafala i harem nogud, i gud yu tekem faswan step blong stretem bisnes ya.—Ridim Matiu 5:23, 24.b
DIGIM MOA
Faenemaot ol samting we yu save mekem blong kongregesen i joengud mo i gat pis.
?Bambae yu mekem wanem blong gat pis?
4. Winim fasin blong no laekem man we i defren
Yumi wantem lavem olgeta brata mo sista. Be maet yumi faenem i had blong akseptem narafala from we hem i defren. ?Wanem i save halpem yumi? Ridim Ol Wok 10:34, 35, mo tokbaot ol kwestin ya:
Jehova i akseptem ol defdefren kaen man blong oli kam ol Witnes blong hem. ?Eksampol ya i sud pulum yumi blong gat wanem filing long olgeta we oli defren?
?Wanem nogud tingting we plante manples oli gat long ol man we oli defren mo we yu no wantem gat?
Ridim 2 Korin 6:11-13, mo tokbaot kwestin ya:
?Yu ting se yu save mekem wanem blong frengud moa wetem ol brata mo sista we oli gat defren bakgraon?
5. Rere blong fogif mo mekem pis
Jehova i neva mekem i rong blong yumi fogivim hem, nating se i olsem hem i rere oltaem blong fogivim yumi. Ridim Ol Sam 86:5, mo tokbaot ol kwestin ya:
?Fasin blong Jehova blong fogif i bigwan olsem wanem?
?Yu yu glad se Jehova i fogivim yu? ?From wanem?
?Wanem sam samting we i save mekem se i had blong joen wetem ol narafala?
?Olsem wanem yumi save folem fasin blong Jehova mo gohed blong joengud wetem ol brata mo sista blong yumi? Ridim Ol Proveb 19:11, mo tokbaot kwestin ya:
?Sipos wan man i mekem yu yu kros, bambae yu mekem wanem blong problem ya i no kam mowas?
Samtaem yumi mekem ol narafala oli kros. ?Yumi mas mekem wanem taem samting olsem i hapen? Plei VIDEO, mo tokbaot kwestin ya.
Long video ya, ?sista i mekem wanem blong i gat pis?
6. Tingbaot ol gudfala fasin blong ol brata mo sista
Taem yumi fren moa wetem ol brata mo sista, yumi kasemsave long ol gudfala fasin mo ol slak fasin blong olgeta. ?Olsem wanem yumi save fokas long ol gudfala fasin blong olgeta? Plei VIDEO, mo tokbaot kwestin we i stap.
?Wanem i save halpem yu blong luk ol gudfala fasin blong ol brata mo sista blong yu?
Jehova i fokas long ol gudfala fasin blong yumi. Ridim 2 Kronikel 16:9a, mo tokbaot kwestin ya:
Taem yu save se Jehova i stap fokas long ol gudfala fasin blong yu, ?yu yu harem olsem wanem?
Nating se wan naesfala daemon i krak, be hem i stil sas. Long sem fasin, ol brata sista blong yumi oli no stretgud olgeta, be oli sas long ae blong Jehova
SAM MAN OLI SE: “Man ya i mas kam talem sori fastaem bifo we mi fogivim hem.”
?From wanem yumi mas rere mo wantem fogivim narafala?
SAMARI
Yu save givhan blong mekem kongregesen i joengud, taem yu rere blong fogif mo yu soem lav long ol brata sista.
Tingtingbak
?Olsem wanem yu save sakemaot nogud tingting we yu gat long olgeta we oli defren?
?Bambae yu mekem wanem sipos yu gat wan problem wetem wan narafala Kristin?
?From wanem i gud blong folem eksampol blong Jehova blong fogivim ol narafala?
FAENEMAOT
Lanem olsem wanem pijatok blong Jisas i save givhan long yumi blong no jajem narafala
?From wanem yumi mas talem sore nating se yumi no mekem i rong?
“Talem Sore Gudfala Rod Blong Mekem Pis” (Wajtaoa, 1 Novemba 2002)
Luk olsem wanem samfala oli lanem blong no jajem ol narafala.
Faenemaot olsem wanem yu save winim problem we yu gat wetem narafala, bifo we i spolem kongregesen.
“Lav i Givhan Long Yumi Blong Stretem Problem” (Wajtaoa, Mei 2016)