Kwestin Blong Olgeta We Oli Ridim Magasin Ya

?Faet Ya Blong Amagedon Bambae i Hapen Long Weples?

Faet ya blong Amagedon bambae i no hapen long wan prapa ples blong faet long wol ya. Faet blong Amagedon bambae i kasem fulwol. ?From wanem? From we tufala ami we bambae tufala i faet, ol man blong tufala oli plante tumas, mekem se i no gat wan prapa ples we i naf blong ol ami ya oli save stap long hem.

Narafala tok blong talem Amagedon no Har-Magedon hemia se “bigfala Dei blong God ya we i gat olgeta paoa.” Jeova God bambae i yusum Pikinini blong hem, Jisas Kraes, blong hivimap wan ami blong ol enjel oli kam wanples blong mekem faet agensem olgeta rabis rula blong wol ya.—Revelesen 16:14; 19:11-16.

Setan bambae i pulum ol neson blong wol ya blong joen long faet ya. Baebol i eksplenem se “[“ol tok we ol devel i stamba blong olgeta,” NW]” bambae oli pulum “ol king blong evri ples long wol, blong tekem olgeta oli kam wanples, . . . long ples ya we long lanwis blong ol laen blong Isrel nem blong hem ‘Amagedon.’”—Revelesen 16:14-16.

Buk blong Revelesen i defren long ol narafala buk blong Baebol. Hem i pulum tingting blong plante man we oli ridim Baebol, blong wantem save moa mining blong ol tok we oli stap ridim. Plante man we oli ridim buk blong Revelesen, oli bilif se buk ya i tokbaot wan stret ples we faet ya bambae i stap long hem. From samting ya, oli wajem gud ol samting we oli stap hapen raonabaot long ples ya we oli tingbaot. Long olfala Grik hanraet we Oecumenius i raetem long ol yia 500 K.T.,a we i tokbaot buk blong Revelesen, i gat tingting ya se Amagedon i minim wan prapa ples. Yumi save faenem hanraet ya yet tede.

John F. Walvoord, wan Profesa blong Teoloji we bifo hem i presiden blong Dallas Thelogical Seminary, i talem bakegen tingting we plante man oli gat hemia se, Amagedon i “laswan nogud faet we bambae i stap long Medel Is.” Walvoord i tokbaot olfala taon blong Megido olsem stamba ples we bigfala faet ya bambae i stap long hem long fiuja. Megido i wan smol hil we i stap long Not blong Palestaen, long saed blong wan bigfala flat ples.

Be buk blong Revelesen i no wan map we i soem rod blong go kasem wan prapa ples we nem blong hem Amagedon. Fastok blong buk blong Revelesen i talem se ol tok long buk ya oli “ol saen.” (Revelesen 1:1, NW) Longtaem finis, ol Witnes blong Jeova oli tokbaot long buk blong olgeta hemia Studies in the Scriptures, Buk 4, se: “Yumi no gat tingting ya se ol king ya bambae oli kam wanples long Hil blong Megido.”

Ol samting we oli bin hapen long Megido bifo, oli pija blong taem ya we i stap kam, we God bambae i spolem olgeta enemi blong hem. Taswe, long Amagedon, God bambae i meksua se olgeta kruked fasin mo rabis fasin oli mas finis long evri ples.—Revelesen 21:8.

Ol man we oli lavem Jeova mo Pikinini blong hem, Jisas Kraes, oli no nid blong fraet long Amagedon. God bambae i faet agensem ol man ya nomo we Hem i jajem olgeta se oli rabis man we oli no wantem jenisim fasin blong olgeta. Long faet ya, God bambae i spolem ol man nogud nomo. Baebol i talem se: “Hae God i save sevem ol man we oli bilif long hem.” (2 Pita 2:9) Ol Sam 37:34 i talemaot wan promes we i mekem yumi haremgud tumas i se: “Yu mas putum tingting blong yu i stap strong long Hae God, mo yu mas obei long ol tok blong hem, nao bambae hem i ona long yu, i givim graon ya long yu. Bambae yu luk we hem i ronemaot ol man nogud.”

[Futnot]