?Yu Yu Save Papa Blong Yu Long Heven?
?YU YU savegud papa blong yu? Ating bambae yu harem se kwestin ya i narakaen sipos yu gruap long wan famle we i gat lav. Maet yu ansa se: “!Be yes, mi mi savegud hem!” Bighaf blong ol man oli save wanem samting we papa blong olgeta i laekem mo wanem we hem i no laekem, wanem bambae hem i mekem taem wan samting i hapen, mo olsem wanem hem i lukaotgud long famle blong hem.
Nating se i olsem, maet i gat sam taem we yu yu sapraes bigwan blong luk wan fasin we papa blong yu i soem, we yu no ting se i fasin blong hem. Tingbaot, maet wan boe i save se papa blong hem i wan man we i kwaet oltaem mo i no toktok plante. Be wan dei, wan trabol i kamaot, ale kwiktaem nomo, boe ya i luk se papa blong hem i kam wan man we i gat strong tingting blong mekem ol samting blong protektem famle blong hem.
?Olsem wanem long God ya we i Wokem yumi? Long saed blong hem, Baebol i talem se: “Long hem, yumi stap kasem laef, mo yumi wokbaot, mo yumi stap.” (Ol Wok 17:28, NW) Yumi gat kaon long God from laef blong yumi, mo from samting ya hem i Papa blong evri man we i laef. (Aesea 64:8) Ating yu yu harem olsem finis long saed blong God, mo hemia i gud from we i stret nomo we yumi harem olsem. Be i gat plante samting yet blong yumi save mo lanem long saed blong God—blong oli givhan long yumi mo mekem yumi glad.
Save we yu yu gat long saed blong papa blong yu, i gat paoa long filing mo respek we yu yu gat long hem. Long sem fasin, moa we yu save God, moa we yu kam klosap long hem. Sipos yu traehad blong savegud God mo yu lanem blong mekem ol samting we hem i wantem, God i save givhan long yu blong stanap strong long ol traem mo hadtaem we yu kasem long laef.
?God i wanem kaen man? ?Ol fasin blong hem oli mas gat wanem paoa long filing we yu yu gat long hem? ?Sipos yu yu savegud hem, hemia i min se bambae yu gat sam wok blong mekem? Bambae yu faenem ansa blong ol kwestin ya long haf we i kam biaen.
[Tok blong makem poen long pej 3]
Save we yu yu gat long ol narafala i save gat paoa long filing blong yu long saed blong olgeta