Kam Klosap Long God

“Man We i Stap Tru Long Yu Bambae Yu Yu Stap Tru Long Hem Tu”

2 SAMUEL 22:26, NW

TAEM wan man we yumi trastem hem i mekem yumi harem nogud, hemia i save mekem tingting blong yumi i foldaon moa, i bitim ol narafala trabol. Fasin blong harem nogud i stap kam plante long wol ya, we ol man blong hem oli no moa gat fasin blong stap tru long narafala. (2 Timoti 3:1-5) ?I gat wan man we yumi save trastem hem se bambae i stap tru long yumi? Tingbaot stori blong Deved, king blong Isrel bifo.

Long ful laef blong Deved, hem i fesem ol trabol we oli nogud olgeta, from ol man we oli no stap tru long hem. Sol we i faswan king blong Isrel, i jalus long Deved, nao i talemaot se Deved i wan man blong brekem loa, ale Sol i mekem i nogud tumas long hem. Long prapa famle blong Deved tu, woman blong hem Mikal i no moa stap tru long hem. Woman ya “i stat blong agensem Deved long hat blong hem.” (2 Samuel 6:16, NW) Ahitofel we Deved i trastem hem olsem man blong givim advaes, i lego hem mo i go sapotem wan man we i wantem girap agens long Deved. ?Hu ya man ya? !Hemia Absalom ya, stret pikinini blong Deved! Plante taem Deved i kasem trabol long olgeta we hem i trastem olgeta. ?Olsem wanem? ?Hem i letem tingting blong hem i foldaon, mo i talem se i no moa gat wan man we hem i save trastem?

Yumi faenem ansa long ol tok blong Deved long 2 Samuel 22:26 (NW). Deved we i bilif strong long Jeova God, i singsing se: “Man we i stap tru long yu bambae yu yu stap tru long hem tu.” Deved i savegud se nomata we ol narafala man oli mekem hem i harem nogud, be Jeova bambae i gohed blong stap tru long hem.

Yumi traem lukluk gud long ol tok blong Deved. Hibru tok we oli tanem i kam “stap tru” i save minim “lav mo kaengud fasin.” Fasin ya blong stap tru i stanap long lav. Lav i pulum Jeova blong fasgud long olgeta we oli stap tru oltaem long hem.a

Makem tu se blong stap tru, hemia i no wan filing, mo i no wan samting we i stap long tingting blong man nomo. Be i gat wok i go wetem. Jeova i mekem samting blong soemaot se hem i stap tru long ol man. Ol samting we oli hapen long laef blong Deved, oli mekem hem i luksave samting ya. Taem Deved i kasem ol bigbigfala trabol, Jeova i mekem sam samting blong givhan long hem, i protektem mo i lidim hem. Deved i talem tangkiu long Jeova mo i talem se Hem nomo i ‘tekemaot hem long han blong ol narafala enemi blong hem.’—2 Samuel 22:1.

?Ol tok blong Deved oli save givhan long yumi olsem wanem? Jeova i no save jenis mo i no save jenisim tingting blong hem. (Jemes 1:17) Jeova i no stap brekem ol rul we hem nomo i putumap, mo hem i stap holem olgeta promes we hem i mekem. Long wan narafala Sam, Deved i raetem se: “Jeova . . . bambae i no save lego olgeta we oli stap tru long hem.”—Ol Sam 37:28, NW.

Jeova i tinghae long fasin blong yumi blong stap tru long hem. Hem i glad tumas taem yumi stap tru mo yumi obei long hem. Mo hem i talem long yumi blong folem fasin blong hem mo stap tru long ol narafala man. (Efesas 4:24, NW; 5:1) Sipos yumi stap tru olsem, yumi save trastem Jeova se bambae hem i no lego yumi. Nomata we ol narafala man oli mekem i nogud long yumi, yumi save lukluk i go long Jeova mo trastem hem se bambae hem i halpem yumi blong winim enikaen trabol we yumi kasem long laef blong yumi. ?Olsem wanem? ?Yu yu stap kam klosap moa long Jeova, we i gat fasin ya blong “stap tru”?—Revelesen 16:5, NW.

[Futnot]