?Yu yu Save?

?Afta long yia 70, ol man oli bildim bakegen tempol long Jerusalem?

JISAS i talem se ol man bambae oli spolem gud tempol blong Jehova. Samting ya i hapen long yia 70, taem ol soldia blong Rom we Titus i lidim, oli spolem Jerusalem. (Mat. 24:2) Plante yia biaen, hedgavman blong Rom we nem blong hem Julian, i mekem plan blong bildim tempol ya bakegen.

Ol man oli ting se Julian hem i laswan hiten man we i hedgavman blong Rom. Constantine hem i angkel blong hem. Ol man we oli talem se oli Kristin, oli tijim Julian long bilif blong olgeta. Be long yia 361, taem Julian i kam hedgavman, hem i sakemaot tijing blong olgeta. From we hem i tanem baksaed long jos, ol buk blong histri oli putum nem blong hem se Julian the Apostate (Man We i Lego Mo i Agensem Bilif).

Julian i no laekem nating ol man we oli talem se oli Kristin. Maet hemia from we taem hem i gat sikis yia nomo, ol man ya oli kilim papa blong hem mo sam narafala famle blong hem, oli ded. Ol man we oli stadi long histri blong Jos, oli talem se Julian i pulum ol man Jiu blong oli bildim bakegen tempol blong olgeta. Hem i ting se samting ya bambae i pruvum se Jisas i wan giaman profet.a

Julian i wantem bildim tempol ya bakegen. Be yumi no save stret sipos hem i statem wok ya, no nogat. Mo sipos i tru se hem i statem, yumi no save se wanem samting i mekem se wok ya i stop. Nomata se i olsem wanem, be klosap tu yia afta we Julian i kam hedgavman, ol man oli kilim hem i ded. Mo ol man oli neva bildim tempol ya bakegen.