Yu Skelem Tu Samting We Tufala i Defdefren
Long olgeta tija we oli stap long wol samtaem, ?yu ting se Jisas i beswan? Maet yu traem finis blong folem sam fasin blong Jisas blong tijim man, olsem kwestin mo pija tok. Be maet yu no tingbaot tumas se taem Jisas i tijim ol man, plante taem hem i skelem tu samting we tufala i defdefren.
Plante man oli folem fasin ya taem oli toktok. Maet yu tu yu mekem olsem, be yu no luksave nating. Maet yu talem se, “Oli talem se ol frut ya oli raep evriwan, be sam oli no raep nating.” No yu talem se, “Taem hem i pikinini hem i sem we i sem, be naoia hem i toktok plante.”
Long taem olsem, yu talem wan tingting, nao biaen yu yusum tok ya be, blong talem samting we i defren olgeta. Sipos no, yu givim moa save blong soemaot se tufala tingting ya i defdefren. Olsemia, yu toktok long prapa fasin blong yu mo yu givhan long narafala blong i kasem save.
Maet long ples blong yu ol man oli no toktok olsem. Be nating, fasin ya blong toktok i save givhan long yu. ?From wanem yumi talem olsem? From we i gat plante toktok olsem insaed long Baebol. Plante taem, Jisas i tokbaot tu samting we tufala i defdefren. Hem i talem se: “Yufala i harem finis we ol tija oli talem bifo se, ‘Yufala we i mared, bambae yufala i no mas go slip wetem narafala woman.’ Be mi mi talem long yufala, se man we i luk wan woman . . . ” “Yufala i harem finis we ol tija oli talem bifo se, ‘Sipos wan man i spolem wan ae blong yu, ol man oli mas spolem wan ae blong hem tu. . . . ’ Be mi mi talem long yufala, se . . . sipos wan man i slavem fes blong yu long raet saed, yu mas letem hem i slavem fes blong yu long lef saed tu.” “Yufala i harem finis we ol tija oli talem bifo se, ‘Yu mas lavem ol man we oli stap raonabaot long yu, be yu mas agensem ol enemi blong yu.’ Be mi mi talem long yufala, se yufala i mas lavem ol enemi blong yufala.”—Mat. 5:27, 28, 38, 39, 43, 44.
Long sam narafala buk blong Baebol tu, i gat ol tok olsem. Oli save givhan long yu blong yu kasem gud wan tingting. Mo oli save soemaot rod we i beswan blong mekem wan samting. Sipos yu wan papa, yu traem tingbaot tok ya: “Ol papa, yufala i no mas mekem ol pikinini blong yufala oli harem nogud gogo oli kam kros. Be yufala i mas gohed blong stretem olgeta, mo blong trenem tingting blong olgeta olsem we Jehova i wantem.” (Efes. 6:4, NW) Sipos aposol Pol i talem nomo se ol papa oli mas tijim pikinini folem loa blong God, hemia i stret finis. Be poen ya i kamaot moa klia taem hem i talem tu tingting we tufala i defdefren. Hem i talem se oli ‘no mas mekem pikinini i harem nogud, be oli mas trenem tingting blong pikinini olsem we Jehova i wantem.’
Long sem japta yet, Pol i talem se: ‘Olgeta ya we yumi stap faet agens long olgeta long laef blong yumi, oli no man. Be yumi stap faet agens long ol devel we oli stap olbaot long wol ya.’ (Efes. 6:12) Long vas ya, tufala tingting we oli defdefren oli givhan long yu blong yu kasem save se faet we yu yu stap long hem i bigwan. Yu stap faet agens long ol rabis spirit, be i no agensem ol man.
BAMBAE YU KASEM GUDFALA FRUT FROM
Long buk blong Efesas, i gat plante narafala vas we Pol i talem tu tingting we tufala i defdefren. Sipos yumi skelem olgeta, oli save givhan long yumi blong yumi kasem gud poen we Pol i stap talem. Mo ating samting we yumi mas mekem folem poen ya bambae i kam klia moa.
Long lis ya we i stap, i gat sam moa vas blong Efesas japta 4 mo 5 we oli makemaot tu tingting we tufala i defdefren. I gud yu tingting long olgeta mo yu traem faenem mining we i stap insaed long olgeta. Taem yu ridim ol vas ya wanwan, i gud yu skelem wetem laef blong yu. Yu save askem se: ‘?Wanem tingting blong mi? Taem mi fesem samting olsem, ?mi mi mekem wanem? ?Weswan long tufala tingting ya i soemaot fasin blong mi?’ Sipos yu luksave wan fasin we yu mas wok long hem taem yu ridim ol vas ya, i gud yu mekem. Yu mas folem samting we yu lanem.
Yu save yusum lis ya long famle wosip. Fastaem, yufala evriwan i ridim ol vas ya. Nao wan long yufala i save talem fas tingting long wan vas, mo ol narawan oli traem talem narafala tingting long vas ya. Nao yufala evriwan i tokbaot olsem wanem yufala i save folem stret fasin we vas ya i makemaot. Taem yufala i skelem tu tingting we tufala i defdefren, samting ya i save givhan long ol yangfala mo ol olfala tu, blong oli folem ol Kristin fasin insaed long famle mo afsaed.
Oli stap skelem tu tingting we i defdefren
Taem yu luk se fasin ya blong skelem tu tingting we tufala i defdefren i givhan long yu, bambae yu traehad blong faenem plante moa tok olsem long Baebol. Mo tu, bambae yu luk se oli givhan long yu long wok blong prij. Olsem nao, yu save talem long man we yu prij long hem se: “Plante man oli ting se yumi gat wan spirit we i no save ded samtaem. Be yu traem luk vas ya long Baebol.” Taem yu mekem wan Baebol stadi, maet yu askem long hem se: “Plante man long ples ya oli bilif se God mo Jisas tufala i wan nomo. ?Be Baebol i talem wanem? ?Weswan long tufala bilif ya we yu yu wantem folem?”
Tru ya, i gat plante vas long Baebol we oli givim tu tingting we tufala i defdefren. Oli save tijim yumi mo oli save givhan long yumi blong yumi folem ol fasin we God i wantem. Mo yumi save yusum ol vas ya blong givhan long ol narafala blong oli kasem trutok blong Baebol.