?Yu Yu Save?

?Hu i papa blong Josef?

Josef we i wan kapenta long Nasaret, hem i adoptem Jisas. ?Be hu i papa blong Josef? Taem Gospel blong Matiu i tokbaot laen blong Jisas, hem i talem se Jekob i papa blong Josef, be Luk i talem se Josef i “pikinini blong Heli.” ?From wanem tufala buk ya i talem defdefren samting?​—Luk 3:23; Matiu 1:16.

Matiu i talem se: “Jekob i papa blong Josef.” Long ples ya, Matiu i yusum wan Grik tok we i soemaot klia se Jekob i stret papa blong Josef. Matiu i stap talem stret laen blong Josef, hemia laen blong Deved we i laen blong ol king. Jisas i kasem raet blong sidaon long jea blong king, from we Josef we i adoptem hem, i stap long laen blong Deved.

Be Luk i talem se: “Josef ya, hem i pikinini blong Heli.” Taem vas ya i talem “pikinini blong Heli,” i save min se hem i mared long gel blong Heli. Hemia i sem mak long Luk 3:27, we i talem se Sealtiel i “pikinini blong Neri.” Be stret papa blong Sealtiel, hemia Jehoeakin. (1 Kronikel 3:17; Matiu 1:12) Ating Sealtiel i mared long wan gel blong Neri we yumi no save nem blong hem. Long sem fasin, Josef i “pikinini” blong Heli, from we hem i mared long gel blong Heli. Taswe Luk i stap tokbaot laen blong Meri, we i bonem Jisas taem “hem i [kam] man.” (Rom 1:3) Yumi luk se Baebol i tokbaot laen blong Jisas long saed blong Meri mo long saed blong Josef tu.

?Long taem bifo oli yusum wanem kaliko, mo oli pentem long wanem?

Long ol ples we Jisas i wokbaot long olgeta, oli yusum hea blong sipsip, mo nani, mo kamel, blong wokem kaliko. Plante taem Baebol i tokbaot ol sipsip, mo wok blong katem hea blong ol sipsip, mo klos we oli wokem long hea blong sipsip. (1 Samuel 25:2; 2 King 3:4; Job 31:20) Oli yusum gras ya flakis blong wokem gudfala kaliko ya linen. Gras ya i gru long Ijip mo long Isrel. (Jenesis 41:42; Josua 2:6) Maet ol man Isrel bifo oli no planem koten, be Baebol i talem se ol man Pesia oli yusum gudfala tred ya koten. (Esta 1:6) Kaliko ya silik i sas, from we ating ol bisnesman blong ol ples farawe olsem India mo Jaena mo ol narafala kantri, olgeta nomo oli karem i kam.​—Revelesen 18:11, 12.

Wan buk (Jesus and His World) i talem se: “Plante taem hea blong sipsip i waet, be i gat braon tu mo sam narafala kala olsem.” Plante taem oli pentem kaliko we oli wokem long hea blong sipsip. Kala ya pepol we i sas tumas, oli wokem long wota we oli tekemaot long samkaen nawita mo sel. Oli wokem ol kala olsem red, yelo, blu, mo blak, long ol flaoa, ol rus blong tri, ol lif, mo sam bebet.