Gohed Gud Long Wok Blong Prij
1. ?Jisas mo ol fas Kristin oli soemaot wanem rod blong kam gud moa long wok blong prij?
1 Ol Kristin oli mas gohed gud long wok blong prij. Hemia nao from wanem Jisas i trenem ol disaepol blong hem blong oli kam gud moa. (Luk 9:1-5; 10:1-11) Hemia nao from wanem Akwila mo Prisila i tekem Apolos i go long haos blong tufala, nao “tufala i talemaot Rod blong God i klia moa long hem.” (Wok 18:24-26) Hemia nao from wanem Pol i talem long Timoti we i prij plante finis, se hem i mas kam gud moa blong tijim ol man, nao “olgeta man oli save luk” we hem i stap gohed gud. (1 Tim. 4:13-15) Nating se yumi mekem wok blong Masta plante yia finis, yumi save kam gud moa yet long wok blong prij.
2. ?Olsem wanem yumi lanem samting long narafala?
2 Lanem Samting Long Narafala: Yumi save kam gud moa sipos yumi traehad blong lanem samting long narafala. (Prov. 27:17) Taswe yu mas lesin gud taem pablisa we i prij wetem yu i stap toktok. Yu askem advaes long olgeta we oli gat gudhan blong prij, nao yu lesin gud. (Prov. 1:5) Maet yu no save gud olsem wanem blong visitim wan man bakegen, no statem wan Baebol stadi, no wan narafala samting bakegen. I gud yu askem long elda we i lukaot long grup, no long wan pablisa we i gat gudhan blong prij, blong i trenem yu. Yu mas tingbaot tu se tabu spirit blong Jehova i save givhan long yu blong yu kam gud moa, taswe i gud yu prea oltaem blong askem tabu spirit.—Luk 11:13.
3. Sipos yu kasem advaes we yu no askem, ?yu mas mekem wanem?
3 Maet narafala i givim advaes long yu, nating se yu no askem. Yu no mas kros long hem. (Pri. 7:9) Olsem Apolos, yu mas mekem tingting blong yu i stap daon, yu glad long advaes ya, mo yu talem tangkiu. Yu waes sipos yu mekem olsem.—Prov. 12:15.
4. ?Jisas i talem se yumi mas gohed gud from wanem?
4 Yumi Leftemap Nem Blong God: Jisas i yusum pijatok blong pulum ol man blong hem blong oli gohed gud long wok blong prij. Hem i tokbaot hem wan olsem wan rop blong grep, mo ol man blong hem oli olsem ol han blong rop ya. Hem i talem se Papa blong hem i klinim ol han we oli karem frut, “blong bambae oli save karem plante frut moa.” (Jon 15:2) Wan masta blong plantesen blong grep i wantem se ol han blong grep oli karem plante moa frut. Long sem fasin, Jehova i wantem se yumi gohed blong kam gud moa, blong yumi save karem plante moa frut “taem yumi talemaot nem blong Jisas.” (Hib. 13:15) ?Wanem i save kamaot sipos yumi gohed gud long wok blong prij? Jisas i talem se: “Taem yufala i karem plante frut long laef blong yufala, samting ya i save leftemap nem blong Papa blong mi.”—Jon 15:8.