Gudfala Advaes: Advaes Blong Baebol i Wok Gud
Plante milian man oli trastem ol advaes blong Baebol from we oli luksave se i wok gud. Traem luk fo long ol advaes ya.
1. Mared
Ol man oli gat defdefren tingting long saed blong mared, mo samting we man i mas mekem blong glad long mared blong hem.
BAEBOL I TALEM SE: “Wanwan hasban i mas lavem waef blong hem olsem we hem i lavem hem wan, mo waef i mas gat bigfala respek long hasban blong hem.”—Efesas 5:33.
MINING: God nao i stanemap mared, taswe hem i save stret samting we wan kapol i mas mekem blong glad long mared blong tufala. (Mak 10:6-9) Sipos wan hasban o waef i tingbaot narawan fastaem be i no samting we hem nomo i wantem, bambae tufala tugeta i glad. Wan hasban we i lavem waef blong hem, bambae i lukaot gud long hem mo i kaen long hem. Mo wan waef we i respektem hasban blong hem, bambae i soemaot samting ya long ol toktok mo aksen blong hem.
ADVAES BLONG BAEBOL I WOK GUD: Quang mo Thi, wan kapol blong Vietnam, tufala i ting se bambae tufala i neva glad long mared blong tufala. Plante taem Quang i no kaen long waef blong hem. Hem i talem se: “Mi no tingbaot ol filing blong Thi mo mi stap talem ol tok we i spolem hem.” Thi i wantem se tufala i divos. Hem i talem se: “Mi harem se mi no moa save trastem mo respektem hasban blong mi.”
Biaen Quang mo Thi i stadi long Baebol, mo tufala i lanem blong folem advaes we i stap long Efesas 5:33 long mared blong tufala. Quang i talem se: “Vas ya i halpem mi blong luksave se mi mas kaen long Thi, givim samting we hem i nidim, mo mekem hem i haremsave se mi lavem hem. Taem mi mekem olsem, hem i lavem mo respektem mi moa.” Mo Thi i talem se: “Taem mi folem advaes blong Efesas 5:33 blong respektem hasban blong mi, hasban blong mi i lavem mi moa mo mi harem se mi gat pis.”
Blong kasem sam moa advaes long saed blong mared, ridim Wekap! N. 2 2018, we taetel blong hem se “12 Rod Blong Gat Wan Hapi Famle,” we i stap long jw.org.
2. Fasin We Yumi Mekem Long Ol Narafala
Plante taem ol man oli mekem i nogud long ol narafala from kantri blong olgeta, kala blong skin blong olgeta, fes, bodi, mo klos blong olgeta, relijen blong olgeta, o from we oli homoseksuol.
BAEBOL I TALEM SE: “Yufala i mas ona long ol defren kaen man.”—1 Pita 2:17.
MINING: Baebol i no agri long fasin ya blong mekem i nogud long ol narafala we oli defren long yumi. Be Baebol i talem se yumi mas respektem olgeta man, nating se kala blong skin blong olgeta i defren, oli blong wan narafala kantri, oli rij o oli pua. (Ol Wok 10:34) Nating sipos yumi no agri long bilif blong narafala o fasin blong laef blong olgeta, be yumi mas kaen long olgeta mo respektem olgeta.—Matiu 7:12.
ADVAES BLONG BAEBOL I WOK GUD: Daniel i gat tingting ya se ol man Esia oli stap spolem kantri blong hem. Taswe hem i no laekem nating ol man Esia, mo plante taem hem i tok nogud long olgeta long fored blong ol narafala. Daniel i talem se: “Mi ting se mi stap sapotem kantri blong mi. Mi no luksave se samting we mi stap mekem i no stret.”
Biaen Daniel i stadi long Baebol, nao hem i talem se: “Mi lanem se God i stap luk olgeta man se oli sem mak nomata se oli blong wea. Taswe mi mas jenisim tingting blong mi fulwan.” Daniel i gohed i se: “Naoia taem mi mitim wan man, mi no moa tingbaot se hem i blong wanem kantri. Mi lavem olgeta man, mo mi gat ol fren we oli kamaot long ol defdefren ples long wol.”
Blong save moa, ridim Wekap! N. 3 2020, we taetel blong hem se “?Yu Yu Kasem Vaeras Ya?” we i stap long jw.org.
3. Mane
Plante man oli traehad blong kam rij, from we oli ting se hemia bambae i mekem se oli glad mo gat wan gudfala fiuja.
BAEBOL I TALEM SE: “Waes i protektem man, sem mak olsem we mane i protektem man, be gudfala samting we i kamaot from save, hemia se: Man we i waes, waes ya i lukaot gud long laef blong hem.”—Prija 7:12.
MINING: I tru se yumi nidim mane, be mane i no save mekem yumi glad mo gat wan gudfala fiuja. (Ol Proveb 18:11; 23:4, 5) Blong yumi kasem trufala glad mo gat wan gudfala fiuja, yumi mas folem ol advaes blong God we i stap long Baebol.—1 Timoti 6:17-19.
ADVAES BLONG BAEBOL I WOK GUD: Cardo, wan man long Indonesia, i wok had blong kam rij. Hem i talem se: “Mi gat evri samting we ol man oli wantem gat. Mi naf blong travel i go long ol narafala ples, pem ol sas samting, ol trak, mo ol haos.” Be ol samting ya oli blong smoltaem nomo. Hem i talem se: “Wan man i trikim mi mo i stilim olgeta mane we mi wok had blong kasem. Mi wok had plante yia blong kam rij, be biaen mi luksave se mi traehad blong nating nomo mo mi no glad long laef blong mi.”
Cardo i stat blong folem advaes blong Baebol long saed blong mane. Hem i no moa wok had blong winim plante mane, be hem i lanem blong glad long samting we hem i gat. Hem i talem se: “Naoia mi harem se mi rij moa i bitim bifo, from we mi fren gud wetem God. Hemia i mekem se mi save slip gud long naet, mo mi glad moa.”
Blong save samting we Baebol i talem long saed blong mane, ridim atikol ya “?Edukesen Mo Mane i Save Givim Wan Fiuja We i Sef?” we i stap long Wajtaoa N. 3 2021, long jw.org.
4. Seks
Ol man oli gat defdefren tingting long saed blong seks, se wanem samting i stret mo i no stret blong mekem.
BAEBOL I TALEM SE: “Yufala i no mas mekem enikaen doti fasin blong seks. Yufala wanwan i mas save olsem wanem blong bos long prapa bodi blong yufala long fasin we i klin mo i soem ona.”—1 Tesalonaeka 4:3, 4.
MINING: Baebol i tokbaot seks, mo i talem se i gat sam samting we man i no mas mekem. Taem Baebol i yusum tok ya “enikaen doti fasin blong seks,” hemia i minim ol fasin olsem, wan hasban o waef i slip wetem narafala we i no hasban o waef blong hem, wan man mo wan woman i slip tugeta we tufala i no mared, man i slip wetem man o woman i slip wetem woman, man i slip wetem animol, mo man i slip wetem narafala blong kasem mane. (1 Korin 6:9, 10) Seks i wan presen we God i givim nomo long wan man mo wan woman we tufala i mared.—Ol Proveb 5:18, 19.
ADVAES BLONG BAEBOL I WOK GUD: Wan woman long Ostrelia we nem blong hem Kylie i talem se: “Taem mi no mared yet, mi ting se sipos mi mekem seks wetem narafala, bambae hem i lavem mi mo bambae mi harem gud. Be hemia i no tru, from we mi harem nogud mo mi wari.”
Biaen, Kylie i lanem samting we Baebol i talem long saed blong seks. Hem i talem se: “Mi luksave se ol loa blong God oli stap blong protektem yumi blong yumi no harem nogud. Naoia we mi folem ol advaes blong God, mi gat pis long tingting mo narafala i lavem mi. Ol advaes blong Baebol oli lidim gud mi, blong mi no kasem plante trabol.”
Blong save moa, ridim atikol ya “?Baebol i Talem Wanem Long Saed Blong Laef Tugeta Bifo Mared?” we i stap long jw.org.
God i stap givhan long yumi blong save samting we i stret blong mekem mo samting we i no stret blong mekem. Samtaem i no isi blong folem ol advaes blong hem, be sipos yumi folem, bambae yumi glad oltaem.