?Hu i Go Long Heven?
Ansa we Baebol i givim
God i jusum wan smol namba blong ol gudfala Kristin, blong oli laef bakegen mo go long heven. (1 Pita 1:3, 4) Afta we God i jusum olgeta, oli mas gohed blong holemstrong bilif mo gudfala fasin, sipos no oli no save go long heven.—Efesas 5:5; Filipae 3:12-14.
?Bambae oli mekem wanem long heven?
Bambae oli wok wetem Jisas olsem king mo pris blong 1,000 yia. (Revelesen 5:9, 10; 20:6) Bambae oli fomem “niufala heven” o gavman we bambae i rulum “niufala wol” o ol man long wol. Nao oli save halpem ol man blong kam stretgud olgeta, olsem we God i wantem fastaem.—Aesea 65:17; 2 Pita 3:13.
?Hamas man bambae oli go long heven?
Baebol i soem se 144,000 man bambae oli laef bakegen blong go long heven. (Revelesen 7:4) Long Revelesen 14:1-3, aposol Jon i luk “Smol Sipsip i stap stanap long Hil Ya Saeon, mo i gat 144,000 man oli stap wetem hem.” Long vison ya, “Smol Sipsip” i minim Jisas we i gobak long heven. (Jon 1:29; 1 Pita 1:19) “Hil Ya Saeon” i minim hae posisen blong Jisas mo ol 144,000 man we oli rul wetem hem long heven.—Ol Sam 2:6; Hibru 12:22.
Olgeta ya we “God i singaot olgeta mo i jusumaot olgeta” blong rul wetem Kraes long Kingdom, Baebol i kolem olgeta se “smol grup blong ol sipsip.” (Revelesen 17:14; Luk 12:32) Hemia i soem se oli no plante, taem yu tingbaot namba blong olgeta sipsip blong Jisas.—Jon 10:16.
Ol rong tingting long saed blong olgeta we oli go long heven
Rong tingting: Evri gudfala man oli go long heven.
Trutok: God i promes se plante gudfala man bambae oli laef olwe long wol.—Ol Sam 37:11, 29, 34.
Jisas i talem se: “I no gat man i go antap long heven samtaem.” (Jon 3:13) Hemia i soem se ol gudfala man ya olsem Ebraham, Moses, Job, mo Deved we oli ded bifo long hem, oli no go long heven. (Ol Wok 2:29, 34) Be oli gat hop ya blong laef bakegen long wol.—Job 14:13-15.
Baebol i kolem laef bakegen blong go long heven se, “faswan laef bakegen.” (Revelesen 20:6) Hemia i soem se bambae i gat wan narafala laef bakegen, mo hem i blong wol ya.
Baebol i tijim se aninit long rul blong Kingdom blong God, “bambae i no moa gat man i ded.” (Revelesen 21:3, 4) Promes ya i blong wol ya, from we i neva gat ded long heven.
Rong tingting: Wanwan man i save jusum sipos hem i wantem laef long heven o long wol.
Trutok: God nao i jusum se weswan Kristin bambae i ‘kasem praes. . . blong go antap,’ hemia hop blong go long heven. (Filipae 3:14) Samting ya i no dipen nomo long filing we man i gat blong go long heven.—Matiu 20:20-23.
Rong tingting: Hop blong laef olwe long wol, i blong olgeta we oli no naf blong go long heven.
Trutok: God i tokbaot olgeta we bambae oli laef olwe long wol se, oli “man blong mi we mi jusumaot olgeta,” mo “Jehova i blesem olgeta.” (Aesea 65:21-23) Bambae oli gat janis ya blong mekem stamba tingting blong God i kamtru, taem oli laef olwe wetem bodi we i stret gud olgeta long wan paradaes long wol.—Jenesis 1:28; Ol Sam 115:16; Aesea 45:18.
Rong tingting: Namba ya 144,000 long Revelesen i no wan prapa namba, be i pija blong wan narafala samting.
Trutok: Nating se Revelesen i yusum ol namba blong pijarem sam samting, be i gat sam we oli prapa namba. Eksampol, hem i tokbaot “12 nem blong ol 12 aposol blong Smol Sipsip.” (Revelesen 21:14) Makem pruf we i soem se 144,000 i wan prapa namba.
Revelesen 7:4 i se “namba blong olgeta we mak blong God i stap long olgeta, hemia 144,000.” Ol vas we i kam biaen, oli tokbaot wan “bigfala hip blong ol man, we i no gat man i save kaontem olgeta.” God i sevem “bigfala hip” blong ol man ya tu. (Revelesen 7:9, 10) Sipos 144,000 i no wan prapa namba, be i minim wan grup we i nogat stret namba blong hem, bambae i no isi blong makem se tufala grup ya i defren.a
Mo tu, Baebol i talem se God i pemaot ol 144,000 man ya “long ol narafala man, nao oli kam olsem ol fasfrut blong garen.” (Revelesen 14:4) Tok ya “fasfrut” i minim smol grup blong ol man we oli defren long ol narafala. Olgeta ya bambae oli go joen wetem Kraes blong rulum ol man long wol, we i nogat stret namba blong olgeta.—Revelesen 5:10.
a Sem mak, Profesa Robert L. Thomas i tokbaot namba ya 144,000 we i stap long Revelesen 7:4, se: “Hemia wan prapa namba blong soem se i defren long ol hip man we japta 7:9 i tokbaot, be i no givim wan stret namba. Sipos namba ya i saen nomo blong wan samting, hemia i min se evri namba long buk ya oli no prapa namba.”—Revelesen 1-7: An Exegetical Commentary, pej 474.