OL YANGFALA OLI ASKEM
?Olsem Wanem Blong Trenem Tingting Blong Mi We i Save Stikim Mi?
?Tingting blong yu we i save stikim yu i sem mak long wanem?
wan kampas
wan mira
wan fren
wan jaj
Stret ansa hemia se i sem mak long olgeta evriwan. Atikol ya bambae i eksplenem from wanem.
?Wanem ya tingting we i save stikim yu?
Tingting we i save stikim yu, hem i wan dip filing we i mekem yu haremsave se wan samting i stret o i no stret. Baebol i talem se hem i “olsem wan loa we oli raetem insaed long hat blong ol man.” (Rom 2:15, Contemporary English Version) Sipos tingting we i save stikim yu i wok gud, bambae hem i givhan long yu blong jekemgud ol desisen we yu wantem mekem o we yu bin mekem finis.
Tingting we i save stikim yu i olsem wan kampas. Hem i lidim yu long rod we i stret, blong yu no kasem trabol.
Tingting we i save stikim yu i olsem wan mira. Hem i soemaot ol tingting blong yu, i soemaot stret se yu yu wanem kaen man.
Tingting we i save stikim yu i olsem wan gudfala fren. Hem i save givim ol gudfala advaes long yu mo halpem yu blong win long laef—sipos yu lesin long hem.
Tingting we i save stikim yu i olsem wan jaj. Hem i jajem yu taem yu mekem samting we i nogud.
Sipos tingting blong yu we i save stikim yu, i wok gud, hemia i save givhan long yu blong mekem ol waes desisen
Stamba poen: Tingting blong yu we i stikim yu i wan impoten tul we i save givhan long yu blong (1) mekem ol waes desisen, mo (2) soemaot se yu sore from ol mastik blong yu mo yu traem fiksim ol mastik ya.
?From wanem yu mas trenem tingting ya?
Baebol i talem se “yufala i mas gohed blong mekem se tingting blong yufala we i save stikim yufala, i stap klin oltaem.” (1 Pita 3:16) Be i had blong mekem olsem, sipos yu no bin trenem tingting ya.
“Mi stap giaman long papa mo mama blong mi long saed blong ples we mi go long hem mo mi haedem long tufala. Fastaem, tingting blong mi i stikim mi from, be samtaem biaen mi no moa harem se mi stap mekem wan samting we i rong.”—Jenifa.
Biaen, tingting blong Jenifa we i stap stikim hem i pulum hem blong i talemaot long papa mo mama blong hem samting we i stap hapen mo hem i stop blong giaman long tufala.
Yu traem tingbaot: “?Long stat, wetaem nao tingting blong Jenifa i sud stikim hem?”
“Taem yu gat dabol laef, hemia i had mo i mekem se yu wari. Taem tingting we i save stikim yu i letem yu yu mekem wan nogud desisen, bambae i moa isi blong mekem wan narafala nogud desisen.”—Matiu.
Sam man oli no wantem lesin nating taem tingting blong olgeta i stikim olgeta. Baebol i talem se oli “no moa gat sem nating, nao oli stap gohed olbaot.” (Efesas 4:19) Good News Translation i tanem tok ya se: “Oli lusum olgeta filing ya blong sem.”
Yu traem tingbaot: ?Ol man we oli no sem from ol rong samting we oli mekem, oli rili gat gudfala laef? ?Wanem ol problem we bambae oli kasem?
Stamba poen: Blong gat wan gudfala tingting we i save stikim yu, yu mas naf blong ‘trenem tingting blong yu blong luksave samting we i stret mo samting we i rong.’—Hibrus 5:14.
?Olsem wanem blong trenem?
Blong trenem tingting blong yu, yu mas putum sam rul we yu wantem folem, biaen yu save skelem ol aksen blong yu blong luk sipos i folem ol rul ya. Samfala oli folem ol rul we olgeta ya oli stanemap:
famle mo kalja
ol narafala yangfala
ol popiula man blong singsing o muvi
Be rul we Baebol i talem long saed blong laef mo fasin blong yumi, i gud moa i winim blong olgeta ya. Hemia i no wan samting blong sapraes, from we Baebol i “kamaot long God,” Man ya we i wokem yumi mo i save samting we i gud long yumi.—2 Timoti 3:16.
Traem tingbaot sam eksampol.
RUL: “Mifala i wantem tumas we oltaem mifala i stap mekem i stret nomo long olgeta samting.”—Hibrus 13:18.
?Olsem wanem rul ya i afektem tingting blong yu we i save stikim yu, taem yu wantem kopi ansa blong narafala long taem blong eksam, giaman long papa mama, o stil?
Sipos tingting we i save stikim yu i pulum yu blong tok tru long olgeta samting, ?olsem wanem samting ya i save givhan long yu naoia mo long fiuja?
RUL: “Yufala i mas ronwe long enikaen doti fasin blong seks.”—1 Korin 6:18.
?Olsem wanem rul ya i afektem tingting blong yu we i save stikim yu, taem yu wantem lukluk ol rabis pija o slip wetem narafala bifo mared?
Sipos tingting we i save stikim yu i pulum yu blong ronwe long enikaen doti fasin blong seks, ?olsem wanem samting ya i save givhan long yu naoia mo long fiuja?
RUL: “Be yufala i mas kaen long yufala, yufala i sore long yufala, mo yufala i fofogivim yufala.”—Efesas 4:32.
?Olsem wanem rul ya i afektem tingting blong yu we i save stikim yu, taem yu rao wetem brata o sista blong yu o wetem wan fren?
Sipos tingting we i save stikim yu i pulum yu blong fogivim narafala mo gat sore, ?olsem wanem samting ya i save givhan long yu naoia mo long fiuja?
RUL: “Hae God [Jehova] . . . i no laekem nating olgeta we oli laekem tumas blong mekem faet.”—Ol Sam 11:5.
?Olsem wanem rul ya i afektem yu taem yu wantem jusum wan muvi, wan program long TV, mo wan gem?
Sipos tingting we i save stikim yu i pulum yu blong sakemaot ol pleplei we oli raf, ?olsem wanem samting ya i save givhan long yu naoia mo long fiuja?
TRU STORI: “Mi gat ol fren we oli stap plei long ol gem we oli raf, mo mi tu mi stap plei long ol gem ya. Biaen papa blong mi i talem se mi no moa save plei long ol gem ya. So mi plei nomo taem mi go visitim ol fren blong mi. Mo taem mi kambak long haos, mi no talem eni samting long saed ya. Papa blong mi i stap askem se wanem i rong, mo mi ansa se mi oraet nomo. Be wan dei, mi ridim Ol Sam 11:5 mo mi stat blong harem nogud from samting we mi stap mekem. Long taem ya nao mi stop. Taem wan fren blong mi i luk eksampol blong mi, hemia i pulum hem tu blong i stop blong plei long ol raf gem.”—Jeremy.
Yu traem tingbaot: ?Wetaem nao tingting we i stikim Jeremy i stat blong wok, mo wetaem nao hem i stat blong lesin long hem? ?Yu lanem wanem long stori blong Jeremy?
Stamba poen: Tingting blong yu we i save stikim yu i soemaot se yu wanem kaen man mo samting we yu bilif long hem. ?Taswe, tingting blong yu we i save stikim yu, i talem wanem long saed blong yu?