Ebe Mak
8 Vbe ẹghẹ nii, emwa nibun na werriegbe gbẹbu, iran ma gha mwẹ emwi rhọkpa ne iran khian re, ẹre Jesu na tie erhuanegbe ẹre, ọ na tama iran wẹẹ: 2 “Ohan emwa ni gbẹbu wa to mwẹ, rhunmwuda, ikpẹdẹ eha ẹre ọ ghi ye na, ne iran ke gu mwẹ rre emwa, sokpan, iran i mwẹ emwi rhọkpa ne iran khian re. 3 I gha we ne iran ya ẹko ohanmwẹ kpa nian, iran gha kuọ vbe odẹ; levba sevba, eke ne eso ke rre wa rree.” 4 Sokpan, erhuanegbe ẹre keghi nọ rẹn wẹẹ: “De ehe ne ọmwa khian na miẹn ebrẹd vbe ehe nọ wa divbiẹ na, nọ gha sẹ iran na re?” 5 Ẹre Jesu na ghi nọ iran wẹẹ: “Inu ebrẹd ẹre uwa mwẹ?” Iran na wẹẹ: “Ihinrọn.” 6 Ọ na ghi tama emwa ni gbẹbu, ne iran tota lele otọ. Iyeke ọni, ọ na viọ ebrẹd ihinrọn nii, ẹre ọ na kpọnmwẹ Osanobua, ọ na bunnọ ọnrẹn, ọ na ghi viọ ne erhuanegbe ẹre ne iran ghae ẹre; ẹre iran na ghi ghae ẹre ne emwa ni gbẹbu. 7 Iran vbe gha mwẹ ehẹn eso ne giẹrẹ; ọ ghi na erhunmwu yọ nẹ,* ọ na tama erhuanegbe ẹre, ne iran vbe ghae ẹre. 8 Iran ghi re, ẹko na vuọn iran; iran ghi si eni ghi dekẹe koko, ọ na vuọn okhuae ihinrọn nikhua. 9 Na kha na, ikpia ni rrie odẹ arriaisẹn vbe ihe enẹ (4,000) ẹre ọ ghaa rre evba. Iyeke ọni, ọ na we ne iran gha khian.
10 Vbe ọwara ọkpa nii, irẹn vbe erhuanegbe ẹre keghi la okọ, iran na gha die ikinkin ọghe Dalmanuta. 11 Evba nii, ẹre avbe Farisi na bu ẹre gha dee, iran na gu ẹre gha muan ẹmwẹ; iran kegha hoo ne iran danmwẹ ọnrẹn ghee, ẹre iran na we nọ ru emwi ọyunnuan ye iran aro, nọ gha re ama ne iran khian ya rẹn wẹẹ Osanobua ẹre ọ gie ẹre rre. 12 Ẹmwẹ na keghi da e Jesu sẹ ugboloko, ọ na wẹẹ: “Vbọzẹ ne orre na, na gualọ ama? Ne I ta ẹmwata ma uwa, orre na i khian miẹn ama rhọkpa hiehie.” 13 Ọ ghi ta ẹmwẹ na nẹ, ọ na kpa sẹ iran rae, ọ na werriegbe la okọ, ọ na fian okun rra gha rrie obọ nọkpa.
14 Vbọrhirhighayehẹ, iran ma yerre ya viọ ebrẹd lele egbe, emwi rhọkpa ma vbe gha gue iran vbe uwu okọ, vbọ gberra ududu ebrẹd ọkpa kẹkan. 15 Ọ keghi ya obọ sekhae ne iran, ọ na wa gbe ẹmwẹ ẹho rua ma iran wẹẹ: “Wa ghẹ fi aro rua; wa gha begbe vbe egbe eyist ọghe avbe Farisi kevbe eyist ọghe Hẹrọd.” 16 Ẹre iran na suẹn gha gu egbe muan ẹmwẹ ye ẹmwẹ ebrẹd ne iran ma viọ lele egbe. 17 Jesu ghi rẹn ẹmwẹ ne iran ta, ọ na nọ iran wẹẹ: “Vbọzẹ ne uwa na muan ẹmwẹ ye ẹmwẹ ebrẹd ne uwa ma viọ lele egbe? Wa ma he ye rẹn eke ne ẹmwẹ rrie ra? Te ekhọe uwa wa ye gbin sẹrriọ wẹẹ, wa i ye sẹtin rẹn otọ emwi na ta ra? 18 ‘Wa te mwẹ aro, wa i yae bẹghe ra? Wa te mwẹ ehọ, wa i yae họn ẹmwẹ ra?’ Te uwa ghi mianmian 19 ẹghẹ ne I na bunnọ ebrẹd isẹn ya koko ikpia arriaisẹn vbe ihe isẹn (5,000) ra? Inu okhuae ẹre uwa si koko vbe ebrẹd ne iran re kẹ?” Iran na tama rẹn wẹẹ: “Iweva.” 20 “Ẹghẹ ne I na bunnọ ebrẹd ihinrọn ya koko ikpia arriaisẹn vbe ihe enẹ (4,000), inu okhuae nikhua ẹre uwa si koko vbe ebrẹd ne iran re kẹ?” Iran na tama rẹn wẹẹ: “Ihinrọn.” 21 Ẹre ọ na ghi nọ iran wẹẹ: “Wa ma he ye rẹn otọ re ra?”
22 Iran kegha die Bẹtse-ada. Evba nii, ẹre iran na mu okpia ọkpa nọ rhu aro gie ẹre, iran na rinmwiaẹn nọ ya obọ kaan okpia nii. 23 Ọ keghi rhie okpia nii ne arhuaro obọ, ọ na rhie ẹre ladian vbe igue nii. Ọ ghi tu asẹn ye ọre aro nẹ, ọ na viọ obọ yan rẹn, ọ na nọ rẹn wẹẹ: “U bẹghe emwi rhọkpa ra?” 24 Okpia nii keghi tọn aro mu, ọ na wẹẹ: “I bẹghe emwa, sokpan, te iran yevbe erhan ni khian yo khian rre.” 25 Ọ na werriegbe viọ obọ ye aro okpia nii, ẹre okpia nii na gha bẹghe odẹ ẹse. Aro ọre na rhan, ọ na gha bẹghe emwi hia vbene ọ wa ye zẹẹ. 26 Ọ na ghi we nọ gha rrie owa, ọ na tama rẹn wẹẹ: “Ghẹ la igue na.”
27 Jesu vbe erhuanegbe ẹre keghi kpa gha rrie avbe igue ni rre Sẹseria-Filipai, iran ghi rre odẹ, ọ na suẹn gha nọ erhuanegbe ẹre wẹẹ: “De ọmwa ne emwa kha wẹẹ imẹ khin?” 28 Iran na tama rẹn wẹẹ: “Eso wẹẹ, wẹ ọre Jọn ne Ọ Dinmwi Ọmwa Ye Amẹ, eso wẹẹ, wẹ ọre Ẹlaija, eso vbe kha wẹẹ, ọkpa vbe avbe akhasẹ ẹre u khin.” 29 Ọ na ghi nọ iran wẹẹ: “Wa vbe vbo? De ọmwa ne uwa roro wẹẹ imẹ khin?” Ẹre Pita na wanniẹn ọnrẹn wẹẹ: “Wẹ ọre Kristi.” 30 Ẹre ọ na ghi kakabọ kan rẹn ye iran ehọ, ne iran ghẹ tama ọmwa rhọkpa vbekpa irẹn. 31 Deba ọni, Jesu na suẹn gha tama iran* wẹẹ, ẹ i mwẹ Ovbi ọmwa ma kakabọ rri oya, kevbe wẹẹ, avbe ediọn, avbe ọkaolotu ohẹn kevbe avbe skraib* gha he ẹre yotọ, a ghi vbe gbe ẹre rua; ọ ghaa rre ikpẹdẹ eha, ọ ghi rhiọ kpaegbe. 32 Vbene ẹmwata, te Jesu wa gbe ẹmwẹ na ẹho rua ma iran. Sokpan, e Pita na rhie ẹre ghee okhiẹ, ọ na suẹn gha gu ẹre gui. 33 Ẹre Jesu na mu iyeke daa e Pita, ọ na ghee erhuanegbe ẹre; ọ na gu e Pita gui, ọ na tama rẹn wẹẹ: “Gberra ghee iyeke mwẹ, Setan! rhunmwuda, iro ne u zẹ, ọghe emwa nagbọn nọ, ẹ i re ọghe Osanobua.”
34 Ẹre ọ na ghi tie emwa ni gbẹbu kevbe erhuanegbe ẹre sikẹ egbe, ọ na tama iran wẹẹ: “Adeghẹ ọmwaikọmwa hoo nọ lele mwẹ, we nọ mianmian enegbe ẹre, nọ mu erhan irrioya* ọghẹe, nọ gha lele mwẹ khian. 35 Rhunmwuda, ọmwaikọmwa nọ hoo nọ sinmwi arrọọ* ọghẹe, arrọọ* ọghẹe ghi wii ẹre, sokpan, ọmwaikọmwa nọ mu arrọọ* ọghẹe fua rhunmwuda mwẹ kevbe rhunmwuda iyẹn nọ maan, ọ ghi miẹn arrọọ* ọghẹe fan. 36 Ọghe ne ẹmwata, de ere ne ọmwa khian lae miẹn, deghẹ agbọn na hia na sẹ ọre obọ, vbene arrọọ* ọghẹe na wii ẹre? 37 Vbene ẹmwata, de emwi ne ọmwa gha ya sẹtin dẹ arrọọ* ọghẹe werriegbe? 38 Ọmwaikọmwa ne ekhue mwẹ mu kevbe ne ekhue ẹmwẹ ne I ta mu, vbe agbọn orukhọ na ma gba ẹko ẹre na, ekhue ẹre gha vbe mu Ovbi ọmwa, vbe ọ gha ya uyi ọghe Erhae rre, ke irẹn kevbe avbe odibosa ni huanrẹn.”