Ebe Mak
2 Vbọrhirhighayehẹ, vbe ikpẹdẹ eso ghi gberra nẹ, Jesu keghi werriegbe gha rrie Kapaniọm; emwa keghi họn wẹẹ, ọ rre owa. 2 Emwa nibun keghi ma ye evba, sẹrriọ wẹẹ, ughugha ma ghi gua ẹvbo, ya sẹ onurho; ẹre ọ na suẹn gha kporhu ma iran. 3 Emwa eso keghi mu orhunmwu ọkpa nẹi sẹtin khian* bu ẹre gha dee; ikpia enẹ ẹre ọ dada ẹre rre. 4 Sokpan, iran ma sẹtin muẹn sẹ eke ne Jesu ye, rhunmwuda emwa ni ma ye evba; ẹre iran na ghi gbe uvun ye odukhunmwu* owa vbe eke ne Jesu ghaa ye, iran na ghi la evba mu ebẹdi* ne okpia nii nẹi sẹtin khian* lovbiẹ yi gha die otọ. 5 Jesu ghi bẹghe vbene iran mwẹ amuẹtinyan hẹ, ọ na ghi tama okpia nii nẹi sẹtin khian* wẹẹ: “Ovbi mwẹ, a ya orukhọ ruẹ bọ ruẹ nẹ.” 6 Na kha na, avbe skraib eso* tota ye evba, iran na gha tae vbe uwu ekhọe iran wẹẹ: 7 “Vbọzẹ ne okpia na, na guan vbenian? Te irẹn rhooro na! Ọmwa rhọkpa gha sẹtin ya orukhọ bọ ọmwa ra, vbọ gberra Osanobua ra?” 8 Sokpan, vbe ọwara ọkpa nii, Jesu na wa rẹn emwi ne iran roro vbe ekhọe, ọ na tama iran wẹẹ: “Vbọzẹ ne uwa na mwẹ iziro vberriọ vbe ekhọe uwa? 9 De nọ khuẹrhẹ sẹ na ta? Na tama ọmwa na nẹi sẹtin khian* wẹẹ, ‘A ya orukhọ ruẹ bọ ruẹ nẹ’ nọ ra, ra na kha wẹẹ, ‘Kpaegbe, ne u mu ebẹdi* ruẹ, ne u suẹn gha khian’? 10 Sokpan, ne uwa mieke na rẹn wẹẹ, Ovbi ọmwa mwẹ asẹ nọ ya ya orukhọ bọ emwa vbe agbọn na—” ẹre Jesu na ghi tama okpia nii nẹi sẹtin khian* wẹẹ: 11 “I tama ruẹ nian, Kpaegbe, mu ebẹdi* ruẹ, ne u gha rrie owa.” 12 Ẹre ọ na gele kpaegbe; vbe ọwara ọkpa nii, ọ na tọn ebẹdi* ẹre mu, ọ na sirra iran hia khian kpa. Ọ keghi yan iran hia unu ruan, iran na gha rhie uyi ne Osanobua, iran na wẹẹ: “Ma ma he miẹn egbe emwi vbenian ẹdẹ.”
13 Jesu keghi werriegbe gha rrie ọkpẹn okun, ẹre emwa nibun na gha bu ẹre rre, ọ na suẹn gha ma iran emwi. 14 Ọ ghi gberra khian, ọ na bẹghe Livai ne ovbi Alfiọs, nọ tota ye ehe na na koko igho uhunmwu, ọ na ghi tama rẹn wẹẹ: “Do gha lele mwẹ khian.” Ọwara ọkpa nii, ọ na kpaegbe, ọ na lelẹe. 15 Vbọ ghi zẹ kpẹẹ, Jesu na gha rri evbare* vbe owa e Livai. Irẹn vbe erhuanegbe ẹre kevbe iran nibun ni koko igho uhunmwu, kẹ kevbe emwa orukhọ ẹre ọ koko gha rri evbare;* iran wa gha bun ni ghaa lelẹe khian. 16 Sokpan, avbe skraib* ni vbe re Farisi ghi bẹghe ẹre wẹẹ, ọ gu emwa orukhọ kevbe iran ni koko igho uhunmwu rri evbare, iran na suẹn gha nọ erhuanegbe ẹre wẹẹ: “Vbọzẹ nọ na gu emwa orukhọ kevbe iran ni koko igho uhunmwu rri evbare yi?” 17 Jesu ghi họn ẹmwẹ ne iran tae, ọ na tama iran wẹẹ: “Emwa ne egbe rran rẹn i gualọ ọbo nọ khian sinmwi iran, sokpan iran ni khuọnmwi. Emwa orukhọ ẹre I rre do tie, ẹ i re emwa ni lele uhi.”
18 Erhuanegbe Jọn kevbe avbe Farisi ghaa mu awẹ. Ẹre iran na ghi bu e Jesu gha dee, iran na nọ rẹn wẹẹ: “Vbọzẹ ne erhuanegbe Jọn kevbe erhuanegbe avbe Farisi na mu awẹ, sokpan, erhuanegbe ruẹ i mu awẹ?” 19 Ẹre Jesu na tama iran wẹẹ: “Esa rrọọ ra, ne avbe ọsie ọdafẹn ọha ya gha mu awẹ,* vbene ọdafẹn ọha na gu iran rre evba ra? Ugbẹnvbe ọdafẹn ọha ye gu iran rre evba, esa i rrọọ ne iran khian ya gha mu awẹ. 20 Sokpan, ẹdẹ dee na gha ya rhie ọdafẹn ọha hin eke ne iran ye rre, ọ gha ghi sẹ ẹghẹ nii, iran ghi gha mu awẹ.* 21 Ọmwa rhọkpa i rrọọ nọ khian se ukpọn ọgbọn kevbe ukpọn ọwiẹyi kugbe. Ọ gha ru vberriọ, ukpọn ọgbọn nii ghi yuo fua vbe ukpọn ọwiẹyi nii, ẹghẹ nii, ukpọn nii ghi yanghan sayọ. 22 Erriọ vbe ye, a i miẹn ọmwa nọ khian sa ayọn ọgbọn ye ẹkpo ohian nọ wiẹn nẹ. Ọ gha ru vberriọ, ayọn nii ghi ya ẹkpo ohian nii sa, ẹghẹ nii, ayọn nii ghi tue kua, ẹkpo ohian nii ghi vbe rhia. Sokpan, ẹkpo ohian ọghe ọgbọn, ẹre a sa ayọn ọgbọn yi.”
23 Vbe Jesu ghi la ugbo ọkpa khian vbe Ẹdẹ Ikẹtin, erhuanegbe ẹre na suẹn gha ya obọ khuọn emwiokọ* eso vbe ugbo nii, zẹvbe ne iran ya khian. 24 Rhunmwuda ọni, avbe Farisi na tama e Jesu wẹẹ: “Larre oo! Vbọzẹ ne erhuanegbe ruẹ na ru emwi na wua vbe Ẹdẹ Ikẹtin?” 25 Sokpan, Jesu na ghi tama iran wẹẹ: “Wa ma he tie vbekpa emwi ne Devid ru, vbe ẹghẹ nọ na gha rre ivbabọ, ne ohanmwẹ na gha gbe irẹn vbe ikpia ni ghaa lelẹe khian ra? 26 Wa ma he tie ẹre vbe okha ọghe Abaiata ne ọkaolotu ohẹn, vbene Devid ya la owa Osanobua hẹ, ọ na ya rri ebrẹd na ya zọ ese gie Osanobua?* Ọ ma te khẹke ne ọmwa rhọkpa rri ebrẹd vberriọ, vbọ gberra avbe ohẹn, sokpan, e Devid keghi rriọẹ, ọ na vbe viọ eso ne ikpia ni ghaa lelẹe khian.” 27 Ẹre ọ na vbe tama iran wẹẹ: “Rhunmwuda ọmwa, ẹre a gu mu Ẹdẹ Ikẹtin gbọọ, a ma yi ọmwa rhunmwuda Ẹdẹ Ikẹtin. 28 Rhunmwuda ọni, Ovbi ọmwa ọre Arowa, uhiẹn, irẹn ọre Arowa ọghe Ẹdẹ Ikẹtin.”