Iwinna Avbe Ukọ

27 Vbe a ghi tae nẹ wẹẹ, ne ima la okọ gha rrie Itali, iran keghi mu e Pọl kevbe avbe oleghan eso ne ọkaolotu ivbiyokuo ọkpa na tie ẹre Juliọs, nọ ghaa rre oka ọghe Ọgọstọs. 2 Vbe ima ghi ke Adremitiọm la okọ nọ rrie avbe eghute ni rre avbe otọ ni rre ọkpẹn okun vbe ikinkin ọghe Esia, ma na ghi kpa. Aristakọs ne Ovbi e Masẹdonia, nọ ke Tẹsalonaika rre keghi deba ima. 3 Ẹdẹ ghi gbe, ma na tuorre vbe Saidọn. E Juliọs keghi tohan e Pọl,* ọ na kue nọ ya miẹn avbe ọsiọre, ne iran mieke na gbaroghe ẹre.

4 Ma ghi ke evba la okọ kpa, ma na ghi gua okọ gha rrie ọkpẹn e Saiprọs, ne ẹhoho ghẹ mieke na mu okọ ọghe ima, rhunmwuda, eke ne ima mu uhunmwu daa, ẹre ẹhoho ke gha hoho rre. 5 Iyeke ọni, ma na ghi la adesẹ okun, ma na gberra e Silisia kevbe Pamfilia, ma na ya tuorre vbe eghute ọghe Maira nọ rre Lisia. 6 Ma ghi sẹ evba, ọkaolotu ivbiyokuo nii keghi miẹn okọ nọ ke Alẹkzandria rre, nọ rrie Itali, ọ na we ne ima laọ. 7 Ikpẹdẹ nibun ẹre ima ya fẹko gha gua okọ khian; te ọ baa kua ma ke do sẹ e Kọnaidọs. Rhunmwuda ne ẹhoho ma na gi ima gberra evba, ma na ghi gua okọ gha rrie ọkpẹn e Krit, nọ sikẹ e Salmoni, ne ẹhoho ghẹ mieke na mu okọ ọghe ima. 8 Ma ghi sẹtin gua okọ la okhiẹ okun, ma na do sẹ eke ọkpa na tie ẹre Eghute Nọ Maan, nọ ma rree gbe ne ẹvbo na tie ẹre Lesia. Sokpan, ọ ma zẹdẹ gha khuẹrhẹ, ma ke sẹ evba.

9 Ma wa kpẹẹ vba, na kha na, ẹghẹ na ya mu awẹ ọghe Ẹdẹ Erinmwian gberra nẹ, a gha gua okọ vbe ẹghẹ na, ọ sẹtin zẹ ẹbe. Ẹre Pọl na ghi bu iran ude, 10 ọ na tama iran wẹẹ: “Iho mwa, I bẹghe ẹre wẹẹ, okhian na gha wa zẹ ẹbe, emwi nibun gha wii ima, okọ na kevbe ihẹ ne ima mu sẹtin wii ima, ma tobọ ima sẹtin vbe lae.” 11 Sokpan, ẹmwẹ ne ọka oziguẹ kevbe ọmwa nọ yan okọ tae, ẹre ọkaolotu ivbiyokuo nii rhie re, ọ ma rhie ọghe Pọl. 12 Ugbẹnvbe a miẹn wẹẹ, eke ne avbe okọ mudia yi, ne iran ghaa ye nii, keghi re ehe nẹi gia dia vbe ẹghẹ oni,* emwa nibun sẹ vbe okọ nii keghi zẹ ọre vbe iro, ne iran gua okọ kpa vbe evba, ne iran ghee ẹre deghẹ iran gha sẹtin sẹ e Finiks, ne iran ya dia evba ya vbe ẹghẹ oni. Ọni ọre eke ne okọ na mudia vbe Krit, nọ mu aro daa odẹ ekẹn.*

13 Vbe ẹhoho ne wẹẹ ghi hoho ke odẹ ahọ* rre, iran na te gha roro ẹre wẹẹ, iran gha sẹtin ru vbene iran khare, iran keghi rhunmwuda ọni kie adẹn ne iran ya mu okọ mudia, iran na suẹn gha gua okọ lele okhiẹ okun khian vbe Krit. 14 Sokpan, vbọ ma he kpẹẹ vba, okpẹhoho na tie ẹre Yurroakuilo* keghi la. 15 Rhunmwuda ne okpẹhoho nii na mu okọ ọghe ima, ma ma ghi sẹtin gua okọ nii ghee eke ne ẹhoho ke hoho rre, ẹre ima na ghi wa zẹ ọre obọ, ne ẹhoho gha muẹn khian. 16 Ma na ghi zẹgiẹ gua okọ gha rrie otọ ọkpa nekherhe ne amẹ lẹga na tie ẹre Kọda, ne okọ nii ghẹ ya ni. A ye ta ena ta na, te a ru egbe, ma ke sẹtin gha dia okọ nekherhe* ne ima si dee vbe iyeke. 17 Iran ghi si okọ nekherhe nii la uwu okọ nẹ, iran keghi ya irri gbalọ okọ ne ima ghaa ye gbain; iran na fannọ irri na ya dee ukpọn nọ yevbe ifuẹn okọ, ne iran ghẹ ya lẹẹ la uzekhae vbe Siẹtis,* erriọ ẹre ẹhoho ya fẹko gha mu okọ ọghe ima khian. 18 Okpẹhoho nii na ye gha mu okọ ọghe ima yo muẹn rre, rhunmwuda ọni, ẹdẹ ghi gbe, iran na suẹn gha filo emwi ni rre uwu okọ ku okun, ne okọ nii mieke na ye hoghaa. 19 Vbọ ghi rre ikpẹdẹ nogieha, iran keghi ya obọ iran filo emwi eso na ya kun okọ nii fi uwu okun.

20 Vbe ikpẹdẹ nibun, ma ma bẹghe ovẹn ra orhọnmwẹ, na kha na, obọ da ima, rhunmwuda okpẹhoho nọ ghaa la, rhunmwuda ọni, a ma ghi miẹn ọmwa rhọkpa nọ ya aro yọ wẹẹ ima gha miẹn uhunmwu. 21 Vbe iran ghi zẹ khian, vbene iran ma na rri evbare, e Pọl keghi mudia vbe uwu ẹbu iran, ọ na wẹẹ: “Iho mwa, te uwa gha te rhie ẹmwẹ ne I tae. Akpawẹ uwa ma gua okọ kpa hin e Krit rre, ma i ghẹ te gha rri oya ne ima re na, emwi nọ wii ima i ghẹ te vbe wii ima. 22 Sokpan, vbene ọ ghi ye na nian, wa lahọ, wa si orhiọn koko, rhunmwuda, ọkpa i rrọọ vbe uwu uwa nẹi khian miẹn uhunmwu, vbọ gberra okọ na nọ khian guọghua. 23 Vbe ne asọn, odibo ọghe Osanobua mwẹ ne I rhie ugamwẹ nọhuanrẹn na, keghi gu mwẹ mudia, 24 ọ na tama mwẹ wẹẹ: ‘Ghẹ gi ohan mu ruẹ Pọl. Ẹ i mwẹ u ma ya mudia vbe odaro e Siza. Deba ọni, Osanobua gha rhunmwuda ruẹ miẹn emwa hia ne uwa gba rre okọ na fan.’ 25 Rhunmwuda ọni, iho mwa, wa si orhiọn koko, rhunmwuda, I mu ẹtin yan Osanobua wẹẹ, vbene ọ khare, erriọ ẹre ọ khian gha ye. 26 Vbọrhirhighayehẹ, ẹ i mwẹ ne ẹhoho ghẹ kpolo ima gha rrie otọ ọkpa ne amẹ lẹga.”

27 Vbe asọn nogie iwenẹ (14), ẹhoho na ye gha bi ima yo bi ima rre vbe Okun Edria. Vbọ ghi rre ogiasọn, avbe oziguẹ na te gha roro ẹre wẹẹ, iran sikẹ oke nẹ. 28 Iran keghi dee emwi ye irri ya mwa vbene okun nii dinmwi sẹ hẹ, iran na miẹn wẹẹ ibata iyehan (120)* nọ. Iran ghi vbe sikẹ odaro kherhe, iran na werriegbe mwa rẹn, iran keghi miẹn wẹẹ ibata ekigbesiyisẹn (90)* nọ. 29 Afianma kegha fian iran wẹẹ, okọ ọghe ima gha ya dekun avbe okuta ni kọnkọn, iran keghi rhunmwuda ọni ke iyeke okọ viọ adẹn na ya mu okọ mudia ku uwu okun; ne ẹdẹ ghi gbe, ẹre iran ghi gha ye. 30 Avbe oziguẹ keghi suẹn gha mu okọ nekherhe tuorre, ne iran muẹn fi uwu okun, iran na ba ru vbene a miẹn wẹẹ, te iran khian ke odaro okọ viọ adẹn na ya mu okọ mudia ku uwu okun, sokpan, te iran khian te lẹẹ fua vbe okọ nii. 31 Ẹre Pọl na ghi tama ọkaolotu ivbiyokuo kevbe ivbiyokuo ni rre evba wẹẹ: “Avbe oziguẹ na gha kpa hin okọ na rre, wa i khian sẹtin miẹn uhunmwu.” 32 Rhunmwuda ọni, ivbiyokuo nii keghi giagia irri na ya dee okọ nekherhe nii kua, iran na sẹrae nọ de fua.

33 Ọ ghi bu ẹghẹ ne ẹdẹ khian ya gbe, e Pọl keghi tama iran hia ne iran rri evbare, ọ na wẹẹ: “Ẹrẹna ẹre ọ gba vbe ikpẹdẹ iwenẹ (14), ne uwa ke rhie aro ye odẹ gha khẹ deghẹ emwi hia gha dunna, wa ma he ya evbare rhọkpa kaan unu hiehie. 34 Wa lahọ, wa rri evbare, ne emwi rhọkpa ghẹ ru uwa, rhunmwuda, ọkpa i rrọọ vbe uwu uwa, ne ikpẹ eto nọ rre ọre uhunmwu khian wii.” 35 Ọ ghi ta ẹmwẹ na nẹ, ọ na mu ebrẹd, ọ na sirra iran hia kpọnmwẹ Osanobua, ọ na bunnọ ọnrẹn, ọ na suẹn gha rriọẹ. 36 Orhiọn keghi la iran hia iwu, iran na vbe suẹn gha rri evbare. 37 Ma hia ni ghaa rre okọ nii kegha re orhunmwu enẹ i rrọọ vbe iyenẹ nọ ya yan uri (276). 38 Iran ghi re ne ẹko vuọn nẹ, iran keghi filo e wit ne iran mwẹ vbe uwu okọ nii ku uwu okun, ne okọ nii mieke na ye hoghaa.

39 Ẹdẹ ghi wan nẹ, iran keghi miẹn eghute ọkpa, iran ma rẹn eghute nọ khin; sokpan, iran keghi bẹghe ovbi ako ọkpa ne otọ lẹga vbe okun nii,* ekhae keghi vuọn otọ nii, iran na wẹẹ iran gha mu okọ mudia vba deghẹ iran gha sẹtin. 40 Iran keghi rhunmwuda ọni giagia irri ọghe adẹn na ya mu okọ mudia, iran na sẹ avbe adẹn nii rae ye uwu amẹ. Iran na vbe fannọ irri na ya gbalọ obele mu okọ, iran keghi tọẹn mu ighẹ ukpọn ne ẹhoho ya mu okọ khian nọ rre odaro okọ, ne ẹhoho mieke na bi okọ nii gha rrie eghute. 41 Vbe iran ghi dekun uzekhae ne amẹ kpe ye efọnkpa, odaro okọ nii na ziẹn, iran ma ghi sẹtin gberra evba. Ogbigbi amẹ ne ẹhoho bi dee, keghi suẹn gha bannọ iyeke okọ nii kua. 42 Ẹre ivbiyokuo na wẹẹ iran gha wa gbele avbe oleghan ni rre okọ nii rua, ne iran ghẹ mieke na san fi uwu amẹ, ne iran lẹẹ fua. 43 Sokpan, ọkaolotu ivbiyokuo nii tae nẹ wẹẹ, irẹn i khian kue ne emwi rhọkpa ru e Pọl, rhunmwuda ọni, ọ ma ghi gi ivbiyokuo nii ru emwi nọ rre iran ekhọe. Ọ na ghi we ne emwa hia ni gua khuẹ san fi uwu okun, ne iran ka khuẹ ladian oke, 44 iran nikẹre ghi lele iran, eso ghi sikan mu ekpatako,* eso ghi vbe sikan mu abọ eso nọ yannọ kua vbe nene okọ. Erriọ ẹre ima ghi ru ẹre, ma hia na ghi miẹn uhunmwu ya sẹ oke.