Nogieva Ọghe Jọn
1 Mẹ ne enọwanrẹn* ẹre ọ gbẹn ebe na gie okhuo na hannọ zẹ kevbe ivbi ẹre ne I ya ekhọe hia hoẹmwẹ ọnrẹn, sokpan, ẹ i re imẹ ọkpa, emwa hia ni ghi rẹn ẹmwata nẹ vbe hoẹmwẹ iran, 2 rhunmwuda ẹmwata nọ rre uwu ima, kevbe nọ khian gha gu ima rrọọ ya sẹ etẹbitẹ. 3 Te ima khian gha mwẹ ẹse ne kpataki,* itohan, kevbe ọfunmwegbe nọ ke obọ Osanobua ne Evbavba kevbe Jesu Kristi ne Ovbi Evbavba rre, deba ẹmwata kevbe ahoẹmwọmwa.
4 Ọyẹnmwẹ wa kakabọ sẹ mwẹ rhunmwuda, I bẹghe ẹre wẹẹ, ivbuẹ eso wa lele odẹ ẹmwata khian zẹvbe ne Evbavba yi ẹre iyi ne ima. 5 Okhuo na hannọ zẹ, lahọ, I hoo ne ima hia hoẹmwẹ egbe. (Ẹ i re te I gbe uhi ọgbọn nuẹn vbe ebe ne I gbẹn guẹ na, sokpan, uhi na ka rre otọ nẹ ke otọ gha dee.) 6 Emwi na ya ahoẹmwọmwa kha, ọre ne ima gha lele uhi nọ yi ne ima. Zẹvbe ne uwa họẹn ke otọ gha dee, uhi nii ọre ne uwa gha rhie ahoẹmwọmwa ma vbe ẹghẹ hia. 7 Rhunmwuda, emwa nibun ni mu emwa rẹrẹ la uwu agbọn nẹ, iran na ma yayi wẹẹ, Jesu Kristi rrie agbọn na zẹvbe ọmwa nagbọn. Ọna ọre nene ọmwa erẹrẹ kevbe oghian e Kristi.
8 Wa gha begbe, ne uwa ghẹ mieke na muẹn fua ighẹ emwi ne ima winna yi nẹ, na mieke na san uwa ẹse vbene ọ khẹke. 9 Ọmwaikọmwa nọ rhie owẹ gberra emwi ne Kristi ma ima ẹre, ọ na ya gha zẹ ọghe obọ ẹre ru, ọmwa nii i gu Osanobua rrọọ vbe akugbe. Sokpan, ọmwa nọ rhie owẹ lele imamwaemwi na, ọre ọmwa nọ gu Evbavba kevbe Ovbi ẹre rrọọ vbe akugbe. 10 Adeghẹ ọmwaikọmwa na bu uwa rre do gha ma uwa emwi nọ lughaẹn ne imamwaemwi na, wa ghẹ gi ẹre la uwa owa, wa ghẹ kue vbe tuẹ ọre. 11 Rhunmwuda, ọmwa nọ tuẹ ọre, gu ẹre mwẹ obọ vbe emwi dan nọ ru.
12 I te mwẹ emwi nibun ne I hoo ne I tama uwa, sokpan, I ma hoo ne I gbẹn ọnrẹn ye ebe rhie gie uwa. I mwẹ ọnrẹn vbe ekhọe wẹẹ I gha do miẹn uwa, ne I do tobọ mwẹ gu uwa guan ghee mwẹ ghee ruẹ, ne uwa mieke na kakabọ gha sọyẹnmwẹ.
13 Ivbi ọtuẹn nokhuo nọ re ọmwa na hannọ zẹ, gie na tuọ.