Ebe Mak

5 Vbe iyeke ọni, iran keghi sẹ obọ nọkpa ọghe okun, vbe ikinkin ọghe Gẹrasa. 2 Vbe Jesu ghi wa ladian vbe uwu okọ, okpia ọkpa ne orhiọn dan* loo, nọ ladian vbe ọkpẹn avbe uvun okuta ni rre itẹ, keghi vba e Jesu. 3 Itẹ ẹre ọ ghaa dia; ọ te do sẹ ẹghẹ nii, a ma miẹn ọmwa nọ sẹtin muẹn gba, a ma kue miẹn ọmwa nọ sẹtin ya ọgiọrọ gbalọe mu fi otọ. 4 Ẹ i re avbiẹ inugba ẹre emwa te ya igaza* kevbe ọgiọrọ rrọ ọre, sokpan, ọ ghi giagia ọgiọrọ nii, ọ ghi vbe guọghọ igaza nii hẹ kua; a ma miẹn ọmwa rhọkpa nọ sẹtin ẹnrẹn. 5 Ẹghẹ hia, ke asọn ke avan, ẹre ọ ya gha so ladian vbe uwu itẹ kevbe uhunmwu oke, ọ ghi gha ya okuta valọ egbe ẹre. 6 Sokpan, ọ ghi bẹghe Jesu vbe urria, ọ keghi rhulẹ bu ẹre, ọ na gbe uhunmwu kotọ nẹẹn. 7 Vbe iyeke ọni, ọ keghi rhie so, ọ na wẹẹ: “Vbọ kaan mwẹ kaan ruẹ, Jesu ne Ovbi Osanobua Nọ Yo Sẹ? Yan ma mwẹ vbe odaro Osanobua wẹẹ, u i khian rriọ mwẹ oya.” 8 Te ọ ta ẹmwẹ na, rhunmwuda ne Jesu na gha tama rẹn wẹẹ: “Wẹ ne orhiọn dan,* ladian vbe egbe okpia na rre.” 9 Sokpan, Jesu na nọ rẹn wẹẹ: “Vba tie ruẹ?” Ọ keghi wanniẹn ọnrẹn wẹẹ: “Eni mwẹ ọre Oghẹn,* rhunmwuda, ma wa bun.” 10 Ọ na gha rinmwian e Jesu, nẹ ghẹ khulo avbe orhiọn dan nii hin otọ ẹvbo nii rre.

11 Vbe ẹghẹ na kha na, oghẹn elẹdẹ kegha rri evbare vbe uhunmwu oke nọ rre evba. 12 Ẹre avbe orhiọn dan nii na gha rinmwiaẹn, iran na tama rẹn wẹẹ: “Lahọ, gi ima la uwu avbe elẹdẹ nii.” 13 Ẹre ọ na we ne iran gha khian. Ẹre avbe orhiọn dan* nii na ladian, iran na la uwu avbe elẹdẹ nii, oghẹn elẹdẹ nii hia na ghi khọn gha rrie eke ne oke na han, iran na ke evba kharha ku uwu okun; avbe elẹdẹ ni wulo ye uwu okun, rrie odẹ arriaisẹn vbe ihe eva (2,000). 14 Sokpan, emwa ni gbaroghe avbe elẹdẹ nii keghi lẹẹ fua, iran na ya na iyẹn na vbe orere ẹvbo kevbe ikinkin nii. Ẹre emwa na gha dee, ne iran do ya aro iran bẹghe emwi nọ sunu. 15 Iran keghi bu e Jesu gha dee, iran ghi rre, iran na miẹn okpia nii ne orhiọn dan te gha loo, ọni ọre okpia nii ne oghẹn ọghe avbe orhiọn dan te rre ọre egbe. Nene okpia na tota, na kha na, ọ hẹ ukpọn yọ, aro vbe hian rẹn; iran ghi miẹn ọnrẹn, ohan na suẹn gha mu iran. 16 Deba ọni, emwa ne aro iran sẹ emwi nọ sunu, keghi tama iran emwi hia nọ sunu daa okpia nii ne orhiọn dan te loo kevbe avbe elẹdẹ nii. 17 Rhunmwuda ọni, iran na suẹn gha rinmwian e Jesu nọ kpa hin ikinkin ọghe iran rre.

18 Jesu khian ghi la okọ kpa, okpia nii ne orhiọn dan te ka gha loo, keghi rinmwian e Jesu wẹẹ, irẹn hoo ne irẹn lelẹe. 19 Vbọrhirhighayehẹ, Jesu ma kue, sokpan, ọ na tama rẹn wẹẹ: “Bu ẹgbẹe ruẹ gha rrie owa, ne u ya tama iran emwi hia ne Jehova* ru nuẹn kevbe itohan nọ mwẹ ghee ruẹ.” 20 Okpia nii keghi kpa, ọ na suẹn gha yae wewe khian vbe Dikapolis,* emwi hia ne Jesu ru ne irẹn; ọ keghi yan emwa hia ni họẹn unu ruan.

21 Vbe Jesu ghi werriegbe ya okọ fian okun rra gha rrie obọ nọkpa, emwa nibun keghi si koko ye eke nọ ye vbe ọkpẹn okun. 22 Okpia ọkpa na tie ẹre Jerọs, nọ re ọkpa vbe usun iran ni rre ukpo ọdakha vbe sinagọg* keghi rre, ọ ghi bẹghe Jesu, ọ na fan fi iguẹ* vbe akharha ẹre. 23 Ẹ i re avbiẹ inugba ẹre ọ rinmwiaẹn, ọ na gha tama rẹn wẹẹ: “Ovbi mwẹ nokhuo wa kakabọ khuọnmwi.* Lahọ, do ya obọ kaan rẹn, ne egbe mieke na rran rẹn, nẹ ghẹ wu.” 24 Rhunmwuda ọni, Jesu keghi lelẹe. Emwa nibun na vbe bi lele Jesu, iran na gha ya egbe wiẹn ọnrẹn zẹvbe ne iran ya bi lelẹe khian.

25 Ọ ghaa mwẹ okhuo ọkpa ne esagiẹn ghaa tue; ukpo iweva (12) ẹre ọ ye, ne okhuo na ke khuọnmwi emianmwẹ na. 26 Ọ rri oya nẹ vbe obọ avbe ọbo nibun;* emwi hia nọ mwẹ ẹre ọ he zẹ ye emianmwẹ na, sokpan, ọ ma gba ẹre, te ọ ghi kue tua yọ. 27 Vbe okhuo nii ghi họn okhekhe ọghe Jesu, ọ na la uwu ẹbu, ọ na ke iyeke ya obọ kaan ẹwu nọ yọ ke odukhunmwu, 28 rhunmwuda, okhuo na kegha kha wẹẹ: “Ọ ghaa re ẹwu nọ yọ ke odukhunmwu ọkpa kẹkan, ẹre I wa sẹtin ya obọ kaan, egbe gha rran mwẹ.” 29 Vbe ọwara ọkpa nii, esagiẹn nọ tue ẹre na wa ka; okhuo nii na wa rẹn wẹẹ, emianmwẹ dan nii fo nẹ vbe egbe irẹn.

30 Vbe ọwara ọkpa nii, Jesu na wa rẹn wẹẹ, ẹtin eso kpa hin irẹn egbe rre; ọ ghi ghee emwa ni gbẹbu lẹga, ọ na nọ wẹẹ: “Gha ya obọ kaan mwẹ ukpọn?”* 31 Sokpan, erhuanegbe ẹre na tama rẹn wẹẹ: “Wẹ miẹn vbene emwa ma rhu ruẹ hẹ, vbọzẹ ne u na ye nọ wẹẹ, ‘Gha ya obọ kaan mwẹ?’” 32 Sokpan, ọ na gha ya aro gualọ ọmwa nọ ru ẹre. 33 Ohan na suẹn gha mu okhuo nii, ọ na vbe gha guọ zẹzẹzẹ, rhunmwuda, okhuo nii rẹn emwi nọ sunu vbe egbe ẹre; ọ na ghi ladian, ọ na fan fi iguẹ* vbe odaro e Jesu, ọ na ta emwi hia ma rẹn. 34 Jesu na tama rẹn wẹẹ: “Ovbi mwẹ, amuẹtinyan ruẹ mu ruẹ egbe rran nẹ. Gha khian, ọfunmwegbe gu ruẹ rrọọ. Emianmwẹ dan ne u khuọnmwi fo nẹ.”

35 Vbe ọ wa ye guan nii, ikpia eso keghi rre; owa okpia nii nọ rre ukpo ọdakha vbe sinagọg* ẹre iran ke rre. Iran na tama okpia nii wẹẹ: “Ovbuẹ nokhuo wu nẹ! De emwi ne u ye kpokpo Ọmamwaemwi ba?” 36 Sokpan, ẹmwẹ na keghi fi la e Jesu ehọ, ọ na ghi tama okpia nii nọ rre ukpo ọdakha vbe sinagọg* wẹẹ: “Ghẹ fian afianma,* sokpan, wa gha mwẹ amuẹtinyan.” 37 Jesu ma kue ne ọmwa rhọkpa lele irẹn, vbọ gberra e Pita, e Jems kevbe Jọn ne ọtiẹn e Jems.

38 Vbe iran ghi sẹ owa okpia nii nọ rre ukpo ọdakha vbe sinagọg,* Jesu keghi bẹghe emwa hia ni gbe owogho, eso viẹ, eso na gha go. 39 Ọ ghi la uwu owa, ọ na tama iran wẹẹ: “Vbọzẹ ne uwa na viẹ, ne uwa na vbe gbe owogho? Ọmọ na ma wu, sokpan, te ọ vbiẹ.” 40 Vbe ọ ghi ta ẹmwẹ na, iran na suẹn gha giẹ ọre. Sokpan, ọ ghi tama iran hia nẹ, ne iran ladian, ọ na rhie erha ọmọ nii kevbe iye ọmọ nii lele egbe, kẹ kevbe emwa ni lelẹe rre, ọ na gha rrie ehe ne ọmọ nii ye. 41 Ọ na rhie ọmọ nii obọ, ọ na tama rẹn wẹẹ: “Talita kumi,” emwi na yae kha vbe a gha zedu ẹre, ọre: “Ọmokhuo, I tama ruẹ nian, kpaegbe!” 42 Vbe ọwara ọkpa nii, nene ọmokhuo keghi kpaegbe, ọ na suẹn gha khian yo khian rre. (Ukpo iweva [12] ẹre ọmokhuo na ghaa ye.) Iran ghi bẹghe emwi nọ sunu na, iran ma sẹtin ghọghọ! 43 Sokpan, ọ na tama iran yan egbe yan egbe,* ne iran ghẹ gi ọmwa rhọkpa rẹn emwi nọ sunu na. Vbe iyeke ọni, ọ na we ne iran rhie evbare ne ọmokhuo nii.