Ebe Mak
14 Ikpẹdẹ eva ẹre ọ ghi kẹ na do ugie Alagberra kevbe Ugie Ebrẹd Na Ma Ya Eyist Ru. Avbe ọkaolotu ohẹn kevbe avbe skraib* kegha gualọ odẹ ne iran khian ya ya ẹkẹ vbe ero* mu e Jesu, ne iran gbe ẹre rua; 2 sokpan, iran na gha kha wẹẹ: “Ọ ma khẹke ne ima ru ẹre vbe ẹghẹ na ya do ugie; ọna sẹtin si olighi ye ẹvbo.”
3 Vbe Jesu ghi rri evbare* vbe owa e Saimọn ne ọkhọnmwọ oti vbe Bẹtani, okhuo ọkpa keghi mu ovbi akhe alabasta* rre. Ori ighobioye nọ winhin na ya e nad nọ maan ru, ẹre ọ ghaa rre uwu ẹre; ọ keghi kie akhe alabasta nii, ọ na suẹn gha tue ori nọ rrọọ yan e Jesu uhunmwu. 4 Ohu keghi mu emwa eso ni rre evba, iran na gha tama egbe iran wẹẹ: “Vbọzẹ nọ na wa mu ori nọ winhin na rhia vbenian? 5 Igho na gha te ya khiẹn ori nọ winhin na, gha gberra e dinariọs* iyisẹn eha (300), vbe iyeke ọni, a ghi ghae igho na miẹn vbọ ne ivbiogue!” Ohu okhuo nii kegha mu iran ẹsẹse.* 6 Sokpan, Jesu keghi kha wẹẹ: “Wa zẹ okhuo na obọ vbe ẹkun. De emwi ne uwa ghi kpokpo ẹre ba na? Emwi esi ẹre ọ ru mẹ. 7 Rhunmwuda, ẹghẹ hia ẹre ivbiogue khian ya gha rre uwu ẹbu uwa; wa gha sẹtin ru emwi nọ maan ne iran, vbe ẹghẹ ne uwa rhirhi gha hoo. Sokpan, ẹ i re ẹghẹ hia, ẹre imẹ khian ya gha gu uwa rrọọ. 8 Emwi ne okhuo na gha sẹtin ru, ẹre ọ ru; te ọ tue ori nọ winhin na yọ mwẹ egbe, nọ ya mu mwẹ egbe yotọ khẹ irorinmwi mwẹ. 9 Ne I ta ẹmwata ma uwa, ehe ke ehe na na kporhu iyẹn nọ maan vbe uhunmwu otagbọn hia, te a khian gha ta emwi ne okhuo na ru, na ya gha ye ẹre rre.”
10 E Judas Iskariọt nọ re ọkpa vbe uwu iran Iweva nii, keghi bu avbe ọkaolotu ohẹn gha khian nọ mieke na mu e Jesu ye iran obọ. 11 Iran ghi họn ẹmwẹ na, iran na ghọghua, iran na tama rẹn wẹẹ, iran gha viọ igho esiliva nẹẹn. Rhunmwuda ọni, ọ na suẹn gha gualọ ẹghẹ nọ khian ya mu e Jesu ye iran obọ.
12 Vbe ikpẹdẹ nokaro ọghe ugie Ebrẹd Na Ma Ya Eyist Ru, vbe ẹdẹ na zọ ese ugie Alagberra, erhuanegbe Jesu keghi bu ẹre gha dee, iran na nọ rẹn wẹẹ: “De eke ne u hoo ne ima ya mwamwa khẹ ruẹ, ne u khian na rri evbare Alagberra?” 13 Ẹre ọ na ghi gie eva vbe erhuanegbe ẹre, ọ na tama iran wẹẹ: “Wa gha rrie orere ẹvbo, okpia ọkpa nọ mu akhe amẹ mwẹ gha do vba uwa. Wa ghi lelẹe, 14 owa ke owa nọ la re, wa ghi tama ọdafẹn nọ yan owa nii wẹẹ, ‘Ọmamwaemwi we ne ima nọ ruẹ wẹẹ: “De eke ne ughugha ne erhunmwuyẹn dia ye, ne imẹ vbe erhuanegbe mwẹ mieke na rri evbare Alagberra vba?”’ 15 Ọ gha ma uwa ughugha nọkhua ọkpa nọ rre odukhunmwu vbe egedege, a mwamwaẹn yotọ nẹ. Wa ru emwamwa Alagberra yotọ khẹ ima vba.” 16 Erhuanegbe ẹre na gele gha khian, iran ghi la ẹvbo nii, iran na wa miẹn emwi hia vbene Jesu wa ya tama iran, ẹre iran na mu egbe yotọ khẹ ugie Alagberra.
17 Ọ ghi sẹ ẹghẹ ota, irẹn vbe iran Iweva nii na rre. 18 Zẹvbe ne iran ya tota ga eteburu gha rri evbare, Jesu na kha wẹẹ: “Ne I ta ẹmwata ma uwa, ọkpa vbe uwu uwa, nọ gu mwẹ rri evbare gha ya mwẹ dẹ.” 19 Ẹmwẹ na keghi wa gbe iran egbe, ẹre ọkpọkpa vbe uwu iran na ghi suẹn gha nọ rẹn wẹẹ: “I yayi wẹẹ ẹ i re imẹ?” 20 Ọ na tama iran wẹẹ: “Ọkpa vbe uwu uwa ne Iweva nọ, ọmwa nii, ne ima gba fi obọ ye ọkpan ọkpa. 21 Ovbi ọmwa gha wu, zẹvbe na gbẹn ọnrẹn yotọ vbekpa ẹre, sokpan, ọ da mwẹ ne okpia nii nọ khian ya Ovbi ọmwa dẹ! Ọ gha te wa maan sẹ, akpawẹ a ma zẹdẹ biẹ ọre!”
22 Vbe iran ye rri evbare, ọ keghi mu ebrẹd ọkpa; ọ na erhunmwu,* ọ na vbe bunnọ ọnrẹn. Ọ keghi viọ ọre ne iran, ọ na wẹẹ: “Wa miẹn; ọna mudia ye ihe egbe mwẹ.” 23 Ọ ghi vbe mu ukpu, ọ na kpọnmwẹ Osanobua, ọ na muẹn ne iran, iran hia na wọn vbọ. 24 Ọ keghi tama iran wẹẹ: “Ọna mudia ye ihe esagiẹn mwẹ, nọ re ‘esagiẹn ọghe ile,’ na khian da kua ne emwa nibun. 25 Ne I ta ẹmwata ma uwa, I i khian ghi dọlegbe da vbe ayọn na hiehie, ọ te sẹ ẹdẹ ne ẹdẹrriọ, ne I khian ya da ọghe ọgbọn vbe Arriọba Osanobua.” 26 Vbe iran ghi so ihuan urhomwẹ* nẹ, iran na kpa gha rrie uhunmwu Oke Ọliv.
27 Jesu na ghi tama iran wẹẹ: “Wa hia fẹẹrẹ gha rrua owẹ,* rhunmwuda, a gbẹn ọnrẹn yotọ wẹẹ: ‘I gha gbe ọsuohuan rua, avbe ohuan ọghẹe ghi zagha kua.’ 28 Sokpan, a gha ghi huẹn mwẹ kpaegbe nẹ, I gha ke odaro ne uwa gha rrie Galili.” 29 Sokpan, e Pita keghi tama rẹn wẹẹ: “Ọ gha khọnrẹn ne iran hia nikẹre rrua owẹ,* mẹ i khian rrua owẹ.”* 30 Jesu na ghi tama rẹn wẹẹ: “Ne I ta ẹmwata ma ruẹ, vbe asọn vbe ẹrẹna, a te miẹn wẹẹ ọkpa viẹ igba eva, u gha siẹn mwẹ igba eha.” 31 Sokpan, e Pita na ye tua unu muẹn gha kha wẹẹ: “Ọ gha khọnrẹn wẹẹ te I khian wu leluẹ, I i khian siẹn ruẹ hiehie.” Erhuanegbe ẹre hia nikẹre na vbe suẹn gha ta ẹmwẹ na.
32 Iran ghi sẹ eke ọkpa na tie ẹre Gẹtsẹmani, ọ na tama erhuanegbe ẹre wẹẹ: “Wa tota mwa na, mẹ khian ya na erhunmwu.” 33 Ọ keghi rhie Pita, e Jems kevbe Jọn lele egbe, egbe hia na suẹn gha manọ ọnrẹn, orhiọn rẹn ma ghi sotọ. 34 Ọ na tama iran wẹẹ: “Te iro khian ghi gbe mwẹ ruan. Wa gha rre emwa, ne uwa gha bodẹ.” 35 Ọ ghi sikẹ odaro kherhe, ọ na viọ iguẹ ye otọ, ọ na ghi suẹn gha na erhunmwu wẹẹ, deghẹ ọ gha gia ru, ne ẹghẹ nii la irẹn ban. 36 Ọ keghi kha wẹẹ: “Abba,* Evbavba, a i miẹn emwi ne u i sẹtin ru; lahọ miẹn mwẹ ukpu na. Ọrheyerriọ, ẹ i re vbene I gualọe yi, sokpan, vbene uwẹ gualọe yi.” 37 Ọ ghi werriegbe rre, ọ na do vba iran vbe iran vbiẹ, ọ na ghi tama e Pita wẹẹ: “Saimọn, te uwẹ vbiẹ ra? U ma vbe miẹn orhiọn ya bodẹ la ughaẹdẹ* ọkpa kẹkan? 38 Wa gha bodẹ, ne uwa ye gha na erhunmwu, ne uwa ghẹ mieke na de ye edanmwẹ. Ẹmwata nọ rrọọ ọre wẹẹ, orhiọn te hoo, sokpan, egbe vburriẹ.” 39 Ọ na werriegbe kpa ya na erhunmwu; ọ na werriegbe na erhunmwu nọ ka na. 40 Ọ ghi werriegbe rre, ọ na vbe do vba iran vbe iran vbiẹ, na kha na, ovbe wa ye rre iran aro; rhunmwuda ọni, iran ma ghi rẹn emwi ne iran khian tama rẹn. 41 Ọ ghi werriegbe rre vbe ukpogieha, ọ na tama iran wẹẹ: “Vbene ẹghẹ khare na, te uwa ye gbe ẹkun sotọ gha vbiẹ! Ọ sẹ! Ẹghẹ sẹ nẹ nian! Ghee ẹre! Te a khian mu Ovbi ọmwa ye obọ emwa orukhọ na. 42 Wa kpaegbe, ne uwa gia kpa. Ghee ẹre! Ọmwa nọ khian ya mwẹ dẹ sikẹ ima nẹ.”
43 Vbe ọwara ọkpa nii, vbe Jesu ye guan, e Judas nọ re ọkpa vbe uwu iran ne Iweva, na wa rre, ke irẹn kevbe emwa nibun ni viọ umozo kevbe ukpokpo mwẹ; avbe ọkaolotu ohẹn, avbe skraib* kevbe ediọn, ẹre ọ gie iran na rre. 44 Na kha na, ọmwa nọ yae dẹ ka rhie ama ne iran nẹ wẹẹ: “Ọmwaikọmwa ne I mu unu soso, wa ghi rẹn wẹẹ irẹn nọ, wa ghi muẹn; zẹvbe ne uwa ya muẹn khian, wa ghi rhie aro sotọ vbe egbe ẹre, nẹ ghẹ ya lẹẹ fua.” 45 Vbe ọwara ọkpa nii, ọ na wa khian bu e Jesu, ọ na wẹẹ: “Rabai!” ọ na fẹko mu unu soso ẹre. 46 Ẹre iran na ghi muẹn. 47 Sokpan, ọkpa vbe uwu iran ni mudia vba, na wa yuo umozo ọghẹe ladian, ọ na fian ehọ ọviẹn ọghe ogie ohẹn fua. 48 Jesu na ghi tama iran wẹẹ: “Oyi ẹre imẹ khin ra, ne uwa na viọ umozo kevbe ukpokpo mwẹ, ne uwa khian ya do mu mwẹ? 49 Ẹdẹgbegbe ẹre I ya gha gu uwa rre ọgua Osa gha ma emwa emwi, wa ma mu mwẹ vbe ẹghẹ nii. Ọrheyerriọ, te ena hia sunu, ne ẹmwẹ ne Ebe Nọhuanrẹn tae mieke na sẹ.”
50 Iran hia keghi sẹrae, iran na lẹẹ fua. 51 Vbọrhirhighayehẹ, ọ ghaa mwẹ igbama okpia ọkpa nọ suẹn gha lele Jesu khian, ukpọn e linẹn ọghe ighobioye* ọkpa kẹkan, ẹre ọ wa yọ gue egbe; iran na te vbe hia ne iran muẹn, 52 sokpan, ọ keghi ban ukpọn e linẹn nọ yọ fua, ọ na ya irhunmwirhun lẹẹ fua.*
53 Iran na ghi mu e Jesu gha rrie ọghe ogie ohẹn. Ẹre avbe ọkaolotu ohẹn hia, avbe ediọn kevbe avbe skraib* na si egbe koko. 54 Sokpan, e Pita na fẹko gha lelẹe khian vbe iyeke, sokpan, ọ ma sikẹ ọre gbe; ọ na ya lelẹe sẹ otọ ẹghodo ọghe ogie ohẹn. Ọ na tota ba eguọmwadia ni rre owa nii, ọ na gha ya egbe ẹre ghae erhẹn. 55 Avbe ọkaolotu ohẹn kevbe emwa hia ni rre iko e Sanhẹdrin* kegha gualọ osẹ ne iran khian sẹ gbe Jesu, ne iran mieke na gbe ẹre rua, sokpan, iran ma miẹn. 56 Emwa nibun te rre do sẹ osẹ ohoghe gbe ẹre, sokpan, osẹ ọghe iran ma gua egbe ro. 57 Deba ọni, emwa eso kegha kpaegbe, iran na gha sẹ osẹ ohoghe gbe ẹre, iran na wẹẹ: 58 “Ma họn vbe ọ khare wẹẹ, ‘Obọ ẹre a ya bọ ọgua Osa na, sokpan, I gha guọghọe sotọ, I ghi ya ikpẹdẹ eha bọ ọvbehe na ma ya obọ bọ.’” 59 A ye ta ena ta na, osẹ ọghe iran ma ye gua egbe ro.
60 Ẹre ogie ohẹn na gua kpaegbe vbe uwu ẹbu iran, ọ na nọ e Jesu wẹẹ: “Wẹ ma miẹn ẹmwẹ zẹ wanniẹn iran ra? Vbe ena khun ifiẹzọ ne avbe ikpia na ba ruẹ re na?” 61 Sokpan, ọ keghi hunwan, ọ ma zẹdẹ zẹ ẹmwẹ rhọkpa wanniẹn ọnrẹn. Ẹre ogie ohẹn na werriegbe suẹn gha nọ rẹn ọta, ọ na wẹẹ: “Wẹ ọre Kristi ne Ovbi Ọmwa Nii Na Fiangbe ra?” 62 Jesu na wẹẹ: “Mẹ nọ; wa gha vbe bẹghe Ovbi ọmwa vbe ọ gha tota ye obọ erha ọmwa ọghe Oghodua,* kevbe ọ ghaa dee, ke irẹn kevbe okuku nọ rre orere iso.” 63 Ẹre ogie ohẹn na sọọ ukpọn nọ yọ, ọ na wẹẹ: “De osẹ ọvbehe ne ima ye gualọ? 64 Wa họn vbe ọ ya unu ẹnrẹn rhoo.* Vbe uwa ghi we na ru ẹre hẹ?”* Iran hia na wẹẹ, te ọ khẹke nọ wu. 65 Eso na suẹn gha tu asẹn yan rẹn, iran na gue ẹre aro, iran na vbe gbe ẹre ekpa, iran na wẹẹ: “Adeghẹ akhasẹ ẹre u khin, tama ima ọmwa nọ fi ruẹ emwi!” Iran ghi gbe ubi ye ọre aro nẹ, avbe ukọ ni rre ekọtu na muẹn kpa.
66 Vbe Pita ghi rre otọ ẹghodo vbe ototọ, ọvbokhan okhuo ọkpa nọ re ọkpa vbe eguọmwadia ogie ohẹn keghi rre. 67 Ọ ghi bẹghe Pita, vbe ọ ya egbe ẹre ghae erhẹn, ọ na wa ziẹn aro ye ọre egbe, ọ na wẹẹ: “Wẹ vbe gha lele Jesu ne Ovbi e Nazarẹt khian.” 68 Sokpan, ọ keghi siẹn, ọ na wẹẹ: “I ma rẹn ọnrẹn. I ma vbe rẹn otọ emwi ne u guan kaẹn.” Ẹre ọ na ghi kpa gha rrie odẹ onurho. 69 Ọvbokhan okhuo nii keghi bẹghe ẹre vbe evba, ọ na werriegbe suẹn gha tama emwa ni mudia vba nii wẹẹ: “Ọkpa vbe uwu iran na khin.” 70 E Pita na werriegbe gha siẹn. Vbọ ma he vbe kpẹẹ vba, emwa ni mudia vba na werriegbe suẹn gha tama e Pita wẹẹ: “Vbene ẹmwata, ọkpa vbe uwu iran ẹre u khin, rhunmwuda, Ovbi e Galili ẹre u wa khin, a i vbe muan rẹn.” 71 Sokpan, ọ na suẹn gha vẹn ihẹn, ọ na wẹẹ: “I gha rẹn okpia na dandandan, ne I rri oya yọ!” 72 Vbe ọwara ọkpa nii, ọkpa keghi viẹ ukpogieva, ẹre Pita na ya ye ẹmwẹ ne Jesu tama rẹn rre, nọ na wẹẹ: “A te miẹn wẹẹ ọkpa viẹ igba eva, u gha siẹn mwẹ igba eha.” Ẹre Pita na sa eve rua, ọ na gele viẹ egbe ẹre rua.