ẸMWẸ NA YA MUẸN SO
OSANOBUA ẹre ọ dia emwa ni gbẹnnẹ emwi ni rre uwu Ebe Nọhuanrẹn; e Hibru, Aramaik kevbe Grik ẹre iran ya gbẹn ọnrẹn. Te ọ khẹke na zedu Ẹmwẹ Osanobua ghee ẹvbo ughughan ne emwa ghi zẹ nẹ, ne emwa ni ke “agbẹnvbo hia” rre mieke na miẹn ere vbọ. (Matiu 24:14) Ebe Matiu ya sẹ ebe Arhie Maan ẹre a tie ẹre “Ebe Nọhuanrẹn Na Ya E Grik Gbẹn,” rhunmwuda, e Grik ẹre a ka ya gbẹn ọnrẹn; Ivbi Otu e Kristi ni ghaa rrọọ vbe ẹghẹ ọghe avbe ukọ e Jesu, ẹre Osanobua loo ro ya gbẹn ọnrẹn. Ebe eha i rrọọ vbe ọgban (27) ẹre ọ rre abọ na.
Ukpo 1950 ọre ẹghẹ okaro na ya rhie Izedu Agbọn Ọgbọn Ọghe Ebe Nọhuanrẹn Na Ya E Grik Gbẹn ladian vbe Ebo. Ebe Nọhuanrẹn ọghe Grik ne emwa wa gele rẹn, ne Westcott kevbe Hort gbẹn ladian ẹre a mobọ gha ghee vbe a zedu e Baibol na; te ẹmwẹ ni rre Ebe Nọhuanrẹn ọghe Grik ne Westcott kevbe Hort gbẹn ladian wa guaẹro ighẹ ẹmwẹ ni rre Ebe Nọhuanrẹn ọghe Grik nẹdẹ na ya obọ gbẹnnẹ. Vbe a zedu Izedu Agbọn Ọgbọn, te a wa hia ẹsẹsẹmwẹse ne ẹmwẹ ni rre uwu ẹre guaẹro ighẹ vbene ọ wa gha ye vbe Ebe Nọhuanrẹn ọghe Grik nẹdẹ. Izedu Agbọn Ọgbọn ọghe Ebo nọ ladian vbe 2013 ẹre a ke zedu e Baibol Ẹdo na ladian, te a wa vbe hia ẹsẹsẹmwẹse ne ẹmwẹ ni rre uwu ẹre guaẹro ighẹ vbene ọ wa gha ye vbe Ebe Nọhuanrẹn ọghe Grik nẹdẹ. Emwi nọ wa rre ima ekhọe ke ẹghẹ gha dee, ọre ne ima zedu e Baibol, zẹvbe nọ wa gha ye vbe Ebe Nọhuanrẹn na ka wa gha gbẹn, ọ ghi vbe gha re na rherhe rẹn otọ re kevbe nẹi lọghọ na tie. Avbe uhunmwuta na ni rre Apẹndis ni khare wẹẹ, “Ilele Na Lele Vbe A Ghaa Zedu E Baibol”, “Emwi Eso Ni Rre Baibol Na Dọlegbe Zedu Ẹre Na”, kevbe “Vbene Baibol Ya Sẹ Ima Obọ Hẹ” keghi rhan otọ evbọzẹe ne ima na ru emwi eso ne ima ru vbe a zedu e Baibol na.
Igba eha i rrọọ vbe iyeva nọ ya yan iyisẹn vbe ihe eva (237) ẹre eni Osanobua nọ re Jehova ladian vbe Izedu Agbọn Ọgbọn Ọghe Ebe Nọhuanrẹn Na Ya E Grik Gbẹn; a ma ka enọ rre futnot ba ẹre. Emwi nọ si ẹre na na rhie eni e Jehova ye eke nọ khẹke nọ gha ye vbe Ebe Nọhuanrẹn na ọre wẹẹ, te ọ khẹke na kpe eni nii huan kevbe wẹẹ, ọ khẹke ne emwa hia datie eni nii, ne iran miehe na miẹn fan. (Matiu 6:9; Rom 10:13) Uhunmwuta na nọ rre Apẹndis, nọ khare wẹẹ, “Vbene A Ya Loo Eni Osanobua Vbe Ebe Nọhuanrẹn Na Ya E Grik Gbẹn”, rhan otọ emwi eso nọ si ẹre ne ima na loo eni e Jehova vbe Ebe Nọhuanrẹn Na Ya E Grik Gbẹn.
Emwi na gu tie Baibol na Izedu Agbọn Ọgbọn, ọre rhunmwuda ne Osanobua na wẹẹ irẹn gha ya agbọn ọgbọn fiangbe emwa nagbọn hia. (2 Pita 3:13) Emwa ni gele hoẹmwẹ Osanobua nọ yan Ebe Nọhuanrẹn ẹre ọ zedu e Baibol na, rhunmwuda ọni, iran ghee ẹre wẹẹ, emwi nọ bi ye iran egbe nọ rhunmwuda imuohan Osanobua ne iran mwẹ, ne iran hia vbene ẹtin iran sẹ, ne iran ya zedu ẹmwẹ Osanobua vbe odẹ nọ gbae. Erhunmwu ne ima na, ọre ne Baibol na ru iyobọ ne emwa ni ya ẹkoata tie ẹre, ni hia vbe odẹ ke odẹ ne iran “gha mwẹ irẹnmwi nọ gbae ọghe ẹmwata.”—1 Timoti 2:4.