INỌTA 3
De Vbene I Khian Ya Gu Evbibiẹ Mwẹ Guan Hẹ?
DE EMWI NE UWẸ GHA RU?
Ghee igiemwi na ghee: Ota ghaa nọ vbe ẹdẹ Wẹzde. E Geoff nọ rre ukpo 17 winna iwinna rẹn fo nẹ. Nia, ọ khian rọkhọ erhuan. Ọ rhu e TV, ọ na fẹko tota hẹkpẹẹ ye aga.
Vbe ọwara ọkpa nii, erhae na wa la owa, ọ wa suku aro rua ye uhunmwu.
“Geoffrey! Uwẹ wa tota mwa gha ghee TV. Ọna ọre iwinna ne I wẹẹ ne u gu ọtuẹn ru ra? Vbe uwẹ a na yenhọ hẹ vbenia!”
Geoff na gha guan ye uwu unu. Ọ na kha wẹẹ, “ẹrẹna vbe nọ rẹ.
Erhae na kha wẹẹ, “larre wẹ, vbua kha hẹ?”
E Geoff na wẹẹ “I ma ta emwi rhọkpa.” Ọ na gha gbe aro miomio.
Ohu na wa mu erhae. Ọ na ghi tama rẹn wẹẹ “Ghẹ gu mwẹ guan vbene u rhirhi miẹn.
Adeghẹ uwẹ ọre Geoff, de emwi ne u gha te ru ne ẹmwẹ na ghẹ si ẹzọ?
MUẸN RORO ẸSẸSẸMWẸSE!
Evbibiẹ ọmwa na gu guan keghi yevbe imọto na fi. Adeghẹ odẹ ọkpa na khui, u ghi gualọ odẹ ọvbehe.
VBE IGIEMWI:
Ovbialeke ọkpa na tiẹre Leah khare wẹẹ, “I ma zẹdẹ rẹn vbene I khian ya gha gu erha mwẹ guan hẹ, ugbẹnso I gha zẹ guẹ guan, ọ ghi wẹẹ, ‘lahọ ghẹ gui, te u sie gu mwẹ guan ban ra?’”
ỌKPA VBUWE EMWI EHA NA ẸRE LEAH GHA RU.
Ọ ghi van mu erhae.
Leah ghi van wẹẹ, “Oo, baba danmwehọ ighẹ ẹmwẹ agbọn ẹre I ta na!”
Ọ wa hẹwẹ. Ẹi ghi gu erhae guan.
Leah ma ghi hoo nọ werriegbe gu erhae guan vbekpa ọlọghọmwa ne irẹn ye.
Ọ ghi ziengbe khẹ ẹdẹ ọvbehe, ọ ke werriegbe mu ẹmwẹ nii rre.
Leah ghi fẹko tota gu erhae guan ra ọ ghi gbẹn elẹta giẹ nọ ya tama rẹn vbekpae ọlọghọmwa ne irẹn ye.
Vbuwe emwi eha na, de ne uwẹ gha wẹẹ ne Leah ru vbọ?
MUẸN RORO: Iwinna ọvbehe ẹre ọ wa mu erha Leah—ọni ẹre ọ siẹre ne ọ ma na rẹn wẹẹ emwi eso kpokpo ovbiẹre vbe orhiọn. Rhunmwuda ọni, deghẹ e Leah na ru e Nokaro, erhae i khian rẹn emwi nọ miẹn. Ẹi re ọna ọ khian ya erha Leah rhie ehọ nẹ ta yi, kevbe deghẹ ọ na ru vberriọ, ọ ma yae rhie ọghọ ne erhae. (Ẹfis 6:2) Rhunmwuda ọni, nokaro na i khian biẹ ọmọ esi.
Adeghẹ u na khian sẹ eke ne emwi na degbe odẹ, u ghi gualọ odẹ ọvbehe la. Erriọ vbe ye, te u gha vbe rẹn vbene u gha ya gu evbibiẹ ruẹ guan hẹ, ne ohu ghẹ mu iran
Agharhemiẹn wẹẹ Nogieva ẹre ọ yevbe nọ wa kẹ sẹ na ru, ẹi re ọre ẹwaẹn ye sẹ. Vbọsiẹ? Rhunmwuda deghẹ leah gele hoo nọ sọfurre ye ọlọghọmwa ọghẹe, te ọ gha gu erhae guan. Adeghẹ erhae ma rẹn emwi nọ kpokpo ẹre, vbe ọ khian ya ru iyobọ nẹ hẹ? Emwi ihoi ẹre nọ deghẹ ọ na hunwan.
Vbe Nogieha, e Leah ma wa hẹwẹ vbọ rhunmwuda wẹẹ erhae ma zẹyọ re. Nọghayayerriọ, ọ na zọe vbe iro ne irẹn mu ẹmwẹ nii rre vbe ẹdẹ ọvbehe. Deghẹ elẹta ẹre ọ vbe zọe vbe iro ne irẹn gbẹn, ọni sẹtin wa ya orhiọn rẹn sotọ vbobọvbobọ.
Elẹta nii sẹtin vbe ru iyobọ nẹ, nọ ya ta emwi hia nọ rre ọre orhiọn. Erhae gha tiẹre nẹ, ọ ghi rẹn ọlọghọmwa ne ovbiẹre ye, nọ te hoo nọ tama rẹn. Nogieha na, gha ru iyobọ ne Leah kevbe erhae. Ọre te ọ tota gu erhae guan ra elẹta ẹre ọ gbẹn, nogieha na keghi wa guaero ibude nọ rre Baibol nọ khare wẹẹ “wa gie ima gha rhie ekhọe ye ẹmwẹ emwi ne ọ gha rhie ọfumwegbe rre.”—Rom 14:19.
De emwi ọvbehe ne Leah gha sẹtin ru?
Roro ẹre ghee deghẹ u gha miẹn ọkpa ta, ne u gbọẹn ye ototọ mwa. U ghi vbe gbọẹn emwi nọ gha kẹrikian ighẹ azẹvbiro na.
GHẸ GHA TA ẸMWẸ NỌ GHA YE EVBIBIẸ RUẸ GHA MWẸ EBAMIRO
Yerre wẹẹ ẹmwẹ eso rrọọ ne u gha ta, evbibiẹ ruẹ sẹtin rria re ghee ihe ọvbehe.
VBE IGIEMWI:
Evbibiẹ ruẹ nọ ruẹ wẹẹ, “vbọsiẹ ne u na wa ye fuẹnrẹn? Vbọ sunu?” U wẹẹ, “uwa sẹ mwẹ rae.”
Egbe ẹmwẹ vbenia sẹtin ye iran gha roro wẹẹ, u ma gba ẹko iran, rhunmwuda ọni, u i khian sẹtin mu otọ ẹko ruẹ ma iran vbọ gberra avbe ọse ruẹ.
Gia kha wẹẹ u rre ọlọghọmwa nọ wegbe, evbibiẹ ruẹ na gha hoo ne iran ru iyobọ nuẹ, sokpan u na tama iran ne iran ghẹ gbokhuo ighẹ u rẹn vbene u gha lae hẹ.
De emwi ne evbibiẹ ruẹ khian gha roro?
De emwi nọ te khẹke ne u ta?