Eyan Na Ru Ma E Jehova

Vbe ọ ghi rre odẹ uki eva ne Ivbi Izrẹl kpa hin Igipt rre, iran keghi sẹ Oke Sainai, ẹre iran na ghi bu agọ ye evba. E Jehova keghi tie Mosis gha die uhunmwu oke, ẹre ọ na tama rẹn wẹẹ: ‘Imẹ ẹre ọ miẹn Ivbi Izrẹl fan. Adeghẹ iran na lele uhi ne I gbe ne iran, iran ghi gha re emwa mwẹ ni ghaan.’ E Mosis na ya tama iran emwi ne Jehova khare. Uwẹ rẹn emwi ne iran ghi ta ra? Iran keghi kha wẹẹ: ‘Ma gha ru emwi hia ne Jehova wẹẹ ne ima ru.’

E Mosis keghi werriegbe gha rrie uhunmwu oke. E Jehova na ghi tama rẹn vbe evba wẹẹ: ‘I gha gu ruẹ guan vbe irakhuẹ. Ya obọ sekhae ne emwa ruẹ ne iran ghẹ sikẹ Oke Sainai.’ E Mosis keghi ya tama Ivbi Izrẹl ne iran muegbe khẹ ẹmwẹ ne Jehova khian tama iran.

Vbe ọ ghi sẹ ẹdẹrriọ, iran keghi bẹghe ayan kevbe okuku nọ mwẹ emi vbe uhunmwu oke. Iran na vbe gha họn vbe avannukhunmwu vannọ kevbe iran na vbe gha họn ulamwẹ okpe. E Jehova keghi tuorre gha die uhunmwu oke nii vbe na ghee erhẹn. Orhirhi keghi gbe ku Ivbi Izrẹl. Uhunmwu oke nii hia na mu rueghe, ighogho na gba ehe hia. Urhu okpe nii kegha la yọ la yọ. Ẹre Osanobua na ghi kha wẹẹ: ‘Imẹ ọre Jehova. Uwa ghẹ ga osa ọvbehe.’

E Mosis keghi werriegbe gha rrie nene uhunmwu oke, evba ẹre Jehova na gbe uhi nẹ, nọ dekaan vbene Ivbi Izrẹl khian ya gha ga irẹn hẹ kevbe vbene iran khian ya gha yin hẹ. E Mosis keghi gbẹnnẹ uhi nii hia yotọ, ẹre ọ na ghi tie ẹre ma Ivbi Izrẹl. Iran na kha wẹẹ: ‘Ma gha ru emwi ke emwi hia ne Jehova wẹẹ ne ima ru.’ Ẹmwẹ ne iran ta na, keghi rhiema wẹẹ te iran ru eyan ma Osanobua. Iran gha muẹn sẹ ra?