“U Ghaa Zẹ Emwi Obọ Te A Ra Fiangbuẹ Yọ”

KE ẸGHẸ gha dee, ese ne a zọ keghi re emwi nọ wa ru ekpataki vbe ugamwẹ ẹmwata. Vbe ẹghẹ nẹdẹ, te Ivbi Izrẹl ghaa ya aranmwẹ zọese gie Jehova, erriọ Ivbiotu e Kristi ọghe orre nokaro vbe gha “rhie urhomwẹ ne Osanobua vbe ẹghẹ hia, zẹ vbe ese ne a zọ.” Sokpan izọese nibun ye rrọọ ni ya ẹko rhiẹnrhiẹn Osanobua ne ima gha sẹtin ru. (Hib. 13:15, 16) Igiemwi eha ne ima khian ziro yan na, rhiẹre ma wẹẹ, ọyẹnmwẹ kevbe afiangbe ne a lae miẹn i gia gie, vbe a ghaa ru egbe izọese vberriọ.

E Hanna ne ọ ghaa ga e Jehova vbuwe amuẹtinyan, ke wa gha gualọ ọmọ, sokpan ọ ma miẹn ọmọ biẹ. E Hanna keghi yan ma e Jehova vbe erhunmwu wẹẹ, irẹn gha sẹtin biẹ ọmọ okpia, te irẹn khian yae “fi ohan ne Jehova vbe ẹdẹ agbọn rẹn hia.” (1 Sam. 1:10, 11, NW.) Ọ ghi sẹ ẹghẹ, Osanobua na gele ya ọmọ okpia nẹẹn, ọ keghi he ẹre Samuẹl. Vbe Hanna ghi fian e Samuẹl ewẹn nẹ, ọ na gele rhie ẹre gha rrie ibọkpọ e Jehova, zẹvbe nọ yan rẹn. Vbe okiekie, e Jehova keghi fiangbe e Hanna ye ekhọe hia nọ ya ya ovbi ẹre fiohan ne irẹn. E Jehova na vbe ya ọmọ isẹn ọvbehe nẹẹn. E Samuẹl na ghi do gha re akhasẹ kevbe ọkpa vbe usun emwa ni gbẹn e Baibol.—1 Sam. 2:21.

Zẹvbe Hanna kevbe Samuẹl, ẹkpotọ wa vbe kie ne Ivbiotu e Kristi ya arrọọ ọghe iran fiohan ne Jehova vbe ugamwẹ ọghẹe. Yevbesọni, e Jesu keghi yan rẹn wẹẹ, e Jehova gha san ima ẹse ye izọese ne ima rhirhi ru vbe ugamwẹ ọnrẹn.—Mak. 10:28-30.

Vbe orre nokaro, okhuo ọkpa na tie ẹre Dọkas, nọ vbe gha re Ovbiotu e kristi ke wa gha re ọmwa “nọ loo ẹghẹ ọre ye iwinna ne ọ maan kevbe ne ọ ghaa ye ivbiogue obọ.” Sokpan, ọ ghi sẹ ẹghẹ, “uhunmwu ova keghi dekun ẹnrẹn, ọ na wu.” Etẹn hia vbe iko keghi khiẹ ẹsẹse ye ẹmwẹ uwu e Dọkas. Etẹn ghi họn wẹẹ, e Pita rre ikinkin nii, iran keghi rinmwiaẹn nọ zẹgiẹ gha dee. U miẹn vbene ọyẹnmwẹ gha sẹ iran hẹ vbe Pita ghi huọn e Dọkas kpaegbe. Ọna ọre ẹghẹ okaro ne ukọ ọghe Jesu ya huọn ọmwa nọ wu kpaegbe. (Iwinna 9:36-41) E Jehova ma mianmian emwi esi esi ne Dọkas wa gha ru. (Hib. 6:10) Emwi ne Dọkasi ru keghi re ne a gbẹn ye Ẹmwẹ ọghe Osanobua nọ gha re igiemwi esi, ne ima gha sẹtin ya egbe ta vbe ẹdẹnẹrẹ.

Ukọ e Pọl wa vbe rhie igiemwi esi yotọ vbe nọ dekaan ne a gha zẹ emwi obọ. Ọ kegha loo ẹghẹ kevbe emwi hia nọ mwẹ ya ru iyobọ ne etẹn. Vbe Pọl gbẹn ebe gie etẹn vbe Kọrinti, ọ keghi kha wẹẹ: “Ẹko rhiẹnrhiẹnmwẹ ọre I gha ya loo emwi ne I mwẹ hia, ya sẹ egbe imẹ tobọ mwẹ bare, ne I ya ye uwa obọ.” (2 Kọr. 12:15) Odẹ ne Pọl ya loo arrọọ ọghẹe keghi do yae rẹn wẹẹ, ne a gha ye emwa ọvbehe obọ keghi ya ọmwa sọyẹnmwẹ. Nọ ghi wa hinusi sẹ ọre wẹẹ, e Jehova gha vbe fiangbe ima yọ.—Iwinna 20:24, 35.

Vbene ẹmwata, ọ wa ya ẹko rhiẹnrhiẹn Jehova vbe ima ghaa loo ẹghẹ kevbe ẹrhiọn ọghe ima ya ru iyobọ ye iwinna Arriọba kevbe vbe ima ghaa ru iyobọ ne etẹn vbe iko. Sokpan, odẹ ọvbehe ye rrọọ, ne ima gha ya sẹtin ru iyobọ ye iwinna Arriọba ra? Ọ wa rrọọ! Gberra ne a gha loo ẹrhiọn kevbe ẹghẹ ọghomwa ye iwinna Arriọba, ma gha vbe sẹtin ye avbe emwi ewe ne ima mwẹ, ru izọhẹ ye iwinna ugamwẹ e Jehova. Izọhẹ vberriọ ne ọ ke ekhọe rre, ẹre a loo ya ru iyobọ ne avbe arọndẹ ne a gie yo isi kevbe etẹn ni rhiegbe ye iwinna ugamwẹ ọghe ẹghẹ hia, ne iwinna ikporhu iyẹn nọ maan nọ khian vbe otagbọn hia mieke na gha mwẹ alaghodaro. Izọhẹ na, ẹre a loo ya printi ebe ọghomwa, ẹre a ya ru e vidio ladian ya sẹ egbe iwinna izedu nọ khian vbe otagbọn hia. Yevbesọni, ẹre a vbe loo ya ru iyobọ ne etẹn ne odekun ẹrhia sunu daa, ẹre a vbe loo vbe iwinna Ọgua Arriọba na bọlọ. Nọnaghiyerriọ, ọ khẹke ne u gha mwẹ ilẹkẹtin wẹẹ, “u ghaa zẹ emwi obọ, te a ra fiangbuẹ yọ.” Yevbesọni, te ima ya izọhẹ ne ima ru rhie ọghọ ne Jehova.—Itan 3:9; 22:9.