Dọmwadẹ Uhunmwuta Ni Rre Uwu Ẹre

De emwi nọ khẹke ne ima ru vbe ima gha roro ẹre wẹẹ ọlọghọmwa ne ima ye kpọlọ sẹ ima gbe? Ma gha ziro yan evbagbẹn nọhuanrẹn ọghe ukpo 2018 vbe ako iruẹmwi na. Ọ gha rhan otọ evbọzẹe ne ọ na khẹke ne ima gi e Jehova gha rhie ẹrhiọn ye ima iwu kevbe odẹ ne ọ ya ru vberriọ.

Ẹdẹ Satọde, March 31, 2018 ẹre ima khian do Ugie Ayere Ọghe Uwu E Kristi. De vbene dọmwadẹ ima khian ya mu egbe khẹ Ugie na hẹ? De ere ne ima khian miẹn vbe ima gha rrie Ugie Ayere na? De vbene Ugie na ya ya emwa Osanobua mwẹ akugbe hẹ vbe uhunmwu otagbọn hia? Ma gha miẹn ewanniẹn ọghe avbe inọta na vbe ako iruẹmwi na.

Obọ e Jehova ẹre emwi hia ne ima mwẹ ke rre, ọrheyerriọ, ọ hoo ne ima gha ya emwi ewe ne ima mwẹ ru iyobọ ye iwinna nọ khian vbe otu ọghẹe vbe ẹdẹnẹrẹ. Vbe ako iruẹmwi na, ma gha ziro yan evbọzẹe ne ọ na khẹke kevbe afiangbe ne ima miẹn vbe ima gha ru vberriọ.

Ako iruẹmwi eva na keghi guan kaẹn uyinmwẹ ne emwa khian gha yin vbe ẹdẹ okiekie. Vbe nokaro, ma gha bẹghe ẹre wẹẹ, ahoẹmwọmwa ọghe agabagebe ne emwa rhiema vbe “ẹdẹ okiekie” i ya ọmwa mwẹ oghọghọ ọghe ẹmwata. Ma gha hoẹmwẹ Osanobua ẹre ima khian na gele gha mwẹ oghọghọ nọ sẹ otọ ẹko. (2 Tim 3:⁠1) Ako iruẹmwi nogieva guan kaẹn vbene eguọmwadia Osanobua ya lughaẹn ne emwa ọvbehe hẹ vbe ẹdẹnẹrẹ.