Vbene A Ya Guẹ Sayọ vbe Iwinna Ikporhu—Vbene A Ya Kporhu Hẹ vbe Ako Ne A Na Do Ẹki

Evbọzẹ Ne Ọ Na Ru Ekpataki: Ugbẹnvbe a miẹn wẹẹ, emwa wa kpẹẹ vbe isiwinna, ọ gha wa maan sẹ na bu iran gha rrie ehe ne iran na winna ya kporhu ma iran. Ikporhu na kpee vbe ehe ne emwa na do ẹki keghi wa rhiẹnrhiẹn, kevbe wẹẹ ọ vbe biẹ ọmọ esi rhunmwuda, ẹi mwẹ a ma miẹn emwa gu guan. Gberra ọni, avbe ọduẹki keghi wa mwẹ ọghọ, vbe iran gha bẹghe ọmwa ne iran hoo ghẹ ọ khian do gu iran dẹ emwi. Ne iwinna ọghe eni ye iyẹn wewe mieke na biẹ ọmọ esi, ọ khẹke ne iran gha loo ẹwaẹn kevbe wẹẹ, iran ghi vbe muegbe ẹse. (2 Kọr. 6:⁠3) Rhunmwuda ọni, ọgbaroghe ọghe iwinna ikporhu ghi gie aro ọre gha sotọ vbe nọ dekaan vbene ọ kpẹkpẹ sẹ hẹ, ighẹ ẹghẹ na ya winna avbe ako na, kevbe etẹn ni winna vbọ.

Vbene A Ya Ruẹ Hẹ:

Ẹmwẹ ne kuẹi ẹre ọ khẹke nu muegbe ẹre yotọ. Adeghẹ ima na kpẹẹ gbe vbe ima gha kporhu ma ọmwa nọ do ẹki, a sẹtin miẹn wẹẹ, ẹi ghi kie ẹkpotọ ne ima vbe ẹdẹ ọvbehe ya guẹ guan.
Gualọ ẹghẹ ne ẹki i kakabọ ya do ya gha mu otuẹ se ehe ne emwa na do ẹki, a gha wẹẹ vbene ẹghẹ owiẹ ye nọ vbe iran gha wa da kie.
U ghi hia na miẹn wẹẹ, ọmwa nọ gbaroghe evba ẹre u khian ka gu guan. Gi aro ruẹ ye khuẹrhẹ vbe uhunmwu. U sẹtin kha wẹẹ: “Te ima wa mu otuẹ gie emwa vbe isiwinna ọghe iran rhunmwuda ai kẹ miẹn emwa vbe owa.” Ta ẹmwẹ ne kuẹi ma rẹn, kevbe u ghi rhie asobọrrie, ebe iyẹn, ra ebe ọvbehe nẹ. Rhunmwuda ne iran ghẹ do gha ya aro ọmwa nọ do ẹki ghee ima, ọ gha maan sẹ deghẹ a ma zẹdẹ yunu kaan vbene a ya ru iyobọ ye iwinna ọghomwa hẹ, sokpan wẹẹ iran ẹre mu ẹmwẹ igho rre.
Adeghẹ ọmwa nọ gbaroghe isiwinna nii na miẹn ruẹ yi, u ghi khama rẹn wẹẹ u te hoo nu vbe gu iran nikẹre ni winna vba guan kherhe. Vbe isiwinna eso, ọ gha maan sẹ ne u nọ emwa ni winna vba deghẹ iran gha kue nu sẹ ebe ima eso rae ye ehe ne iran gha na miẹn ọnrẹn tie vbe ẹdẹ ọvbehe.
Loo ẹwaẹn. Guan vbe ẹghẹ nọ khẹke. Vbe igiemwi, deghẹ ọduẹki khiẹn emwi ne ọmwa, ra deghẹ ọ mwẹ ẹmwi nọ ru vbe obọ, ziengbe nọ ru emwi nọ ru fo nẹ, u ke suẹn gha guẹ guan.

Danmwẹ Ọna Ghee vbe Uki Na:

Vbe iruẹmwi ẹgbẹe ọghe uwa nọ dee, ruọre yotọ ẹmwẹ ne kuẹi nu gha sẹtin taa, deghẹ u kporhu vbe ako ne a na do ẹki.