Vbene Imamwaemwi Ọghe Ima Gha Ya Mu Emwa Ekhọe Hẹ
1. De vbene emwi ne Jesu ma emwa re ghaa ye hẹ vbe ekhọe ọghe iran?
1 Te imamwaemwi ọghe Jesu wa gha mu ekhọe ọghe emwa ni ghaa danmwehọ re. Vbe ẹghẹ ọkpa, vbe irẹn ghi rhan otọ Evbagbẹn Nọhuanrẹn ma erhuaengbe ẹre nẹ, ọ na gha “giẹn” iran vbe ekhọe vbene a ghe erhẹn. (Luk 24:32) Ugbẹnvbe a miẹn wẹẹ, te ọ khẹke ne a họn ẹmwẹ ne Osanobua kẹ ekhọe rre, de vbene ima khian ya gua ekhọe ọghe emwa ne ima ma re emwi kpa hẹ, ne iran mieke na rrerre fi uyinmwẹ iran werriẹ?—Rom 6:17.
2. De vbene a gua mu ẹmwẹ ye owa kevbe azamemwi ya ru iyobọ ne ima hẹ ya sẹtin ta ẹmwẹ nọ mu ọmwa ekhọe?
2 Gha Loo Azamemwi Kevbe Nu Gua Gha Mu Ẹmwẹ Ye Owa: Nọ ne emwa nibun, u gha wa tama iran kẹkan wẹẹ ọna ọre emwi nọma ra nẹi maan, iran i fiwerriẹ. Uhiẹn, adeghẹ u na gha loo evbagbẹn nọhuanrẹn nibun ya gbodan ghee iyayi ọghe ugamwẹ ọghe iran, ọna sẹtin wa haa iran fua. Ne ẹmwẹ nu ta mieke na gua ọmwa kpa, ọ khẹke nu ka rẹn, evbọzẹ ne ọ na mwẹ egbe iyayi kevbe uyinmwẹ vberriọ. Adeghẹ a na ye ẹwaẹn fẹko loo avbe inọta na ya rẹn emwi nọ rre ọmwa ekhọe, ọna sẹtin guaekpa nọ ya fannọ otẹko ẹre ma ima. (Itan 20:5) Ẹghẹ nii, ẹre ima khian na ghi rẹn ako ọghe evbagbẹn nọhuanrẹn nọ gha mu ẹre ekhọe. Rhunmwuda ọni, te ima gha rhiẹre ma wẹẹ, ima mwẹ ẹmwẹ iran vbe ekhọe, kevbe wẹẹ ima ghi vbe gha mwẹ iziengbe. (Itan 25:15) Yerre wẹẹ, obọ kẹ emwa eso sẹ eso, vbene a ya mwẹ alaghodaro vbe odẹ ọghe orhiọn. U ghi ziengbe ne orhiọn nọhuanrẹn ọghe Jehova dia iziro ọghe iran kevbe emwi ne iran gha ru.—Mak 4:26-29.
3. De vbene ima khian ya ru iyobọ ne emwa ne ima ma re emwi ya họọn rẹn hẹ avbe akpa ni maan?
3 Ru Iyobọ Ne Iran Ya Họọnrẹn Avbe Akpa Nii Maan: Avbe ako ọghe evbagbẹn nọhuanrẹn ni rhiẹre ma umamwẹ kevbe ahoẹmwọmwa ọghe Jehova, gha sẹtin ru iyobọ ne emwa ne ima ma re emwi ya họọnrẹn avbe akpa ni maan. Ima gha sẹtin loo ako ọghe evbagbẹn nọhuanrẹn vbene a ghe Psalm 139:1-4 ra Luk 12:6, 7 ya gie iran rẹn vbene ọ kpọlọ sẹ hẹ ighẹ ẹkorhiẹnrhiẹnmwẹ ne Osanobua mwẹ daa dọmwadọghẹ vbuwe ima. Adeghẹ emwa na ya ekhọe hia gbọyẹmwẹ ye itohan nọ ma te khẹke ne Jehova mwẹ ghee ima, ọ ghi do gha tua sayọ, ighẹ ahoẹmwọmwa ne iran mwẹ daa Osanobua kevbe ugamwẹ ne iran rhie nẹ. (Rom 5:6-8; 1 Jọn 4:19) Deba ọni, adeghẹ iran na rẹn wẹẹ ọ mwẹ odẹ eso ne uyinmwẹ ọghe iran ya dekaan e Jehova, ọna gha sẹtin gua iran kpa ya gha ru emwi nọ gha ye ẹko rhiẹnrhiẹn Osanobua kevbe nọ gha rhie uyi nẹ.—Psm. 78:40, 41; Itan 23:15.
4. Adeghẹ ima na gha ma emwa emwi vbe ikporhu, de vbene ima khian ya rhiẹre ma hẹ wẹẹ, ima yẹrẹro ighẹ asẹ ne dọmwadọghẹ mwẹ nọ ya zẹ ne egbe ẹre?
4 E Jehova i muẹn kpan ye ọmwa egbe na họn ẹmwẹ ne irẹn. Nọghayayerriọ, irẹn keghi fẹko khama dọmwadọghẹ wẹẹ, ọ keghi re emwi ẹwaẹn na lele ibude ọghẹe. (Aiz. 48:17, 18) E Jehova ẹre ima yegbe taa deghẹ ima na gha ma emwa emwi vbe odẹ nọ gha ru iyobọ ne iran ya sẹtin tobọ iran gualọ otọre miẹn ighẹ ẹmwata nọ rre ẹmwẹ. Adeghẹ ọ na mu edọmwadọghẹ ekhọe ne iran fi uyinmwẹ iran werrriẹ, ọ gha lọghọ, iran ke sẹtin werriegbe rhie obọ ye emwi dan. (Rom 12:2) Ọna gha vbe ye iran sikẹ ọre sayọ vbe ẹghẹ hia, ‘ọmwa nii nọ zanzan ekhọe ghee’ ighẹ e Jehova.—Itan 17:3.