Vbene A Ya Guẹ Sayọ Vbe Iwinna Ikporhu—Vbene A Ya Loo Avbe Inọta Vbe Odẹ Nọ Gha Biẹ Ọmọ Esi

EVBỌZẸE NE Ọ NA RU EKPATAKI: Adeghẹ “iro ne ọ rre ọmwa ẹko . . . yevbe amẹ ne ọ rre uhae ne ọ dinmwi,” inọta ne ima nọ ghi yevbe ikoroba na ya sae ladian. (Itan 20:5) Ọta na nọ keghi ru iyobọ ne ọmwa ne ima gu guan ya gha ta ẹmwẹ nọ rre ọre orhiọn. Ọ keghi wa biẹ ọmọ esi deghẹ ima na gha loo inọta nọ khẹke. Odẹ ne Jesu ya loo inọta wa biẹ ọmọ esi ẹsẹsẹmwẹse. De vbene ima khian ya yegbe taa re?

VBENE A YA RUẸ HẸ:

• Gha loo inọta nọ gha ya ruẹ rẹn emwi nọ rre ọmwa ekhọe. Jesu wa gha nọ ọta ughughan ne ọ ya rẹn emwi nọ rre ekhọe ọghe erhuanegbe ẹre. (Mat 16:13-16; be 238 okhuẹn 3-5) De inọta eso ne u gha sẹtin nọ, ne u ya rẹn emwi nọ rre ọ yan owa ekhọe?

• Gha loo inọta nọ gha ya ọmwa ne u gu guan rẹn eke ne ẹmwẹ rrie. Ne Jesu mieke na dia iziro ọghe Pita, Jesu keghi loo avbe inọta nọ gha ya e Pita rẹn eke ne irẹn guan rrie. (Mat 17:24-26) De inọta eso ne uwẹ gha sẹtin nọ, ne ọmwa ne u gu guan mieke na rẹn eke ne ẹmwẹ rrie?

• Tian ọmwa ne u gu guan. Vbe Jesu ghi miẹn wẹẹ ọgbenbe ọkpa “ye ẹwaẹn rhie ewanniẹn” ye inọta ọghe irẹn, ọ na tian rẹn. (Mak 12:34) De vbene u gha ya tian ọmwa nọ rhie ewanniẹn ye inọta ruẹ hẹ?

VBE A GHA GHI GHEE ẸRE FO NẸ IGHẸ ABỌ NOKARO ỌGHE NE VIDIO RU IWINNA NE JESU RU—MA EMWA EMWI, U GHI ZẸ EWANNIẸN YE AVBE INỌTA NA:

• Vbọsiẹ ne ọna na re odẹ nọ ma khẹke na ya maa ọmwa emwi, agharhemiẹn wẹẹ ẹmwẹ ne ọtẹn nokpia nii tae te gba?

• Vbọzẹe ne ọ na khẹke ne ima gha nọ ọta, ne ima gha te ya tobọ ima rhan otọ emwi hia ma ọ yan owa?

VBE A GHA GHI GHEE ABỌ NOGIEVA ỌGHE NENE VIDIO FO NẸ, U GHI ZẸ EWANNIẸN YE AVBE INỌTA NA:

• De vbene ọtẹn nokpia na, ya loo inọta vbe odẹ nọ biẹ ọmọ esi?

• De obẹlẹ ọvbehe nọ loo ro ne ima gha sẹtin yegbe taa?