“Emwi Ne Osanobua Ku Kugbe Nẹ . . .”

Uhi e Mosis khare wẹẹ, vbene okpia te khu amwẹ ọnrẹn, ọ ghi ka gbẹn ebe nọ khian ya khu ẹre. Emwamwa na kegha ru iyobọ ne emwa, ne iran ghẹ gha ya okhirhikhirhi zagha orọnmwẹ ọghe iran. Sokpan vbe ẹghẹ Jesu, avbe ọkaolotu ugamwẹ keghi yae gha khuẹrhẹ ne emwa, ne iran sẹtin gha khulo ọvbokhan iran vbe nọ rhirhi khọn iran. (ayahọmwaehọ nọ rre nwtsty nọ dekaan Mak 10:4, 11) Jesu keghi kha wẹẹ e Jehova ẹre ọ mu emwamwa orọnmwẹ gbọ. (Mak 10:2-12) Te Osanobua mwamwaẹn ne ọdọ vbe amwẹ rọnmwẹ egbe sẹ ota rhunmwuda “ọkpa” ẹre iran khin. Zẹvbe ne ebe Matiu gi ima rẹn, Osanobua ma kue ne ọdọ vbe amwẹ gha sọọ ebe orọnmwẹ, vbe ẹi re te ọkpa vbuwe iran “ru oghẹ.”—Mat 19:9.

Aro ne Ivbi e Farisi ya gha ghee orọnmwẹ, ẹre emwa nibun vbe ya ghee orọnmwẹ vbe ẹdẹnẹrẹ. Ọna keghi lughaen ne aro ne Jesu ya ghee ẹre. Vbene emwi kherhe te sunu, emwa ghi gha gualọ vbene iran khian ya sọọ ebe orọnmwẹ hẹ. Sokpan Ivbiotu e Kristi ni ru orọnmwẹ nẹ, keghi tie ẹre ekhuarro ighẹ eyan ne iran ru vbe ẹdẹ orọnmwẹ. Iran vbe hia ne iran gha ya avbe ilele ni rre Baibol, sọfurre ye ọlọghọmwa ne iran rhirhi werriẹ aro daa. A gha ghi ghee ẹre fo nẹ ighẹ ne vidio Ahoẹmwọmwa Kevbe Ọghọ Keghi Ya Ẹgbẹe Mwẹ Akugbe, a ghi rhie ewanniẹn ye avbe inọta na:

• 

  De vbene u khian ya lele adia nọ rre ebe Itan 15:1 vbe orọnmwẹ ọghuẹ kevbe wẹẹ, vbọzẹe ne ọna na ru ekpataki?

• De vbene ilele nọ rre ebe Itan 19:11, khian ya ru iyobọ nuẹ ya sẹtin gbaengbe ne ọlọghọmwa?

• Adeghẹ egbe orọnmwẹ ọghuẹ wọọ ruẹ nẹ, de inọta eso nọ khẹke ne u nọ egbuẹ, ne u gha te ya gha roro ẹre wẹẹ, u sọọ ebe orọnmwẹ ẹre ọ kue wa maan sẹ?

• De vbene ilele nọ rre ebe Matiu 7:12, khian ya ru iyobọ nuẹ hẹ, ne u ya sẹtin gha yin ẹse daa ọmwa ne uwa gba rrọọ vbe orọnmwẹ?