Vbene A Ya Guẹ Sayọ Vbe Iwinna Ikporhu—Gha Loo Obẹlẹ Ughughan Vbe U Ghaa Kporhu

EVBỌZẸE NỌ NA RU EKPATAKI: Etẹn ne a hannọ zẹ kevbe avbe ohuan nikẹre keghi tie emwa ni rre ehe hia ne iran ‘do rhie amẹ arrọọ vbe ọghe ọhẹ.’ (Arhie 22:17) Amẹ arrọọ na mudia ye ihe emwamwa hia ne Jehova ru, ne ọ ya miẹn emwa esi fan vbe obọ orukhọ kevbe uwu. Deghẹ ima hoo ne ima ru iyobọ ne emwa ni ke ẹvbo ughughan rre kevbe ni mwẹ iyayi ughughan, te ọ khẹke ne ima kporhu “iyẹn nọ maan ọghe ẹdẹdẹmwẹdẹ” ma edọmwadẹ iran vbe odẹ nọ gha mu iran ekhọe.—Arhie 14:6.

VBENE A YA RU ẸRE HẸ:

• Hannọ uhunmwuta kevbe ako evbagbẹn nọhuanrẹn nọ gha mu ekhọe ọghe emwa ni rre ẹdogbo ruẹ. U sẹtin loo igiemwi ọghe vbene a ya kporhu hẹ, u sẹtin vbe loo obẹlẹ ọvbehe ne u ka loo nọ biẹ ọmọ esi. De uhunmwuta eso kevbe ako evbagbẹn nọhuanrẹn nọ mobọ yẹẹ emwa ni rre ẹdogbo nii? Ọ mwẹ iyẹn nọ da ladian ne emwa ni rre ẹdogbo ruẹ guan kaẹn ra? De emwi ne u gha ta nọ gha yẹẹ avbe ikpia ra ikhuo ni rre ẹdogbo ruẹ?

• U ghaa kporhu ma emwa, ghẹ mianmian ya tuẹ iran vbe odẹ nọ khẹke, u ghi vbe lele ilele ne a lele vbe ẹdogbo ruẹ.—2 Kọr 6:3, 4

• U ghi hia ne u rẹn avbe ebe kevbe vidio ni rre Emadogua Ne A Ya Maa Emwa Emwi, ne u mieke na sẹtin yae ru iyobọ ne emwa ni mwẹ ẹkorhiẹnrhiẹnmwẹ

• Danlod avbe ebe kevbe vidio vbe urhuẹvbo ọghe emwa ne u zẹdia miẹn vbe ẹdogbo ruẹ

• Fi ẹmwẹ ne u khian ta werriẹ, ne u mieke na sẹtin sẹ ekhọe ọghe ọ yan owa. (1 Kọr 9:19-23) Vbe igiemwi, deghẹ u rre ikporhu, u na miẹn ọmwa ne ọtiọnrẹn ra ọsiọre wu, vbua khian ya kporhu ma rẹn hẹ?

VBE A GHA GHI GHEE NENE VIDIO FO NẸ, A GHI ZẸ EWANNIẸN YE AVBE INỌTA NA:

• De uhunmwuta ne ọtẹn nọ ya iyẹn wewe ya suẹn gha gu ọ yan owa ziro?

• De emwi ne ọ yan owa ghaa werriẹ aro daa vbe arrọọ ọghẹe?

• De ako ọghe Baibol nọ khẹke ne ọtẹn tie vbe egbe ẹghẹ vbenian, kevbe wẹẹ vbọzẹe?

• De vbene u ya fi ẹmwẹ ne u ta werriẹ, ne u mieke na sẹtin sẹ ekhọe ọghe emwa ni rre ẹdogbo ruẹ?