Uwẹ Miẹn Ere Vbe Ebe Ẹdẹ Na Tie Ra?

Ebe Ẹdẹ rre usun emwi ne uwẹ tie vbe ẹdẹgbegbe ne u mieke na sẹtin sikẹ e Jehova sayọ ra? Hia ne u suẹn gha tie Ebe Ẹdẹ vbe ẹdẹgbegbe, adeghẹ u i ka ru vberriọ. Ẹghẹ owiẹ ẹre etẹn nibun ya tie Ebe Ẹdẹ, ne iran mieke na sẹtin gha ru erria yan rẹn vbene ẹdẹrriọ te fo. (Jọs 1:8; Psm 119:97) De vbene u khian ya gha miẹn ere sayọ vbe ako ọghe Evbagbẹn Nọhuanrẹn ne Ebe Ẹdẹ ọghe dọmwadẹ ẹdẹ hẹnhẹn egbe yan? Tie emwi ne a ta sẹ ako ọghe Baibol ne u khian tie, ne u mieke na rẹn otọ emwi na gele guan kaẹn vbe ako nii. Hia ne u ru erria yan okha ọkpa vbe Baibol nọ dekaẹn ilele nọ rre ako ọghe Baibol na khian tie vbe ẹdẹrriọ. Iyeke ọni, u ghi hia ne u ya ilele na ru emwi vbe arrọọ ruẹ. Deghẹ atamuolọyan ne u ru na gha re nọ hẹnhẹn egbe yan Ẹmwẹ Osanobua, Ẹmwẹ Osanobua ghi gha dia ruẹ, u vbe gha miẹn ere vbọ.—Psm 119:105.

Etẹn ni ga vbe Bẹtẹl vbe ehe hia vbe agbọn na, keghi ziro yan Ebe Ẹdẹ vbe ẹghẹ ne iran ya rri evbare owiẹ. Ke ukpo eso gha dee, a keghi muẹn ye JW Broadcasting^® ighẹ ọta eso na ya guan nọ dekaẹn Ebe Ẹdẹ ne a tie vbe owiẹ owiẹ, u gha wa miẹn avbe ọta na vbe JW Broadcasting^® vbe ototọ uhunmwuta na tiẹre AVBE UGIE. De ẹghẹ ne u ghi ghee ọkpa vbe avbe vidio na sẹ? Egbọre, u gha miẹn adia nọ gha ru iyobọ nuẹ deghẹ u na gha ghee avbe vidio na. Vbe igiemwi, de vbene okha ọghe Lọt khian ya ru iyobọ nuẹ hẹ vbe azẹ ne u rhirhi gha ru?

GHEE VIDIO NỌ MWẸ UHUNMWUTA NỌ KHARE WẸẸ GHẸ HOẸMWẸ AGBỌN NA (1 JỌN 2:15), IYEKE ỌNI, A GHI ZẸ EWANNIẸN YE AVBE INỌTA NA:

• De ilele nọ rre Baibol ne ebe ẹdẹ na ziro yan vbe vidio nii hẹnhẹn egbe yan?

• De vbene okha ọghe Lọt ya ru iyobọ ne ima ya rẹn ẹbe na lae miẹn, deghẹ a na hoẹmwẹ agbọn na kevbe emwi ni rre uwu ẹre?—Gẹn 13:12; 14:12; 19:3, 12, 13, 24-26

• De vbene ima khian ya rhiẹre ma wẹẹ, ima ma hoẹmwẹ agbọn na ra emwi ni rre uwu ẹre, sokpan e Jehova ẹre ima hoẹmwẹ ọnrẹn?