“Wa Viọ Ẹbọ Ẹrrẹe Ne Uwa Mwẹ Kua”

E Jekọb wa rẹn wẹẹ ugamwẹ na ma gua ẹre ọ khẹke Jehova, agharhemiẹn wẹẹ e Jehova ma he yi uhi nọ dekaẹn ẹbọ na ga. (Ẹks 20:3-5) E Jehova ghi tama e Jekọb nọ werriegbe gha rrie Bẹtẹl, e Jekọb keghi tama igiowa ọghẹe ne iran viọ ẹbọ ne iran mwẹ kua. E Jekọb na ghi silo avbe ẹbọ nii hia kua, ya sẹ egbe emwiehọ ne iran rhie ye ehọ. Ọ gha kẹ, iran ghaa roro ẹre wẹẹ emwiehọ vberriọ gha sẹtin gbogba ga iran. (Gẹn 35:1-4) Vbe nai na gbawawẹ ẹko wa rhiẹnrhiẹn e Jehova ye emwi ne Jekọb ru.

De vbene ima khian ya rhiẹre ma wẹẹ, ma rhie ugamwẹ na ma gua ne Jehova vbe ẹdẹnẹrẹ? Te ọ khẹke, ne ima gban egbe ne emwi ke emwi nọ dekaẹn ẹbọ na ga kevbe orhiọn dan na gu muobọ. Ọna rhiema wẹẹ, ma ghi filo ẹre kua ighẹ emwi ke emwi ne ima mwẹ nọ dekaẹn orhiọn dan na gu muobọ, ma ghi mu ukpa mu uwerhẹn ghee aro emwi ne ima ya rọkhọ egbe. U sẹtin nọ egbuẹ ọta na: ‘De aro ughe ne I ghee? Ughe ne avbe orhiọn dan na si ọmwa esagiẹn nọ ra? Ne orhiọn dan na loo emwa ni wulo vbe na miẹn wẹẹ iran ye rre agbọn nọ ra? Ọ mwẹ ughe eso ne a na fi emwa unu kevbe ne a na zẹ ọbo edunna, sokpan, iran ghi gha rhiẹre ma vbe na miẹn wẹẹ, ọ ma de emwi nọ rhiae. Egbe ughe vberriọ ẹre imẹ ghee ra?’ Nọnaghiyerriọ, ọ khẹke ne ima gban egbe ne emwi ke emwi ne Jehova khuiwu ẹre.—Psm 97:10.

GHEE VIDIO NỌ MWẸ UHUNMWUTA NỌ KHARE WẸẸ “MU ARO IGBINNA DA ESU,” IYEKE ỌNI, A GHI ZẸ EWANNIẸN YE AVBE INỌTA NA:

• 

  De ọlọghọmwa ne Palesa werriẹ aro daa?

• 

  Vbọzẹe nọ na khẹke ne ima tama ediọn ne iran ru iyobọ, adeghẹ ima ra ọtẹn ra ọmwa ne ima gu tie Baibol na gha gu orhiọn dan muobọ?

• 

  De emwi eso nọ khẹke ne ima gban egbe na, deghẹ ima hoo ne Jehova gha gbogba ga ima?

• De azẹ ne Palesa ru?

• De odẹ eso ne u gha ya sẹtin gban egbe ne orhiọn dan vbe ẹdogbo ne u ye?