UYINMWẸ ỌGHE IMA NE IVBIOTU E KRISTI
Asikoko Nọkhua Na Do Ukpo Ukpo Keghi Kie Ẹkpotọ Ne Ima Ya Rhie Ahoẹmwọmwa Ma
Vbọ ya ima sọyẹnmwẹ asikoko nọkhua ọghomwa ne ima ru vbe ukpo ukpo? Vbene ọ ghaa ye vbe ẹghẹ Ivbi Izrẹl, ọ keghi kie ẹkpotọ ne etẹn nibun ya koko ga e Jehova. Ma vbe sọyẹnmwẹ evbare orhiọn ne wọrhọwọrhọ. Erriọ ẹkpotọ vbe ya kie ne ima ya ya egbe rhorho avbe ọse kevbe emwa ima vbuwe ẹgbẹe. Ẹi khabe ne ima i na hoo ne ima gbe ẹdẹ rhọkpa vbuwe ikpẹdẹ eha ne ima ya do avbe asikoko na.
Ẹkpotọ gha kie ne ima ya si egbe koko vbenian, ọ ma khẹke ne ima gha roro ọghe enegbe ima ọkpa, ọ khẹke ne ima gha roro vbene ima khian ya rhiẹre ma wẹẹ ima hoẹmwẹ emwa ọvbehe. (Gal 6:10; Hib 10:24, 25) Adeghẹ u na gha gualọ odẹ ne u khian ya ru iyobọ ne emwa, u ma na vbe viọ emwi lele aga ne u i khian loo, ọ ghi rhiema wẹẹ, u mu ọghe emwa ọvbehe ye okaro. (Fil 2:3, 4) Ẹkpotọ vbe kie ne ima ya zẹ ọse ọgbọn vbe asikoko. Okhuo ne ima gha sẹtin fian ne egbe ima vbe nọ dekaẹn ọna ọre wẹẹ, ma gha gu ọtẹn ne ima ma rẹn ẹdẹ ru ọse vbene a te suẹn asikoko, vbe a ghaa rre ẹghẹ ihẹwẹ kevbe vbe a gha zobọ nẹ. (2 Kọr 6:13) Etẹn ne ima gu zẹ ọse vbenian sẹtin do gha re ọse ima vbe etẹbitẹ! Nọ ghi maan sẹ ọre wẹẹ, emwa ọvbehe gha bẹghe vbene ima ya rhie ahoẹmwọmwa ma, iran sẹtin do deba ima gha ga e Jehova.—Jọn 13:35.
GHEE VIDIO NỌ MWẸ UHUNMWUTA NỌ KHARE WẸẸ, “AHOẸMWỌMWA I FAFA”! ASIKOKO ỌGHE UHUNMWU OTAGBỌN, IYEKE ỌNI, A GHI ZẸ EWANNIẸN YE AVBE INỌTA NA:
De vbene etẹn ya rhiẹre ma wẹẹ, iran hoẹmwẹ etẹn ni ke ẹvbo ọvbehe gha die asikoko ọghe uhunmwu otagbọn, na do vbe ukpo 2019?
Vbọzẹe ne akugbe kevbe ahoẹmwọmwa nọ rre ẹkpo eguọmwadia e Jehova na re emwi ọyunnuan?
De asefẹn ọghe ahoẹmwọmwa ne etẹn ni ga zẹvbe Ẹbu Nọ Su guan kaẹn?
De emwi ne u gha ru nọ gha ya ahoẹmwọmwa nọ rhiegbe ma vbe asikoko ọghomwa wegbe sayọ?
De vbene ahoẹmwọmwa ya ku etẹn kugbe vbe Germany kevbe South Korea?
Vbọ khẹke nọ gha re atamuolọyan ọghe ima?