Osanobua Vbe Jesu Ẹre Ọ Zẹe Ighẹ Ima Gha Sẹtin Gha Mwẹ Afanvbimu Vbe Odaro

De ọlọghọmwa ne u werriẹ aro daa vbe ẹdẹgbegbe? Uhunmwuta ẹgbẹe ne emwi nibun rrọọ ọre urhu ẹre u khin ra? Uwẹ ọkpa ẹre ọ koko ivbuẹ ra? Igbama ne ihua re zẹ kpokpo vbe owebe ẹre u khin ra? Ọmwa nọ khuọnmwi ra nọ werriẹ aro daa isievẹn nọ lele ọmaẹn khian ẹre u khin ra? Ma hia wa mwẹ ọlọghọmwa ne ima werriẹ aro daa, rhunmwuda ai miẹn nẹi miẹn. Etẹn eso ghi kue gha werriẹ aro daa ọlọghọmwa nibun vbe uhukpa. Sokpan ma rẹnrẹn wẹẹ, vbe nẹi khian ghi kpẹẹ gbe, e Jehova gha sọfurre ye ọlọghọmwa hia ne ima werriẹ aro daa.—2 Kọr 4:16-18.

Ọ ghi te sẹ ẹghẹ nii, emwi nọ rhie ifuẹko ne ima ọre ne ima na yerre wẹẹ, e Jehova bẹghe ọlọghọmwa ne ima werriẹ aro daa, ọ gbọyẹmwẹ ye izinegbe kevbe ẹkoata ne ima rhiema, ọ gha vbe fiangbe ima vbe ọ gha sẹ ẹghẹ. (Jer 29:11, 12) Jesu wa vbe hoẹmwẹ ima. Ọ yan rẹn wẹẹ irẹn ‘gha gu ima gha rrọọ’ vbe ima ghaa yin zẹvbe Ivbiotu e Kristi ọghe ata. (Mat 28:20) Ma ghaa ru erria yan avbe afiangbe ne ima khian miẹn vbe Arriọba Osanobua gha ghi rre nẹ, ọ gha ru iyobọ ne ima ya zin egbe ọlọghọmwa ke ọlọghọmwa ne ima werriẹ aro daa nia.—Rom 8:19-21.

GHEE VIDIO NỌ MWẸ UHUNMWUTA NỌ KHARE WẸẸ, YE RHIE ARO RUẸ TUA JESU RHUNMWUDA OGBIGBI ẸHOHO NỌ DEE!—AVBE AFIANGBE NA KHIAN MIẸN VBE ARRIỌBA OSANOBUA, IYEKE ỌNI, A GHI ZẸ EWANNIẸN YE AVBE INỌTA NA:

• De vbene emwa nagbọn ya khian rree ne Osanobua kevbe wẹẹ, vbọ ghi kẹrikian?

• De afiangbe ne emwa ni mwẹ ẹkoata dae Jehova khian miẹn vbe odaro?

• De emwi nọ zẹe ighẹ iran gha sẹtin miẹn afiangbe na?

• Ya unu kaẹn afiangbe eso ne uwẹ ya aro yi vbe agbọn ọgbọn nọ dee?