U Ka Rẹn Ra?
E Jehova keghi kue yọ ne Ivbi Izrẹl gha loo idu kevbe elikhukhu ya zọ ese. De iyobọ ne emwamwa na ghaa ye ne Ivbi Izrẹl?
VBE uhi e Mosis, e Jehova keghi kue yọ, ne Ivbi Izrẹl gha loo idu kevbe elikhukhu ya zọ ese gie irẹn. Uhi nii khare wẹẹ, deghẹ iran ma miẹn idu ne iran khian ya ru izọese, iran sẹtin loo elikhukhu. (Lẹv 1:14; 12:8; 14:30) De iyobọ ne emwamwa na ghaa ye ne Ivbi Izrẹl? Iyobọ nọkhua wa gha nọ, rhunmwuda, ẹi re ẹghẹ hia ẹre a ya miẹn idu. Vbọ mobọ si ẹre?
Idu
Idu i re ahianmwẹ nọ dia efọnkpa ya. Vbe ẹghẹ uyunmwu, iran ghi wa kpọ vbe otọ Izrẹl. Ẹghẹ oni ra ẹghẹ orhọ ghaa sikẹ otọ, iran ghi kpa gha rhie otọ ẹvbo ọvbehe ni rre ẹghẹ uyunmwu. Uki October ẹre iran ya kpa. Iran ghi vbe dọlegbe gha die otọ Izrẹl vbe ẹghẹ uyunmwu. (Ihuan 2:11, 12; Jer 8:7) Ọna rhie ma wẹẹ, vbe otọ Izrẹl vbe ẹghẹ nẹdẹ, ọ lọghọ a ke miẹn idu ya zọ ese vbe uki December ya fi e February, rhunmwuda, ẹghẹ ne amẹ wa ya rrọọ kevbe ne oni ya kakabọ fi, ẹre nọ.
Elikhukhu oha
Sokpan, avbe elikhukhu i tin kpa yo otọ ẹvbo ọvbehe, te a wa gha miẹn iran vbe otọ Izrẹl vbe ẹghẹ hia. Yevbesọni, iran keghi re emwi irri ne a sẹtin gha gbaroghe vbe owa. (Yae tae Jọn 2:14, 16.) Ebe na tie ẹre Bible Plants and Animals khare wẹẹ, “Vbe ẹghẹ nẹdẹ, ai miẹn ẹvbo ne emwa i na mwẹ elikhukhu vbe otọ e Palestine. Emwa ni mwẹ owa, mwẹ owa nekherhe ne iran kun ra uvun ne iran ha ye egbe ekẹn, ne avbe elikhukhu dia.”—Yae tae Aizaia 60:8.
Elikhukhu nọ rre oko
Avbe ahianmwẹ na wa gha miẹn vbe ẹghẹ hia, ẹre Jehova wẹẹ ne Ivbi Izrẹl ya gha zọ ese gie irẹn. Ọna rhie ma wẹẹ, Osa nọ hoẹmwẹ emwa rẹn kevbe nọ mwẹ amuroro daa iran, ẹre Jehova khin.