Hia Ne U Miẹn Emwi Ọgbọn Ruẹ Vbe U Ghaa Ruẹ Emwi

Ma ke suẹn gha ruẹ emwi, ma sẹtin nọ egbe ima wẹẹ, ‘De emwi eso ne I ya aro yi we I khian ruẹ?’ Sokpan, te ọ khẹke ne ima gha begbe, ne ima ghẹ wa do rhie aro tua emwi ne ima ya aro yi we ima khian ruẹ sẹrriọ wẹẹ, emwi ọgbọn ne Jehova te hoo nọ ma ima re ghi la ima ban. Vbe ima khian ya kie ẹkpotọ yọ hẹ ne Jehova ma ima emwi?

Na erhunmwu ne Jehova rhie ẹwaẹn nuẹn. Nọ e Jehova nọ ru iyobọ nuẹn ya rẹn otọ emwi nọ hoo nọ ma ruẹ re nian. (Jems 1:5) Mu egbe ne u ya ruẹ emwi ba emwi.​—Itan 3:​5, 6.

Gi e Baibol ru iyobọ nuẹn vbe ẹdagbọn ruẹ. “Ẹmwẹ Osanobua keghi re nọ rrọọ.” (Hib 4:12) Ẹghẹ ke ẹghẹ ne ima ya tie Ẹmwẹ Osanobua nọ re “ẹmwẹ” nọ rrọọ, ọ keghi ru iyobọ ne ima vbe odẹ ughughan, sokpan ọni ọre deghẹ ima na mu egbe ne ima ya ruẹ emwi ne Osanobua hoo nọ ma ima re.

Gha rhie ẹre ma wẹẹ, u gbọyẹmwẹ ye emwi hia ne Jehova loo ya ma ima emwi. Evbare ne Jehova kpemehe ẹre ne ima keghi re “evbare ni maan sẹ ehia.” (Aiz 25:6) Ghẹ rhie aro gberra emwi rhọkpa ne Jehova kpemehe ẹre rhunmwuda wẹẹ, u roro ẹre wẹẹ, u i khian sọyẹnmwẹ ọnrẹn. U gha miẹn ere vbe emwi ne u ruẹ, u ghi vbe gha sọyẹnmwẹ emwi ne u ruẹ!