Gha Mu Olika Ẹmwẹ Ni Rrọọ Roro

Ọ lọghọ ruẹ ne u sẹtin ya emwi ne u tie re rre ra? Ọna wa sunu daa ima hia ke ẹghẹ ya fi ẹghẹ. De emwi nọ gha sẹtin ru iyobọ nuẹn? Gha mu avbe olika ẹmwẹ ni rre ako ne u tie roro.

Zẹvbe ne u ya ruẹ emwi ne egbuẹ, u vbe gba amẹ sa wọn ne u mieke na mu avbe olika ẹmwẹ ni rre ako ne u tie roro. Ọna ọre emwi ne Pọl we ne etẹn nọ gbẹn elẹta gie gha ru vbe iran ghaa tie elẹta, nọ gbẹn gie iran. E Pọl khare wẹẹ: “Uhunmwu ẹmwẹ ọghe emwi ne ima ta na khin.” (Hib 8:1) Ẹmwẹ ne Pọl ta na keghi ru iyobọ ne etẹn ya rẹn otọ emwi nọ ta, kevbe vbene edọmwadẹ olika ẹmwẹ ya rhilo ginna uhunmwuta ọghe ẹmwẹ nọ ta.

U sẹtin zẹ ẹghẹ kọ ne u khian ya gha mu olika ẹmwẹ ọghe emwi ne u tie re roro, u sẹtin loo ifuanro igbe ya ru ọna, vbe u gha ruẹ emwi ne egbuẹ fo nẹ. Adeghẹ u ma sẹtin ye emwi ne u tie re rre, u sẹtin ya ghee abọ uhunmwuta ni rrọọ ra ifiẹmwẹ nọ nianian olika ẹmwẹ ni rre dọmwadẹ okhuẹn. Ifiẹmwẹ na, ẹre ọ mobọ re ifiẹmwẹ nokaro vbe okhuẹn, ọna gha sẹtin ru iyobọ nuẹn ya yerre. Deghẹ u na miẹn emwi ọgbọn ruẹ, hia ne u ya ẹmwẹ obọ ruẹ rhan otọ re. U ghaa mu avbe olika ẹmwẹ ni rrọọ roro, ọ gha ru iyobọ nuẹn ya ye emwi ne u ruẹ re rre, ẹ i re ọni ọkpa, ọ gha vbe ya ruẹ rẹn vbene emwi ne u tie re khian ya ru iyobọ nuẹn hẹ vbe ẹdagbọn ruẹ.