Ọta Ne Emwa Nọ
De emwa ni re “odibosa na hannọ zẹ” na guan kaẹn vbe ebe 1 Timoti 5:21?
Ukọ ighẹ e Pọl keghi gbẹn ebe gie Timoti nọ vbe re ọdiọn vbe iko, ọ na kha wẹẹ: “Sirra Osanobua kevbe Kristi Jesu kẹ kevbe avbe odibosa na hannọ zẹ, ẹre I na tama ruẹ na, ne u ghẹ mwẹ u ma ya avbe emwi na ru emwi, u ghi vbe gha lelẹe, vbene u i na ya aro gbe ọmwa rhọkpa re, ra ne u gha gbe ewanmwẹ ghee obọ ọkpa.”—1 Tim 5:21.
Vbe okaro, ma gha ka guan kaẹn emwa nẹi khian sẹtin gha rre usun avbe odibo na guan kaẹn na. Ma rẹnrẹn wẹẹ, iran i khian sẹtin gha rre usun orhunmwu 144,000 ni re Ivbi Otu e Kristi na hannọ zẹ. Vbe ẹghẹ ne Pọl ya gbẹn elẹta na gie Timoti, Ivbi Otu e Kristi na hannọ zẹ, ma he suẹn gha yo ẹrinmwi. Avbe ukọ kevbe etẹn ọvbehe na hannọ zẹ ma he khian emwa orhiọn, rhunmwuda ọni, iran i khian sẹtin gha re “avbe odibosa na hannọ zẹ” na guan kaẹn vbe ako na.—1 Kọr 15:50-54; 1 Tẹs 4:13-17; 1 Jọn 3:2.
Vbe deba ọni, “avbe odibosa na hannọ zẹ” i khian sẹtin gha re avbe odibosa ni sọtẹ vbe ẹghẹ ne Okpamẹ ya rhọọ vbe ẹghẹ e Noa. Avbe odibosa na deba e Setan sọtẹ, iran na do gha re orhiọn dan, eghian ọghe Jesu ẹre iran vbe gha khin. (Gẹn 6:2; Luk 8:30, 31; 2 Pit 2:4) Vbe odaro, a gha khui iran ye uwu uvun nẹi mwẹ otọ vbe ukpo 1,000, iyeke ọni, a ghi guọghọ iran ba Esu.—Jud 6; Arhie 20:1-3, 10.
Nọnaghiyerriọ, ọ khọ wẹẹ, “avbe odibosa na hannọ zẹ” ne Pọl guan kaẹn ọre avbe odibosa ni rre ẹrinmwi ni rre obọ ọghe “Osanobua kevbe Kristi Jesu.”
Ọkhọngborrie ẹre avbe odibosa ni ya ẹkoata ga Osanobua khin. (Hib 12:22, 23) Rhunmwuda ọni, ọ ma khẹke ne ima gha roro ẹre wẹẹ, iwinna ọkpa ẹre iran hia fẹẹrẹ wa ru vbe ẹghẹ ọkpa. (Arhie 14:17, 18) Vbe igiemwi, odibo ọkpa kẹkan ẹre Jehova we nọ guọghọ ivbiyokuo ọghe Ivbi Asiria ni re 185,000. (2 Ọba 19:35) A sẹtin miẹn wẹẹ, a vbe gie odibosa eso “ne iran ya silo ehia ladian vbe Arriọba [ọghe Jesu], ighẹ emwi hia ni ya emwa rrua owẹ, kevbe emwa nẹi lele uhi.” (Mat 13:39-41) Eso sẹtin “si emwa rẹn na hannọ zẹ koko” vbe ẹrinmwi. (Mat 24:31) A vbe gie eso ‘ne iran gha gbaroghe ima.’—Psm 91:11; Mat 18:10; yae taa Matiu 4:11; Luk 22:43.
“Avbe odibosa na hannọ zẹ” na guan kaẹn vbe ebe 1 Timoti 5:21, sẹtin gha re avbe odibosa ne Osanobua we nọ gha gbaroghe emwa rẹn. Emwi ne Pọl ghaa guan kaẹn mwa ọre vbe nọ khẹke ne avbe ediọn ya gha ru iwinna iran hẹ, ọ na vbe kha wẹẹ, te ọ khẹke ne etẹn ni rre iko gha rhie ọghọ ne iran. Ọ na vbe rhie tẹ wẹẹ, te ọ khẹke ne ediọn gha ru iwinna iran, vbene iran i na “ya aro gbe ọmwa rhọkpa re, ra ne [iran] gha gbe ewanmwẹ ghee obọ ọkpa,” kevbe wẹẹ, ọ ma khẹke ne iran wa gheghe ru azẹ vbene iran ma na ka zẹ iro yan rẹn nẹ. Te ọ wa gele khẹke ne iran zẹ owẹ lele ẹmwẹ ne Pọl tae na, rhunmwuda “sirra Osanobua kevbe Kristi Jesu kẹ kevbe avbe odibosa na hannọ zẹ” ẹre iran na ru iwinna iran. Ọ vẹ na rẹn wẹẹ, avbe odibosa eso rrọọ na waa ẹre iwinna, ne iran gha gbaroghe ghee iko, vbe na ghee ne iran gbogba ga etẹn, ne iran siẹnro iwinna ikporhu, iran ghi vbe gi e Jehova rẹn vbene emwi hia vbe khian hẹ.—Mat 18:10; Arhie 14:6.