Ọta Ne Emwa Nọ
De ẹghẹ ne ikporhu iyẹn nọ maan ne ima kpee na khian ya sẹ ufomwẹ?
Jesu khare wẹẹ: “A gha vbe kporhu iyẹn nọ maan ọghe Arriọba la uhunmwu otagbọn hia, nọ gha re osẹ ne agbẹnvbo hia, iyeke ọni, ufomwẹ ghi rre.” (Mat 24:14) Ẹmwẹ e Grik na ke zedu “ufomwẹ” vbe uviẹn na kevbe uviẹn 6 kevbe 13, ọre teʹlos. Emwi ne ẹmwẹ na demu ọre vbe na khian ya guọghọ agbọn Esu na fẹfẹfẹ vbe okuo Amagẹdọn. (Arhie 16:14, 16) Rhunmwuda ọni, ọ gha wa gha bu ẹghẹ ne okuo Amagẹdọn khian ya suẹn, ẹre ima khian ya dobọ iwinna ikporhu yi. Ọna keghi fi ẹre werriẹ vbene ima te ka ya rẹn otọ ẹmwẹ na.
Vbene ima ka ya rẹn otọ re ọre wẹẹ, vbe a gha guọghọ e Babilọn Nọkhua nẹ vbe ẹghẹ orueghe nọkhua, ẹre ima khian ya dobọ ikporhu yi. (Arhie 17:3, 5, 15, 16) Te ima te yayi wẹẹ, ọna ọre ufomwẹ ẹghẹ ne “Jehova gha ya miẹn emwa rẹn fan.” (Aiz 61:2) Ma ka gha roro ẹre wẹẹ, emwa ni khian miẹn uhunmwu vbe orueghe nọkhua nii, ọre emwa ni mudia ẹse vbe odaro e Jehova, vbene ọ te sẹ ẹghẹ orueghe nọkhua. Ma keghi ya iran taa Ivbi e Ju ni miẹn uhunmwu vbe ẹghẹ na ya guọghọ e Jerusalẹm rua vbe ukpo 607 B.C.E. Te a khian miẹn iran na fan rhunmwuda wẹẹ, iran ga e Jehova kevbe wẹẹ, iran khuiwu emwi dan. (Ẹzik 5:11; 9:4) Sokpan, ọna ma gua ẹre ro, ẹmwẹ ne Jesu tae vbe ebe Matiu 24:14, evba nii rhie ẹre ma wẹẹ, ẹkpotọ gha kie ne emwa eso ya miẹn iyẹn nọ maan yi a te miẹn wẹẹ, agbọn na sẹ ufomwẹ fo fẹfẹfẹ vbe okuo Amagẹdọn.
Te ima ghi fi odẹ ne ima ka ya rẹn otọ igiuhunmwu ọghe ikpesia ni kọnkọn werriẹ zẹvbe nọ rre ebe Arhie Maan 16:21, rhunmwuda odẹ ne ima ghi ya rẹn otọ ebe Matiu 24:14. Vbe a ghi gualọ otọ ọre sayọ, ma na do miẹn wẹẹ, ako eva na wa rhilo ginna egbe. Vbọ ya ima kha vberriọ? Emwi nọ ya ima kha vberriọ ọre odẹ ne Baibol ya gie vbene emwa ya miẹn ikporhu ọghe Arriọba Osanobua yi. E Pọl khare wẹẹ, nọ ne “ẹbu emwa na khian miẹn fan,” ikporhu ọghe Arriọba Osanobua ghi yevbe iyẹn nọ maan, nọ re “uwinhinmwẹ ọghe arrọọ.” Sokpan nọ ne eghian ọghe Osanobua, ọ ghi yevbe iyẹn dan, nọ re “ẹwia ọghe uwu.” (2 Kọr 2:15, 16) Ikporhu ọghe Arriọba Osanobua i yẹẹ iran, rhunmwuda, ọ ya emwa rẹn wẹẹ, agbọn ọwiẹyi ẹre agbọn Esu na khin kevbe wẹẹ, Esu ẹre ọ kha yan rẹn, ọ vbe ya emwa rẹn wẹẹ, a gha guọghọe rua vbe nẹi khian ghi kpẹẹ gbe.—Jọn 7:7; 1 Jọn 2:17; 5:19.
Yerre wẹẹ, e Baibol vbe kha wẹẹ, ikpesia ni kọnkọn nii gha “da otọ, ẹ i re nekherhe.” Ọna rhie ma wẹẹ, iwinna ikporhu sẹtin kakabọ da otọ vbe ẹghẹ orueghe nọkhua, ọni nọ wẹẹ, ẹghẹ na kha na ẹre emwa khian na do kakabọ rẹn eni e Jehova sẹ. (Ẹzik 39:7) A gha ghi guọghọ e Babilọn Nọkhua nẹ vbe ẹghẹ na kha na, emwa gha miẹn ikporhu ọghe ima yi zẹvbe emwi nọ winhin ra? Ọ sẹtin sunu vberriọ. Egbọre, eso sẹtin yerre wẹẹ, ẹ i re ban Avbe Osẹe Jehova ke kha wẹẹ, a gha guọghọ ugamwẹ ohoghe hia rua, a sẹtin vbe miẹn wẹẹ, ẹghẹ nii ọre ẹghẹ okaro ne emwa eso khian ya họn iyẹn na.
Te ọna vbe yevbe na ghee emwi nọ sunu vbe Igipt vbe ẹghẹ nẹdẹ, iyeke vbe Jehova ghi hihiẹ Orueghe Igbe yan iran nẹ. E Jehova ghi “rri avbe ẹbọ ni rre Igipt oya” nẹ, “emwa ughughan ni bun” nẹi re Ivbi Izrẹl keghi deba emwa rẹn kpa hin otọ Igipt rre. (Ẹks 12:12, 37, 38) A sẹtin miẹn wẹẹ, emwi nọ ya iran lẹẹ gbinna e Jehova ọre ne iran na bẹghe vbene ẹmwẹ ne Mozis tae vbekpa Orueghe Igbe ya sẹ hẹ.
Ẹkpotọ gha kie ne emwa ni khian lẹẹ gbinna e Jehova vbe a gha guọghọ e Babilọn Nọkhua nẹ ya ru iyobọ ne etiẹn Kristi ni khian ye gha rre uhunmwu otagbọn na vbe ẹghẹ nii. (Mat 25:34-36, 40) Sokpan ẹkpotọ vbenian i khian ghi kie ne emwa vbe ọ gha wa kẹ kherhe ne okuo Amagẹdọn suẹn, vbe etẹn na hannọ zẹ ni dekẹe gha kpa gha rrie ẹrinmwi nẹ.
Odẹ ne ima ghi ya rẹn otọ avbe ako ọghe ebe nọhuanrẹn na rhie ẹre maan wẹẹ, Osa nọ mwẹ ahoẹmwọmwa kevbe ekhọe itohan, ẹre Jehova khin. Ọghe ne ẹmwata, e Jehova “ma hoo ne ọmwa rhọkpa fuan, sokpan, irẹn hoo ne emwa hia roro iro fi uyinmwẹ werriẹ.”—2 Pit 3:9.