Arrọ Vbuwe Ọfumwegbe Agbọn Ọgbọn
Deghẹ uwẹ na ghe ughe nọ rre asobọrhie na, de aro iro ne uwẹ mwẹ? Ẹkokoudu ruẹ ma guakpa ghe ọfumwegbe, oghọghọ, kevbe ọrọkhọrhọ nu miẹn vba? Gelegele ọru vberriọ. Sokpan iminna kẹkan nọ ra, ra iro ne obọmwa nọ, na yayi wẹ avbe egbe emwi vbe nian gha sunu hiehie vbe agbọn na ra?
Ughaghe emwa nibun tẹ rorẹe vberriọ. Emwi nọ vẹ na miẹn ẹrẹ na ọrọre okuo, ẹrhia, ohanmwẹ, emianmwẹ, ọmaẹn—na sunu ye nọ ma bun gbe. Ọrhe ye rriọ ọmwẹ vbọ zẹe nana mwẹ ayayẹro. Vbe ọghi ghe odaro, Baibol na guan kaẹn “Osanobua tae ne wẹ agbọn ọgbọn ke ẹrinmwi ọgbọn gha rre, ehe ne ọgha gua ẹmwata egbe ro, ena ọre ima mudia khẹ.”—2 Pita 3:13; Aizaia 65:17.
Avbe “ẹrinmwi ọgbọn” kevbe “agbọn ọgbọn” na, zẹẹ vbe ne Baibol tae, ẹire ẹrinmwi ọgbọn na zẹ aro dẹghe ra agbọn ọgbọn ọghe ikpakpa. Ne agbọn vbe ẹrinmwi ne aye aro dẹghe keghi re na yi ẹsẹse, Baibol vbe rhie ẹre ma wẹ iran ghaa rrọ vbe etẹbitẹ. (Ọsian 89:36, 37; 104:5) Ne “agbọn ọgbọn” ghaa re agbọn ne emwa-esi khian do yin, de ba ọni ne “ẹrinmwi ọgbọn” ghaa re arriọba ẹrinmwi nọ gbae, ra arriọba, nọ gha kha yan uniẹn emwa ne agbọn. Sokpan evbọ gha gia yayi nọ ra wẹ “agbọn ọgbọn” ra agbọn nọ mwẹ uyi gha sẹ obọ ra?
Ẹẹn, rorẹe wẹ avbe evbima vbenian na gha re usun emwamwa ne okaro ne Osanobua mwẹ ghe agbọn na. Ọvie ọdọ-vbe-amwẹ ne okaro ye Paradais ọghe Eden vbe agbọn na vbe nọ na mu iwinna nọkhua ne iran: “Wa gha biẹ ne uwa gha bun kevbe ne uwa vọn agbọn na kevbe ne uwa kha yan rẹn.” (Gẹnẹsisi 1:28) Ẹn, emwamwa ne Osanobua mwẹ ne iran ọrọre ne iran ghaa mwẹ emọ kevbe na miẹn wẹ vbe okieke iran ye Paradais vẹwae gba uhunmwu otọ agbọn hia. Agha rhe miẹn wẹ vbe okieke iran zẹ ne egbe iran ne iran zẹ itan ghe Osanobua, rhunmwuda ọni, iran ma ghi sẹ omwa nọ gha rrọ vbe etẹbitẹ, sokpan ọna ma fiẹ werriẹ ighẹ emwamwa ọghe Osanobua. Tọ na gha mwẹ amusẹ vbe agbọn ọgbọn!—Aizaia 55:11.
Vbe ne ẹmwata, adeghe uwẹ na Erhunmwu Nọyaẹnmwa, ra Erha Ọghomwa, na ya nọ Arriọba Osanobua nọ rre, te uwẹ na erhunmwu ne arriọba ẹrinmwi nọ do kpolo emwi dan hin agbọn rre kevbe nọ kha yan nene agbọn ọgbọn. (Matiu 6:9, 10) Ma gha sẹtin gha mwẹ ilẹkẹtin wẹẹ Osanobua gha họn erhunmwu ni, ugbẹn vbe Ẹmwẹ ọghẹ yanrẹn: “Emwa imudiaẹse to bọ iran gha rrie ukhu agbọn na, iran gha vbe yin ẹnrẹn vbe etẹbitẹ.”—Ọsian 37:29.
Arrọ vbe Agbọn Ọgbọn Ọghe Osanobua
Arriọba ọghe Osanobua gha viọ evbima nai sẹtin gie, nọ gha ru emwi hia ni ma ne irẹn ne Osanobua mwamwa ne emwa rẹn gha sẹ ọyẹnmwẹ ọnrẹn vbe agbọn. Ikhuiwu kevbe amakan gha fo vbe otọ, vbe okieke edọmwadọghọe ghi do gha re ọse egbe. Vbe uwe Baibol, Osanobua yan rẹn wẹ rẹn gha ‘ye avbe okuo khien nọ sẹ ufomwẹ ya sẹ ehe ne agbọn sẹẹ kevbe ehe nọ rhanmwẹ.’ “Agbọn ẹvbo ighi werriegbe tọn umozo mu ghe agbọn ẹvbo, amaghi wẹ te iran gha ghi ruẹ okuo ọvbehe.”—Ọsian 46:9; Aizaia 2:4.
Vbe okieke uhunmwu otọ agbọn hia gha do khiẹn ogba ọfumwegbe ọghe paradais. Baibol khare: “Avbe ato kevbe otọ nọ ka amẹ gha gbe igiangian, ato ne gbẹlẹẹ gha sẹ ọyẹnmwẹ kevbe ọghi gbe obobo. . . . Rhunmwuda vbe uwu ato amẹ ghi vẹ kua, ikpogho ẹzẹ ghi ladian vbe ato ne gbẹlẹẹ. Avbe otọ ni mwẹ ọghae gha khiẹn odighi vbe ẹghẹ ni, avbe otọ ne ovbamẹ gbe gha khiẹn ivbiẹzẹ.”—Aizaia 35:1, 6, 7.
Emwi bun nọ gha ye ima gha ghọghọ vbe agbọn ọghe Paradais. Ohanmwẹ ighi khian gbe emwa ọvbehe rhunmwuda ama miẹn evbare re. “Otọ tobọre gha gele rhie emwi okọ re ma,” erriọ Baibol khare. (Ọsian 67:6; 72:16) Emwa hia fẹrẹ gha sẹ ọyẹnmwẹ ere ọghe iwinna obọ iran, zẹ vbene Ayi ọghomwa yanrẹn: “Gelegele iran gha kọ emwi okọ, iran ghi rriọ ọmọrẹn . . . iran ighi kọ ne ọmwa ọvbehe rrie ọmọrẹn.”—Aizaia 65:21, 22.
Vbe agbọn ọgbọn ọghe Osanobua, aighi kun emwa ọkhọngborrie ye ọgua nọkhua ra iwowo ni zẹlẹ uhe ghẹghẹ, rhunmwuda Osanobua mwamwaẹn nẹ: “Iran gha gele bọ owa iran ghi vbe dia yin ẹnrẹn . . . Iran ighi bọ ne ọmwa ọvbehe yin ẹnrẹn.” Baibol ye vbe yan: “Iran ighi gbe ogbekua.” (Aizaia 65:21-23) Vbe nian, emwa gha winna iwinna nọ mwẹ ere kevbe nọ sẹ ọkẹn. Arrọ ighi wọ ọmwa egbe.
Ọgha sẹ ẹghẹ, Arriọba Osanobua gha muẹn rre ighẹ aro ọfumwegbe nọ ka gha rrọ vbe ogba ọghe Eden vbe ẹkpo aranmwẹ, kevbe ẹkpo aranmwẹ vbe emwa ne agbọn. Baibol khare: “Akpakomiza gha gu oteghe ohuan lo vbe omwa ẹghẹ, ubidọn vbe ovbi ẹwe gha gba rhuẹ, ẹkhuia vbe oduma nọ bẹ ẹtu kevbe avbe aranmwẹ ni mwẹ ẹvbi egbe ehia fẹrẹrẹ; ọvbokhan okpia kherhe kẹkan gha su iran.”—Aizaia 11:6-9; Hozia 2:18.
Rorẹe ghe, vbe agbọn Paradais emianmwẹ hia fẹrẹrẹ kevbe egbe ma gba nọ mwa gha re nọ fo! Ẹmwẹ Osanobua ta ẹmwata ma ima: “Ai ghi miẹn ọmwa nọ gha kha: ‘Egbe ma rran mwẹ.’ ” (Aizaia 33:24) “[Osanobua] ọ gha khiẹn ameve hia hin aro iran rre. Uwu ighi ra gha rrọọ ọvbehe, ra akhiẹ ra obalọ. A ho emwi nẹdẹ hia bẹkun nẹ.”—Arhiema 21:4.
Vbe Ne Ọgha Ya Guẹ Ru
Vbe nai na gbe awẹ-awẹ, eyan ne Osanobua yanrẹn vbe kpa arrọ vbe uwe agbọn ọgbọn ọghe imudiaẹse gha gua ẹkokoudu ruẹ kpa. Vbe ne emwa eso gha na roro wẹ na do miẹn afiangbe nọ ma sẹrriọ ighi khian gha re ẹmwata, ọ ma vbe ma gbe nọ gha ke obọ re rre Ayi ọghomwa nọ mwẹ ahoẹmwẹ ọmwa.—Ọsian 145:16; Maika 4:4.
Vbe ẹmwata, evba gualọ vbe obọ ọmwa rrọ na ho na ru a deghẹ ima gha yin agbọn Paradais nọ de vbe etẹbitẹ. Jesu rhie ọkpa kpataki ma, vbe ne ọna kha vbe erhunmwu nọ naẹn gie Osanobua: “Ọna ọrọre nene arrọọ nẹifo wẹ ne emwa nagbọn rẹn ruẹn zẹ vbe Osanobua ọkpa nọ re ọghe ẹmwata ke ne iran vbe rẹn Jesu Kristi, ọmwa ne uwẹ gie.”—Jọn 17:3.
Vbe nọ ghi ye na, a deghẹ ima gele ho ne ima gha rrọ vbe agbọn ọgbọn ọghe Osanobua, te ima gha ruẹ vbe okaro aho ọghe Osanobua kevbe na yin lelẹe. Rhunmwuda ẹmwata nọ: Agbọn na, “ke emwi ne agbọn gualọ ni rrọọ hia, te ehia rhie gberra khian, sokpan, ọmwa ne ọ ru vbene Evbavba ho, ọ gha rrọọ ẹdẹdẹmwẹdẹ,” nọ do gha sẹ ọyẹnmwẹ afiangbe ẹdẹdẹmwẹdẹ ne Ayi nọ mwẹ ahoẹmwẹ khian gha rhurhẹ tuorre.—1 Jọn 2:17.
Vbe re ta rriẹ ma, Evbagbẹn nọhuanrẹn na loro ye Evbagbẹn ọghe Grik keghi re Iyẹn Nọma Ọghe Emwa Hia Ile Nọgbọn. Urhu Ebo ọghe New World Translation of the Holy Scriptures—With References nasikuẹn vbe NW, a loro ye Evbagbẹn nọhuanrẹn ọghe Hibru.