Iruẹmwi 8
Arrọọ Ọghe Ẹgbẹe Nọyẹ Osanobua
De ihe ne ọdọ ye vbuwe ẹgbẹe? (1)
De vbene ọdọ gha ye obọ mu amwẹ ọnrẹn hẹ? (2)
De aro evbọbiyọmwaegbe ne erha mwẹ? (3)
De ukpo nọ re ọghe amwẹ vbuwe ẹgbẹe? (4)
De emwi ne Osanobua hoo vbe obọ evbibiẹmọ kevbe emọ? (5)
De aro ne Baibol ya ghe a wannọ egbe kevbe asọ ebe orọnmwẹ rua? (6, 7)
1. Baibol khare wẹ ọdọ ọre uhunta ọghe ẹgbẹe ọre. (1 Kọrinti 11:3) Te ọdọ ghaa mwẹ amwẹ ọkpa kẹkan. Te iran gha wa ru orọnmwẹ nọkhẹke vbe ne uhi khare.—1 Timoti 3:2; Taitọs 3:1.
2. Te ọdọ gha hoẹmwẹ amwẹ ọnrẹn zẹ vbe ne ọ hoẹmwẹ egbe ẹre. Te ọ gha ye obọ mu ẹnrẹn vbe odẹ ne Jesu ya ye obọ mu avbe erhuaengbe ẹre. (Ẹfisọs 5:25, 28, 29) Ẹi khian fi amwẹ ọnrẹn emwi ra ru ẹre khọ vbe odẹikodẹ. Nọghayayerriọ, te irẹn gha rhie ọghọ kevbe uyi ma rẹn.—Kọlose 3:19; 1 Pita 3:7.
3. Te erha gha kakabọ winna ne ọ ya gbaro ghe ẹgbẹe ọre. Te ọ gha kpemehe evbare, evbarhuan, kevbe owa ne amwẹ ọnrẹn kevbe emọ. Te erha gha vbe kpemehe emwi orhiọn na gualọ ne ẹgbẹe ọre. (1 Timoti 5:8) Te irẹn gha karo ne ọ ya ru iyobọ ne ẹgbẹe ọre ya ruẹ vbekpa Osanobua kevbe emwamwa Rẹn.—Diuteronomi 6:4-9; Ẹfisọs 6:4.
4. Te amwẹ gha re ọyobọ nọma ne ọdọ ọre. (Gẹnẹsis 2:18) Te ọ gha ru iyobọ ne ọdọ ọre vbuwe imamwaemwi kevbe iruẹmwi ọghe ivbiran. (Itan 1:8) Jehova hoo ne amwẹ gbaro ghe ẹgbẹe ọre vbuwe ahoẹmwọmwa. (Itan 31:10, 15, 26, 27; Taitọs 2:4, 5) Te ọ gha mwẹ ọghọ nọdinmwi ne ọdọ ọre.—Ẹfisọs 5:22, 23, 33.
5. Osanobua hoo ne emọ gha họẹnmwẹ ne evbibiẹ iran. (Ẹfisọs 6:1-3) Irẹn ye aro yọ ne evbibiẹ emọ gha ma iran emwi kevbe gha dia ivbiran. Te evbibiẹ emọ gha mu ẹghẹ ya gu ivbiran loo kevbe gu iran ruẹ Baibol, gbaro ghe emwi orhiọn kevbe ne iran gha yegbe rrorro emwi ikpakpa ọghe iran. (Diuteronomi 11:18, 19; Itan 22:6, 15) We ne evbibiẹ emọ ghẹ ye egbebalọmwẹ ra odẹ atosi gbe emọ hin ọkhọ rre.—Kọlose 3:21.
6. deghẹ emwa ni rọnmwẹ egbe na gha mwẹ ọlọghọmwa ne a ya gha yegbe khian, te iran gha hia ne iran ye ibude nọ rre Baibol ru emwi. E Baibol bu ima ude ne ima rhie ahoẹmwẹ ma kevbe ne a gha yabọ. (Kọlose 3:12-14) Ẹmwẹ ọghe Osanobua ma rhie igiọdu ye iwannọ egbe zẹvbe odẹ ne a ya sọfurre ye avbe iku ọlọghọmwa. Sokpan amwẹ sẹtin zẹ ne ọ ya kpaọ sẹ ọdọ ẹre rae adeghẹ (1) ọ ye izevbudu he ne ọ ya gbaro ghe ẹgbẹe ọre, (2) ọ khọ sẹrriọ wẹ egbe rranmwẹ kevbe arrọọ ọghe ne amwẹ ghi rre ikpadede, ra (3) igbodan ne kankankan ọghẹe ma ghi gie irẹn ga e Jehova.—1 Kọrinti 7:12, 13.
7. Te emwa ni rọnmwẹ egbe ghaa mwẹ amuẹtinyan da egbiran. Oghẹ keghi re orukhọ ghe Osanobua kevbe na gba ru orọnmwẹ. (Hibru 13:4) A ru oghẹ ọkpa kẹkan ọre Evbagbẹn Nọhuanrẹn su igiẹ yi na ya sọ ebe orọnmwẹ vbene ẹkpotọ gha na kie na ya ru orọnmwẹ ọvbehe. (Matiu 19:6-9; Rom 7:2, 3) Jehova hẹe ugbẹn vbe emwa ra sọ ebe orọnmwẹ rua vbene Evbagbẹn Nọhuanrẹn ma na kue yọ kevbe nọ ya rọnmwẹ ọmwa ọvbehe.—Malakai 2:14-16.
[Efoto nọ rre ipapa 16, 17]
Osanobua ho ne evbibiẹmọ gha ma ivbiran emwi kevbe gha dia iran
[Efoto nọ rre ipapa 17]
Erha nọ mwẹ ahoẹmwọmwa kpemehe emwi ewe kevbe ọghe orhiọn ne ẹgbẹe ọghẹe