IRUẸMWI 20
De Iwinna Nọ Bi Ye Izabọ Ọghe Ẹbu Nọ Su Vbe Ẹdẹnẹrẹ?
Ẹbu nọ su vbe orre nokaro
Etẹn tie elẹta ne ẹbu nọ su gbẹn rre
Vbe orre nokaro, ẹbu ne kherhe ọghe “avbe ukọ kevbe avbe ediọn” ni rre Jerusalẹm, ẹre ọ ghaa ẹbu nọ su. Iran ẹre ọ ghaa rhie adia ne etẹn hia ni ghaa re Ivbiotu e Kristi vbe ẹghẹ nii, iran ẹre ọ vbe gha ru azẹ ne kpataki. (Iwinna 15:2) Azẹ ne iran rhirhi gha ru keghi hẹnhẹn egbe yan adia nọ rre Evbagbẹn Nọhuanrẹn kevbe adia ọghe orhiọn nọhuanrẹn. (Iwinna 15:25) Obẹlẹ na ẹre Ẹbu Nọ Su vbe lele vbe ẹdẹnẹrẹ.
Iran ru ahoo ọghe Osanobua. Aro nọ ghaan ẹre etẹn na hannọ zẹ ni ga zẹvbe Ẹbu Nọ Su ya ghee Ẹmwẹ Osanobua, iran ẹre ọ siẹnro emwamwa hia nọ khian vbe otu e Jehova. Uzọla uzọla ẹre iran ya do iko. Vbe iko nii, iran ghi ziro yan vbene otu e Jehova khian ya gha mwẹ alaghodaro hẹ vbe uhunmwu otagbọn hia. Zẹvbe nọ ghaa ye vbe orre nokaro, odẹ ughughan ẹre ima ya miẹn adia vbe obọ Ẹbu Nọ Su. Ma miẹn adia vbe elẹta ne iran gbẹnnẹ rre kevbe obọ etẹn ni mu otuẹ ye iko ughughan. Ọna ẹre ọ ya etẹn hia mwẹ akugbe vbe uhunmwu otagbọn hia. (Iwinna 16:4, 5) Ẹbu Nọ Su ẹre ọ siẹnro emwamwa na ya kpemehe evbare orhiọn, iran rhie igiọdu ne etẹn ya mu iwinna ikporhu iyẹn nọ maan ye okaro, iran ẹre ọ vbe siẹnro emwamwa na ya zẹ etẹn ni gbegba ye ukpo ughughan.
Iran lele adia ọghe orhiọn nọhuanrẹn. Adia ọghe Jehova nọ re Osa Ne Udazi kevbe ọghe Jesu nọ re Uhunmwuta ọghe iko ọghe Ivbiotu e Kristi ẹre iran lele. (1 Kọrinti 11:3; Ẹfisọs 5:23) Etẹn ni ga zẹvbe Ẹbu Nọ Su i ghee egbe iran zẹvbe ọkaolotu ọghe emwa Osanobua. Iran kevbe etẹn hia na hannọ zẹ keghi “lele Oteghe Ohuan nii [nọ re Jesu] la ehe nọ rhirhi la.” (Arhie Maan 14:4) Ẹbu Nọ Su wa gbọyẹmwẹ ye erhunmwu ne ima na ne iran.
De emwa ni ghaa ga zẹvbe ẹbu nọ su vbe orre nokaro?
De vbene Ẹbu Nọ Su ya lele adia ọghe Osanobua vbe ẹdẹnẹrẹ?