IRUẸMWI 10
De Vbene U Khian Ya Yẹrẹro Hẹ Ugamwẹ Ọghe Ẹmwata?
1. Ugamwẹ ẹmwata ọkpa ẹre ọ rrọọ ra?
‘Wa gha begbe vbe egbe avbe akhasẹ ohoghe.’—MATIU 7:15.
Ugamwẹ ọkpa nọ re ọghe ẹmwata ẹre Jesu gie ma erhuaengbe ẹre. Te ọ yevbe na ghe odẹ na la sẹ arrọọ ọghe etẹbitẹ. Jesu khare wẹẹ: “Ibozẹghẹ ẹre ọ vbe la” odẹ nii. (Matiu 7:14) Ugamwẹ ọkpa ne Osanobua miẹn yi, ọre nọ hẹnhẹn egbe yan ẹmwẹ ọghẹe nọ re ẹmwata. Emwa hia ni rre ugamwẹ ẹmwata keghi re ni kugbe vbuwe amuẹtinyan ọkpa.—Tie Jọn 4:23, 24; 14:6; Ẹfisọs 4:4, 5.
Ghee vidio nọ mwẹ uhunmwuta nọ khare wẹẹ Ugamwẹ Hia Ẹre Osanobua Miẹn Yi Ra?
2. De emwi ne Jesu khare vbekpae Ivbiotu e Kristi ọghe ohoghe?
‘Iran keghi ye unu iran kha wẹẹ, iran rẹn Osanobua, sokpan uyinmwẹ ne ọma gu ọghe Osanabua ro ẹre iran yin.’—TAITỌS 1:16.
Jesu yobọ sekhae wẹẹ, avbe akhasẹ ohoghe gha mu ugamwẹ ọghe Ivbiotu e Kristi rria. Iran keghi ba ru vbene a ghe emwa ugamwẹ ọghe ẹmwata. Esọsi ọghe iran keghi ye eni e Kristi wan egbe. Sokpan u gha gele sẹtin rẹn aro ọmwa niran khin. Vbua khian ya rẹn hẹ? Ugamwẹ ẹmwata ọkpa ẹre a na miẹn Ivbiotu e Kristi ọghe ẹmwata ni mwẹ uyinmwẹ esi.—Tie Matiu 7:13-23.
3. De vbene u khian ya yẹrẹro hẹ emwa ni rre ugamwẹ ọghe ẹmwata?
Gia ziro yan ama isẹn na khian ya ye iran ẹro:
Emwa ni rre ugamwẹ ẹmwata keghi ye aro nọ hiunsi ghe Baibol zẹvbe Ẹmwẹ ọghe Osanobua. Iran keghi hia niran rhiẹre ye uyinmwẹ, avbe ilele ni rrọọ. Rhunmwuda ọni, ugamwẹ ẹmwata keghi lughaẹn nẹ ugamwẹ nọ hẹnhẹn egbe yan iziro ọghe emwa nagbọn. (Matiu 15:7-9) Emwa ni rre ugamwẹ ẹmwata keghi rhiẹre ye uyinmwẹ, imamwaemwi ọghe iran.—Tie Jọn 17:17; 2 Timoti 3:16, 17.
Erhuaengbe Jesu ọghe ẹmwata keghi rhie ọghọ ne eni ọghe Osanobua nọ re Jehova. Jesu keghi rhie ọghọ ne eni ọghe Osanobua lekpae ne ọ na gie emwa rẹn vbekpa re. Ọ keghi ru iyobọ ne emwa ya rẹn Osanobua kevbe ọ na vbe ma iran re niran gha na erhunmwu wẹẹ, na ye eni ọghe Osanobua khian nọhuanrẹn. (Matiu 6:9) Vbe ẹdogbo nu ye, de ugamwẹ nọ yae ma emwa emwi wẹẹ, e Jehova ọre eni ọghe Osanobua?—Tie Jọn 17:26; Rom 10:13, 14.
Ivbiotu e Kristi ọghe ẹmwata keghi kporhu iyẹn nọma ọghe Arriọba Osanobua. Osanobua keghi gie Jesu gha die agbọn na, nọ do kporhu iyẹn nọma ọghe ne Arriọba. Arriọba ọghe Osanobua ọkpa ẹre ọ khian sẹtin sọfurre ye ọlọghọmwa ọghe emwa nagbọn. Te Jesu wa guan kaẹn Arriọba na ya se ẹdẹ nọ wu. (Luk 4:43; 8:1; 23:42, 43) Ọ tae wẹẹ, erhuaengbe ẹre gha ye ne iyẹn nọma ọghe Arriọba Osanobua kporhu. Adeghẹ ọmwa na do kporhu ma ruẹ vbekpae Arriọba Osanobua, de ugamwẹ nu wẹẹ yayi ghẹ ọ ye?—Tie Matiu 24:14.
Erhuaengbe ọghe Jesu i re ọkpa vbe agbọn dan na. U gha sẹtin ye iran ẹro rhunmwuda iran i mwẹ obọ vbe otu azẹ ra okhọn ọghe ẹvbo. (Jọn 17:16; 18:36) Deba ọni, iran i yegbe ta emwa ni yin uyinmwẹ ikuaengbe.—Tie Jems 4:4.
Ivbiotu e Kristi ọghe ẹmwata keghi re na yẹrẹro zẹvbe emwa ni hoẹmwẹ egbe iran. Vbuwe ẹmwẹ ọghe Osanobua, iran keghi ruọre na gha rhie ọghọ ne ivbie ẹvbo hia. Agharhemiẹn wẹẹ, avbe ugamwẹ ohoghe keghi rhiegba ye avbe okuo ọghe ẹvbo, emwa ni rre ugamwẹ ẹmwata keghi wiobọ vbọ. (Maika 4:1-3) Ivbiotu e Kristi keghi loo ẹghẹ kevbe emwi ne iran mwẹ vbe ẹghẹ hia, ya ru iyobọ ne emwa ọvbehe.—Tie Jọn 13:34, 35; 1 Jọn 4:20.
4. U gha sẹtin yẹrẹro ugamwẹ ọghe ẹmwata ra?
De ugamwẹ ne a miẹn wẹẹ imamwaemwi ọghe iran hẹnhẹn egbe yan e Baibol, kevbe nọ yae kporhu ma emwa wẹẹ, Arriọba ọghe Osanobua ọkpa ẹre ọ khian sẹtin sọfurre ye ọlọghọmwa ọghe emwa nagbọn? De otu nọ nikhin nọ hoẹmwẹ egbe iran kevbe nọ vbe wiobọ vbe okuo? De ugamwẹ ne uwẹ roro ghọ khin?—Tie 1 Jọn 3:10-12.