De Vbene U Khian Ya Sikẹ Osanobua Hẹ?

1. Erhunmwu hia ẹre Osanobua danmwehọ re ra?

Osanobua gie na tie emwa ughughan, niran sikẹ irẹn vbe odẹ ọghe erhunmwu. (Psalm 65:2) Ọrheyerriọ, ẹi re erhunmwu hia irẹn danmwehọ re, ra ọ miẹnyi. Vbe igiemwi, Osanobua i danmwehọ erhunmwu ọghe okpia nọ ye obọ dan mu ọvbokhan rẹn. (1 Pita 3:7) Deba ọni, ẹghẹ ne Ivbie Izrẹl na rhiegba ye emwi dan na ru, Osanobua ma ghi họn erhunmwu ọghe iran. Ma bẹghe ẹre nia wẹẹ, erhunmwu keghi re ukpo amuyọmọ. Ọrheyerriọ, Osanobua gha miẹn ọnrẹn yi erhunmwu ọghe emwa ni ru orukhọ ne sẹlẹkẹ, adeghẹ iran na fiwerriẹ.—Tie Aizaia 1:15; 55:7.

Ghee vidio nọ mwẹ uhunmwuta nọ khare wẹẹ Erhunmwu Hia Ẹre Osanobua Danmwehọ Re Ra?

2. De vbe nọ khẹke nima ya gha na erhunmwu hẹ?

Erhunmwu keghi re ọkpa vbe usun odẹ nima ya rhie ugamwẹ ne Jehova, rhunmwuda ọni, e Jehova ne ayi ọghomwa ọkpa ẹre ima gha na erhunmwu gie. (Matiu 4:10; 6:9) Deba ọni, ugbẹnvbe a miẹn wẹẹ, ima ma gba, ọ khẹke nima gha na erhunmwu vbe eni ọghe Jesu, rhunmwuda irẹn ẹre ọ wu ye orukhọ ọghomwa. (Jọn 14:6) E Jehova ma hoo nima gha naẹ yan egbe erhunmwu na kọ ye ẹrherhe ra na gbẹnnẹ ye ebe. Erhunmwu nọ ke ekhọe rre ẹre Osanobua gualọ.—Tie Matiu 6:7; Filipai 4:6, 7.

Uhiẹn, Ayi ọghomwa keghi họn erhunmwu ne a na ye uwe ekhọe. (1 Samuẹl 1:12, 13) Irẹn kueyọ ne ima gha na erhunmwu vbe ẹghẹ ke ẹghẹ, ọre vbe ima gha rhiọrre, vbe ima khian lovbiẹ, vbe a khian rhie evbare, kevbe vbe ima gha rre uwe ọlọghọmwa.—Tie Psalm 55:22; Matiu 15:36.

3. Vbọzẹ ne Ivbiotu e Kristi na siegbe koko?

Ẹi re emwi nọ khuẹrhẹ na sikẹ Osanobua, rhunmwuda ima keghi rre uwe ẹbu emwa nẹi mwẹ amuẹtinyan yan Osanobua, kevbe ni tilae rua eyan ọghe irẹn, nọ dekaẹn ọfumwegbe nọ khian rre agbọn na. (2 Timoti 3:1, 4; 2 Pita 3:3, 13) Rhunmwuda ọni, ima keghi gualọ igiọdu ọghe avbe etẹn ima nima gba siegbe koko, erriọ iran vbe gualọ ọghe ima.—Tie Hibru 10:24, 25.

Adeghẹ ima na gha gu emwa ni hoẹmwẹ Osanobua muobọ, iran gha ru iyobọ nima ya sikẹ Osanobua. Iko ne avbe Osẹe Jehova do, keghi kie ẹkpotọ nọma, niran ya miẹn igiọdu vbe amuẹtinyan ne etẹn ọvbehe mwẹ.—Tie Rom 1:11, 12.

4. De vbene u khian ya sikẹ Osanobua hẹ?

U gha sẹtin sikẹ e Jehova lekpae nu gha ru erria yan emwi nu ruẹre vbuwe ẹmwẹ ọghẹe. Gha muẹn roro avbe iwinna ọghẹe, adia ọghẹe kevbe avbe eyan ọghẹe. Erhunmwu kevbe erria na ru, keghi ru iyobọ nima, ya rẹn otọre vbe nọ hiunsi sẹ hẹ, ahoẹmwọmwa kevbe ẹwaẹn ọghe Osanobua.—Tie Jọsua 1:8; Psalm 1:1-3.

Odẹ ọkpa nu gha ya sẹtin sikẹ Osanobua ọre, nu gha mwẹ amuẹtinyan yan irẹn. Sokpan amuẹtinyan keghi yevbe emwi nọ mwẹ arrọọ na koko. Ọ khẹke nu gha rhie evbare orhiọn vbe ẹghẹ hia, ne amuẹtinyan ruẹ mieke na gha wegbe sayọ, lekpae nu gha muẹn roro emwi ne amuẹtinyan ruẹ hẹnhẹn egbe yan.—Tie Matiu 4:4; Hibru 11:1, 6.

5. De ere nu khian miẹn adeghẹ u na sikẹ Osanobua?

E Jehova keghi gbaroghe emwa ni hoẹmwẹ irẹn. Ọ gha sẹtin gbaroghe iran, ne iran ghẹ muẹn fua amuẹtinyan kevbe ayayẹro ọghe arrọọ etẹbitẹ ne iran mwẹ. (Psalm 91:1, 2, 7-10) Ọ ye obọ sekhae ne ima, ne ima gbaengbe ne uyinmwẹ nọ gha sẹtin mu idobo ye egberanmwẹ kevbe oghọghọ ọghe ima. Odẹ na ya loo arrọọ nọ ghi maan sẹ ẹre Jehova ma ima re.—Tie Psalm 73:27, 28; Jems 4:4, 8.