E Josaia Wa Gha Mwẹ Avbe Ọse Nọma

Wẹ roro ẹre wẹẹ, ọ lọghọ na ru emwi nọma ra?— Emwa nibun keghi roro ẹre wẹẹ, ọ lọghọ. E Baibol tama ima wẹẹ, ọ wa kakabọ gha lọghọ ne ọvbokhan okpia na tiẹre Josaia ru emwi nọma. Sokpan ọ ghaa mwẹ avbe ọse ni maan ni ru iyobọ nẹ. Gia ruẹ sayọ vbekpae Josaia kevbe avbe ọse ọre.

Erha e Josaia ẹre ọ ghaa re Amọn, ọba ọghe Juda. Uhun dan ẹre Amọn ghaa khin, kevbe wẹẹ, ẹbọ ẹre ọ ghaa ga. Vbe erha e Josaia ghi wu nẹ, Josaia na do gha re ọba ọghe Juda. Sokpan ukpo erẹnrẹn kẹkan ẹre ọ ghaa ye! Wẹ roro ẹre wẹẹ, ọ ru emwi dan vbene erhae vbe ru ra?​​— Ẹn ọ, ọ ma ru emwi dan!

Uhiẹn vbe ọ wa ye rre ọvbokhan kherhe, Josaia ghaa hoo nọ họn ẹmwẹ ne Jehova. Rhunmwuda ọni, vbuwe ẹbu emwa ni hoẹmwẹ e Jehova ọkpa ẹre ọ na zẹ ọse. Kevbe wẹẹ, iran keghi ru iyobọ ne Josaia ya ru emwi nọma. De emwa eso ni ghaa re ọse ọghe Josaia?

Ọkpa vbe usun ọse ọre kegha re Zefanaia. E Zefanaia kegha re akhasẹ nọ yobọ sekhae ne Ivbie Juda wẹẹ, emwi dan gha sunnu da iran deghẹ iran na gha ga ẹbọ. E Josaia keghi danmwehọ e Zefanaia kevbe ọ na ga e Jehova, ọ ma ga ẹbọ.

Ọse ọvbehe ne Josaia ghaa mwẹ kegha re Jerimaia. Ihegbe ẹre irẹn vbe Josaia ghaa khin, kevbe wẹẹ, te iran wa ku ke otọ gha de. Iran guobegbe sẹrriọ wẹẹ, vbe Josaia ghi wu, e Jerimaia keghi gbọẹn ye ebe ihuan ne kpataki, nọ dekaẹn vbene ẹmwẹ Josaia da irẹn hẹ. E Jerimaia kevbe Josaia keghi ru iyobọ ne egbe ya ru emwi nọma kevbe họn ẹmwẹ ne Jehova.

De emwi ne ima khian miẹn ruẹ vbe igiemwi ọghe Josaia?— Uhiẹn vbe Josaia wa ye rre ọvbokhan kherhe, irẹn kegha hoo nọ ru emwi nọma. Ọ rẹnrẹn wẹẹ, emwa ni hoẹmwẹ e Jehova ẹre ọ khẹke nirẹn gu ru ọse. Gia miẹn wẹẹ u zẹ avbe ọse ni hoẹmwẹ e Jehova, kevbe ni gha sẹtin ru iyobọ nuẹ ya ru emwi nọma!