IRUẸMWI 10
Jesu Wa Gha Họn Ẹmwẹ Vbe Ẹghẹ Hia
Ọ wa khuẹrhẹ vbe ẹghẹ hia nu họn ẹmwẹ ne erha vbe iyuẹ ra?— Ugbẹnso ọ lọghọ. Wẹ rẹn wẹẹ, Jesu họn ẹmwẹ ne Jehova kevbe erhae vbe iyẹ vbe ẹghẹ hia ra?— Igiemwi ọghẹe, gha sẹtin ru iyobọ nuẹ nu ya họn ẹmwẹ ne erha vbe iyuẹ, uhiẹn vbe ẹghẹ nẹi ya khuẹrhẹ. Gia ruẹ sayọ vbekpae ọna.
A te miẹn wẹẹ Jesu ghaa die agbọn, erhae ighẹ Jehova ẹre ọ ghaa gue vbe ẹrinmwi. Sokpan Jesu vbe gha mwẹ erha vbe iye vbe agbọn na. Eni ọghe iran ọre Josẹf kevbe Meri. Wẹ rẹn vbene iran do ya gha re evbibie ọre hẹ ra?—
E Jehova keghi fie arrọọ ọghe Jesu werriẹ vbe ẹrinmwi, kevbe ọ na ghi rhiẹre ye uwe ako-ọmọ ọghe Meri, nọ mieke na sẹtin bie Jesu kevbe nọ vbe gha rrọọ vbe agbọn na. Emwi ọyunnuan ẹre ọna ghaa khin! Jesu keghi wan vbuwe ako-ọmọ ọghe Meri zẹ vbene emọ ọvbehe vbe wan vbuwe ako-ọmọ ọghe iye iran. Vbe uki ihinrin ghi gba gberra nẹ, a na bie Jesu. Odẹ vbenia, ẹre Meri kevbe ọdafẹn ọnrẹn ighẹ Josẹf do ya khian evbibie Jesu vbe agbọn na.
Vbe Jesu ghi rre ukpo 12 kẹkan, irẹn keghi ru emwi nọ rhiẹre ma vbene ọ hoẹmwẹ erhae Jehova hẹ. Ọna keghi sunnu vbe ẹghẹ ne Jesu kevbe ẹgbẹe ọre ya mu okhian nọ rre gha rhie Jerusalẹm, ne iran ya do ugie Alagberra. Iran ghi die owa, Josẹf kevbe Meri ma ghi miẹn Jesu vbe ehe rhọkpa. Wẹ rẹnrẹn ehe nọ ghaa ye ra?—
Vbọzẹ ne Jesu na gha rre ogiukpo?
E Josẹf kevbe Meri na rhulẹ werriegbe gha rhie Jerusalẹm ya gualọ Jesu la ehe hia. Afianma na wa gha fian iran rhunmwuda iran ma miẹn ọnrẹn. Iyeke ikpẹdẹ eha, iran na do miẹn ọnrẹn vbuwe ogiukpo! Wẹ rẹn emwi nọ zẹ ne Jesu na gha rre ogiukpo ra?— Rhunmwuda, evba nii, ẹre ọ khian na sẹtin ruẹ vbekpa Erhae ighẹ Jehova. Ọ hoẹmwẹ e Jehova kevbe ọ ghaa hoo nọ ruẹ, vbene irẹn gha ya ye ẹko rhiẹnrhiẹn ọnrẹn hẹ. Uhiẹn vbe ọ ghi de agikpa nẹ, te ọ ye gha họn ẹmwẹ ne Jehova vbe ẹghẹ hia. Jesu vbe họn ẹmwẹ uhiẹn vbe ẹghẹ nọ ya gha lọghọ, agharhemiẹn wẹẹ ọ vbe rrioya ba re. Jesu vbe họn ẹmwẹ ne Josẹf kevbe Meri ra?— Ẹẹn, e Baibol khare wẹẹ, ọ họn ẹmwẹ ne iran.
De emwi nu gha miẹn ruẹ vbe igiemwi ọghe Jesu?— Ọ khẹke nu họn ẹmwẹ ne erha kevbe iyuẹ, uhiẹn vbe ọ ghaa lọghọ. U gha ru vberriọ ra?—
TIẸRE VBE BAIBOL RUẸ
Hebrews 5:8