Arriọba Nọ Khian Kha Yan Otagbọn Hia

U gha sẹtin sunnu yi Arriọba ne ima guan kan na ra?— Ẹẹn, ọ keghi re Arriọba ọghe Osanobua. Arriọba na, ẹre ọ khian ye otagbọn na khian e Paradais. U gha hoo nu ruẹ sayọ vbekpae Arriọba na ra?—

Arriọba hia keghi mwẹ Ọba. Ne Ọba ẹre ọ kha yan emwa ni rre otọẹvbo ẹre. Wẹ rẹn ọmwa nọre Ọba ọghe Arriọba Osanobua ra?— Jesu Kristi nọ. Ẹrinmwi ẹre ọ ye. Vbe nẹi khian ghi kpẹ gbe, irẹn gha doo gha re Ọba ọghe emwa hia ni rre otagbọn na! Wẹ roro ẹre wẹẹ, ma gha sọyẹnmwẹ vbe ẹghẹ ne Jesu khian ya gha kha zẹvbe Ọba yan otagbọn hia ra?—

Ma gha sọyẹnmwẹ ẹsẹsẹmwẹse! Vbe Paradais, emwa i khian gha gbinna ra niran werriegbe gha khọn okuo. Emwa hia ghi hoẹmwẹ egbe. Ọmwa rhọkpa i rrọọ nọ khian ghi wu ra nọ khian ghi khuọnmwi. Avbe arhuaro ghi do gha bẹghe, avbe ayenhọ ghi do gha họn ẹmwẹ, avbe uke ghi doo gha san yo san rre. Emwa hia ghi doo miẹn evbare gha re wọrhọwọrhọ. Avbe aranmwẹ ghi doo gha gu emwa nagbọn kevbe egbe iran ru ọse. Emwa ni wulo nẹ, ghi werriegbe doo gha rrọọ. Avbe ikpia kevbe ikhuo nibun nu he ruẹ kaẹn vbe ebe ẹmu na, vbene Rebeka, Rehab, Devid, kevbe Ẹlaija ye, gha werriegbe doo gha rrọọ! U gha hoo nu miẹn  iran vbe iran gha werriegbe rre ra?—

E Jehova hoẹmwẹ ruẹ kevbe wẹẹ, ọ hoo nu gha mwẹ oghọghọ. Adeghẹ u na ye gha ruẹ vbekpaẹ Jehova kevbe u na gha họn ẹmwẹ nẹ, u gha sẹtin doo gha rrọọ vbe etẹbitẹ vbe paradise ne mosemose! Wẹ hoo nu wẹ vbe gha rrọọ vbe etẹbitẹ ra?—