Vbua Khian Ya Sẹtin Do Gha Re Ọsie Osanobua Hẹ?

1, 2. De emwa eso ni ghaa re ọsie Jehova?

DE ARO ọmwa ne uwẹ hoo nọ gha re ọse ruẹ? Ọmwa ne u hoẹmwẹ ọnrẹn ẹre u khian zẹ ọre ọse. Ọmwa ne uwẹ vbe ọre gba guobọ egbe. Ọmwa nọ mwẹ ekhọe esi kevbe uyinmwẹ nọ maan.

² Ọ mwẹ emwa eso ne Jehova zẹ ọre ọse. Vbe igiemwi, ọsie Jehova ẹre Ebraham ghaa khin. (Aizaia 41:8; Jems 2:23) E Jehova wa vbe hoẹmwẹ e Devid sẹrriọ wẹẹ, ọ na tie ẹre ‘ọmwa ekhọe ọghe irẹn.’ Ọni ọre wẹẹ, e Devid wa ru emwi nọ ya ẹko rhiẹnrhiẹn Osanobua vbe ẹghẹ hia. (Iwinna 13:22) Ọmwa ne Jehova kakabọ “hoẹmwẹ” ọnrẹn ẹre Daniẹl ne akhasẹ wa vbe gha khin.—Daniẹl 9:23.

3. Vbọzẹe ne Ebraham, e Devid kevbe Daniẹl na gha re ọsie Jehova?

³ De vbene Ebraham, e Devid kevbe Daniẹl ya do gha re ọsie Jehova hẹ? E Jehova keghi tama Ebraham wẹẹ: “U . . . họn ẹmwẹ ne I tama ruẹn.” (Gẹnẹsis 22:18) Emwa ni họn ẹmwẹ ne Jehova ẹre Jehova zẹ ọre ọse. E Jehova sẹtin vbe gu agbẹnvbo ru ọse. E Jehova keghi tama agbẹnvbo Izrẹl wẹẹ: ‘Wa gha họn ẹmwẹ mẹ, ne I miẹn ehe na gha re Osanobua uwa, uwa ghi vbe gha re emwa mwẹ.’ (Jerimaia 7:23) Nọnaghiyerriọ, gha họn ẹmwẹ ne Jehova deghẹ u gele hoo ne u gha re ọsiọre.

E JEHOVA GBOGBA GA AVBE ỌSIỌRE

4, 5. De vbene Jehova ya gbogba ga avbe ọsiọre hẹ?

⁴ E Baibol khare wẹẹ, te Jehova ‘wa rhie aro sotọ vbe agbọn na hia, nọ miẹn ehe na rhie ẹtin ẹnrẹn ma vbe egbe iran ni ya ekhọe hia gae.’ (2 Krọnikol 16:9) Vbe ebe Psalm 32:8, e Jehova keghi ru eyan ma avbe ọsiọre wẹẹ: ‘I gha maa uwa odẹ ne uwa gha la. I gha maa uwa emwi, I ghi vbe bu uwa ude.’

⁵ Esu ne oghian ima wa mwẹ ẹtin, ọ ma zẹdẹ hoo ne ima gha re ọsie Osanobua. Sokpan e Jehova muegbe nọ ya gbogba ga ima. (Tie Psalm 55:22.) Ekhọe hia ẹre ima ya ga e Jehova rhunmwuda, ọsiọre ẹre ima khin. Uhiẹn vbe emwi ghaa ba su ima, te ima ye ya ẹkoata ga e Jehova. Ma mwẹ ilẹkẹtin ne ẹi beghe vbe na ghee ọsian nọ khare wẹẹ: “Nọyaẹnmwa rre emwa na. Ọ sikẹ mwẹ, emwi nọ gha mu mwẹ rueghe i ghi rrọọ.” (Psalm 16:8; 63:8) De vbene Esu ya hia vbe odẹ ke odẹ nọ ya ima khian eghian Osanobua?

IFI ẸZỌ NE ESU BA EMWA NAGBỌN RE

6. De ifi ẹzọ ne Setan ba emwa nagbọn re?

⁶ Vbe Uhunmwu Ebe 11, ma ruẹ vbene Esu ya si e Jehova evẹn hẹ. Ọ na wẹẹ ọmwa ohoghe ẹre Jehova khin kevbe wẹẹ, obọ dan ẹre ọ ya mu Adam vbe Ivi rhunmwuda, ọ ma rhie asẹ ne iran, na ya kha wẹẹ, ọna ọre emwi nọ maan ra ọna ọre emwi ne ẹi maan. Ebe Job vbe gi ima rẹn wẹẹ, te Esu wa vbe ba emwa ni hoo ne iran gha re ọsie Osanobua ifi ẹzọ. Esu keghi kha wẹẹ, afiangbe ne emwa miẹn vbe obọ Osanobua ẹre ọ ya iran gae, ẹi re te iran hoẹmwẹ ọnrẹn. Esu ye vbe kha wẹẹ, irẹn gha sẹtin ya ọmwa ke ọmwa khian oghian Osanobua. Gia ghee emwi ne ima gha miẹn ruẹ vbe okha ọghe Job kevbe odẹ ne Jehova ya gbogba ga re.

7, 8. (a) De aro ne Jehova ya gha ghee Job? (b) De emwi ne Setan khare vbekpae Job?

⁷ De aro ọmwa ne Job ghaa khin? Ọmwa esi ghaa nọ. E Job ghaa rre agbọn vbe odẹ ukpo 3,600 nọ gberra. Vbe ọ rre agbọn, e Jehova keghi kha wẹẹ, ọmwa rhọkpa i rre uhunmwu otagbọn na nọ yevbe Job. Te Job wa gha ya ẹkoata ga Osanobua, erriọ emwi dan vbe ya gha sọnnọ rẹn. (Job 1:8) Vbene ẹmwata, ọsie Jehova ẹre Job ghaa khin.

⁸ Esu keghi kha wẹẹ, afiangbe ne Job miẹn vbe obọ Osanobua ẹre ọ yae gae. Esu keghi tama e Jehova wẹẹ: “U tan obọ gue ẹre, kevbe ẹgbẹe ọre kevbe emwi hia nọ mwẹ. U fiangbe emwi hia nọ ru. Ẹmila ne u hẹ nẹẹn vuọn otọ ẹvbo na hia. U gha miẹn ẹre emwi hia nọ mwẹ, u gha miẹn wẹẹ, ọ gha sirra gha tie ihẹn nuẹn!”—Job 1:10, 11.

9. De ẹkpotọ ne Jehova kie ne Esu?

⁹ Esu keghi ba e Job ifi ẹzọ wẹẹ, afiangbe nọ miẹn vbe obọ e Jehova ẹre ọ zẹe nọ na gae. Esu na vbe kha wẹẹ, irẹn gha sẹtin ru ẹre, ne Job ghẹ ghi ga e Jehova. E Jehova ma zẹdẹ kue ye ẹmwẹ ne Esu tae na, ọrheyerriọ, ọ na gi Esu danmwẹ e Job, na gele rẹn deghẹ afiangbe ne Job miẹn vbe obọ e Jehova ẹre ọ yae gae.

ESU KEGHI DANMWẸ E JOB

10. De vbene Esu ya danmwẹ e Job hẹ? De emwi ne Job ghi ru?

¹⁰ Vbe okaro, Setan keghi gbele aranmwẹ hia ne Job mwẹ. Vbe iyeke ọni, ọ na gbele eguọmwadia e Job nibun rua. E Job ma ghi gha mwẹ emwi rhọkpa. Vbe okiekie, Esu na ya okpẹhoho fuẹn emọ igbe ne Job ghaa mwẹ rua. Vbuwe ena hia, e Job na ye gha mwẹ ẹkoata dae Jehova. ‘Vbene emwi na hia ye sunu sẹ, e Job ma ru khọ, nọ gha zan Osanobua.’—Job 1:12-19, 22.

11. (a) De emwi ọvbehe ne Esu ru e Job re? (b) Vbe Job a ghi ru?

¹¹ Esu ma ye hẹwẹ vbọ. Ọ na tama Osanobua wẹẹ: “Kuan irẹn tobọre . . . , ọ gha sirra a tie ihẹn nuẹn.” Vbe Esu a ghi ru? Ọ na ya hihiẹ emianmwẹ dan ku e Job. (Job 2:5, 7) E Job na ye mudia gbain vbe odẹ ọghe orhiọn. Ọ ma sẹ e Jehova rae. Ọ na kha wẹẹ: “Vbene I te ya wu, te I khian da imudiase ọghomwẹ yi!”—Job 27:5, NW.

12. De vbene Job ya rhiẹre ma wẹẹ ọmwa ohoghe ẹre Esu khin?

¹² E Job ma rẹn vbekpae ifi ẹzọ ne Esu ba irẹn re, ọ ma vbe rẹn emwi nọ ya irẹn gha rri oya ne udẹn rri oya ne ẹvbi. Ọ kegha roro ẹre wẹẹ, e Jehova ẹre ọ ghaa rri irẹn oya. (Job 6:4; 16:11-14) Ọrheyerriọ, ọ na ye gha mwẹ ẹkoata dae Jehova. Vbene ai na gbawawẹ, ahoẹmwọmwa ne Job mwẹ ne Jehova ẹre ọ zẹe nọ na gha ya ẹkoata gae, ẹi re rhunmwuda afiangbe nọ ghaa miẹn vbe obọ re. Ọmwa ohoghe ẹre Esu khin zẹẹ!

13. De afiangbe ne Job miẹn rhunmwuda imudiase ọghẹe?

¹³ Agharhemiẹn wẹẹ e Job ma rẹn emwi nọ ghaa sunu vbe ẹrinmwi, ọ na ye gha mwẹ ẹkoata dae Jehova, erriọ ya ya ekhue mu Esu ne ọka ẹrhia. E Jehova keghi fiangbe Job, rhunmwuda imudiase ọghẹe.—Job 42:12-17.

VBENE ESU YA BA UWẸ IFI ẸZỌ

14, 15. De ifi ẹzọ ne Esu ba emwa hia re?

¹⁴ U gha wa miẹn emwi kpataki ruẹ vbe okha ọghe Job. Esu vbe ba ima ifi ẹzọ wẹẹ, afiangbe ne ima miẹn vbe obọ Osanobua, ẹre ọ ya ima gae. Vbe ebe Job 2:4, Setan keghi kha wẹẹ: “Ọmwa sẹtin viọ emwi hia [nọ mwẹ] ne ọmwa, ya dẹ uhunmwu ẹnrẹn ye agbọn.” Ọna rhiema wẹẹ, ẹi re Job ọkpa ẹre Setan ba re ifi ẹzọ, emwa hia fẹẹrẹ ẹre ọ ba re ifi ẹzọ; ke ikpia ke ikhuo. Ẹghẹ e Job ghi gberra nẹ, te Esu ye gha kpamisikan yan e Jehova, erriọ vbe ya ba eguọmwadia Osanobua ifi ẹzọ. Vbe igiemwi, vbe ebe Itan 27:11, e Jehova keghi bu ima ude wẹẹ: ‘Gha wan ovbi mwẹ, ne u gi ẹko gha rhiẹnrhiẹn mwẹ, ne I sẹtin gha zẹ ẹmwẹ wanniẹn ọmwa nọ gbodan ghee mwẹ.’

¹⁵ U gha sẹtin zẹ ne egbuẹ wẹẹ, ọsie Jehova ẹre u hoo ne u gha khin, ne u mieke na ya Esu khian ọmwa ohoghe. Ọna ọre azẹ nọ ghi maan sẹ ne u gha ru vbe arrọọ ruẹ! Ọ gha khọnrẹn wẹẹ, te ọ khẹke ne u ru afiwerriẹ ne gẹdẹgbẹẹ vbe arrọọ ruẹ, hia ne u ru vberriọ. Yerre wẹẹ, ọna i re azẹ na ya rhẹghẹrẹ rhunmwuda Esu khare wẹẹ, emwi ghaa ba su ruẹ, u ghi fi iyeke gbe Osanobua. Esu hoo nọ bibi ima odẹ, ne ima mieke na sẹ e Jehova rae. De obẹlẹ ne Esu loo?

16. (a) De obẹlẹ ne Setan loo, nọ mieke na ya emwa khian rree ne Osanobua? (b) De vbene Esu ya hoo nọ ya ruẹ khian ọmwa ne ẹi ghi ga e Jehova?

¹⁶ Esu keghi hia vbe odẹ ke odẹ, nọ mieke na ya ima khian rree ne Osanobua. Ugbẹnso, ọ ghi “davan vbe oduma, ọ gualọ ọmwa nọ gha gbe re.” (1 Pita 5:8) Ghẹ gi ẹre kpa ruẹ odin deghẹ avbe ọse ruẹ, emwa ruẹ vbuwe ẹgbẹe ra emwa ọvbehe na gha zẹ ruẹ kpokpo ye emwi esi ne u ru kevbe Baibol ne u tie. Ọ ghaa yerriọ, u sẹtin gha roro ẹre wẹẹ, Esu ẹre ọ loo iran.a (Jọn 15:19, 20) Esu keghi vbe “fi egbe werriẹ do gha ye vbe odibosa [ọghe] uwanmwẹ.” Odẹ vbenian, ọ sẹtin rẹrẹ ima ya sọtẹ dae Jehova. (2 Kọrinti 11:14) Obẹlẹ ọvbehe ne Esu vbe loo, ọre nọ na hoo nọ kọe ye ima orhiọn wẹẹ, ima ma somwa nọ gha ga Osanobua.—Itan 24:10.

GHA LELE UHI E JEHOVA

17. Vbọzẹe ne ima na họn ẹmwẹ ne Jehova?

¹⁷ Ma ghaa họn ẹmwẹ ne Jehova, te ima rhiẹre ma wẹẹ, ọmwa ohoghe ẹre Esu khin. Vbọ khian ya ima gha họn ẹmwẹ ne Jehova? E Baibol khare wẹẹ: “Ya ekhọe ruẹ hia hoẹmwẹ Nọyaẹnmwa Osanobua ruẹ, kevbe orhiọn ruẹn hia kevbe ẹtin ruẹn hia.” (Diuteronomi 6:5) Ma keghi họn ẹmwẹ ne Jehova rhunmwuda ima hoẹmwẹ ọnrẹn. Zẹvbe ne ahoẹmwọmwa ne ima mwẹ dae Jehova ya wegbe sayọ, erriọ ima ya hia vbe odẹ ke odẹ ne ima gha lele adia ọghẹe. Ukọ e Jọn keghi kha wẹẹ: ‘Emwi na ya ahoẹmwọmwa Osanobua kha ẹre ọna khin, ma ghi gha ru vbene iyi ne irẹn yi khare; iyi nọ yi, i vbe re nọ lọghọ ne ima gbe.’—1 Jọn 5:3.

18, 19. (a) De emwi eso ni sọnnọ e Jehova? (b) Vbe ima ya rẹn hẹ wẹẹ, e Jehova i wẹẹ ne ima ru emwi ne ima i sẹtin ru?

¹⁸ De emwi eso ni sọnnọ e Jehova? A gbẹnnẹ eso ladian vbe ẹkpẹti nọ mwẹ uhunmwuta nọ khare wẹẹ, “Gi Emwi Ni Sọnnọ E Jehova Gha Sọnnọ Ruẹ.” U sẹtin ka gha roro ẹre wẹẹ, emwi eso na gbẹnnẹ ye ẹkpẹti na i wa re emwi dan. Sokpan, u gha ghi tie avbe ako ọghe Baibol na gbẹnnẹ lelẹe, u na vbe ru erria yan rẹn, u ghi do bẹghe ẹre wẹẹ, ere rrọọ deghẹ u na gha lele uhi e Jehova. U sẹtin vbe do bẹghe ẹre wẹẹ, te ọ khẹke ne u ru afiwerriẹ eso vbe arrọọ ọghuẹ. Ọ ghaa yerriọ, hia ne u ru afiwerriẹ vberriọ, agharhemiẹn wẹẹ ẹi khẹkhẹ. Afiwerriẹ na ghi ya ruẹ do gha re ọsie Osanobua, ẹghẹ nii, ọyẹnmwẹ ghi gha sẹ ruẹ, u ghi vbe gha mwẹ agbẹkunsotọ. (Aizaia 48:17, 18) Vbe ima ya rẹn hẹ wẹẹ, ọmwa gha sẹtin ru afiwerriẹ vbenian vbe arrọọ ọghẹe?

¹⁹ E Jehova i wẹẹ ne ima ru emwi ne ima i gele sẹtin ru. (Diuteronomi 30:11-14) E Jehova keghi re Ọse ọghe ẹmwata, nọnaghiyerriọ, irẹn rẹn ima sẹ vbene ima rẹn egbe ima. Ọ rẹn ako ne ima na hia, ọ vbe rẹn ako ne ima na vburriẹ. (Psalm 103:14) Ukọ e Pọl keghi rhie igiọdu na ne ima: “Osanobua gha yan, te ọ muẹn sẹ, ẹi ra kue na danmwẹ uwa ghee gberra vbene ẹtin uwa sẹ, sokpan ẹghẹ ne a na danmwẹ uwa ghee nii, ọ gha rhie ẹtin ne uwa ya ya egbe miẹn ẹnrẹn, ne uwa miẹn ehe na sẹtin do ẹre fe.” (1 Kọrinti 10:13) Gi ima gha mwẹ ilẹkẹtin wẹẹ, e Jehova gha ru iyobọ ne ima ya ru emwi esi. Ọ gha rhie “ẹtin nọ sẹ ehia” nuẹn, ne u mieke na sẹtin zin egbe ọlọghọmwa. (2 Kọrinti 4:7) E Pọl ghi miẹn vbene Jehova ya ru iyobọ ne irẹn hẹ vbe irẹn rre ọlọghọmwa, ọ na kha wẹẹ: “I mwẹ ẹtin ne I ya ye egbe miẹn emwi hia vbekpa ẹtin ne Kristi rhie mẹ.”—Filipai 4:13.

GI EMWI NI YẸẸ E JEHOVA GHA YẸẸ RUẸ

20. De avbe akpa nọ khẹke ne u gha mwẹ? Vbọzẹe nọ na khẹke ne u gha mwẹ avbe akpa na?

²⁰ Ma gha hoo ne Jehova gha re ọse ima, ọ khẹke ne ima zobọ vbe emwi dan na ru. Sokpan, ọ ma fo ye evba. (Rom 12:9) Emwi ni yẹẹ e Jehova ẹre ọ khẹke nọ gha yẹẹ ima. Ebe Psalm 15:1-5 ya ima rẹn emwi ni yẹẹ Osanobua. (Tie ẹre.) Avbe ọsie Jehova keghi hia ne iran gha mwẹ avbe akpa nọ mwẹ. Usun avbe akpa na ọre “ahoẹmwọmwa, oghọghọ, ọfunmwegbe, izinegbe, itohan, ekhọesi, amuẹtinyan, imuegberriotọ kevbe a muegbe ye ọghọ.”—Galatia 5:22, 23.

21. Vbua khian ya sẹtin gha mwẹ avbe akpa ni yẹẹ Osanobua hẹ?

²¹ Vbua khian ya sẹtin gha mwẹ avbe akpa ni maan na hẹ? Ọ khẹke ne u gha tie Baibol vbe ẹghẹ hia, ne u mieke na rẹn emwi ni ya ẹko rhiẹnrhiẹn e Jehova. (Aizaia 30:20, 21) U ghaa lele adia na, ahoẹmwọmwa ne u mwẹ ne Jehova ghi gha wegbe sayọ, ọna ghi vbe ya ruẹ gha hia vbe odẹ ke odẹ, ne u gha họn ẹmwẹ nẹẹn.

22. De afiangbe ne u khian miẹn vbọ deghẹ u na gha họn ẹmwẹ ne Jehova?

²² A gha sẹtin ya afiwerriẹ nọ khẹke ne u ru vbe arrọọ ruẹ gie ọmwa nọ kie ẹwu nọ gbiruẹn fua, ọ na yọ ọghe ọgbọn. E Baibol khare wẹẹ, ọ khẹke ne ima “ban [akpa] nẹdẹ mu fua,” ma ghi vbe “mu ọghọgbọn yọ.” (Kọlose 3:9, 10) Afiwerriẹ vbenian keghi lọghọ, sokpan, ma gha sẹtin ru vberriọ, e Jehova gha fiangbe ima zẹvbe nọ yan rẹn. (Psalm 19:11) Gha họn ẹmwẹ ne Jehova, ne u mieke na ya Esu khian ọmwa ohoghe. Gha ga e Jehova rhunmwuda ahoẹmwọmwa ne u mwẹ daa re, ẹi re rhunmwuda afiangbe ne u khian miẹn vbe odaro. U ghaa ru ena hia, u ghi gele do gha re ọsie Osanobua!