Osanobua Keghi Yi Okpia Nokaro Kevbe Okhuo Nokaro

E Jehova keghi ruẹ ne ogba gha rre eke ọkpa na tie ẹre Idẹni. Avbe obobo, erhan kevbe aranmwẹ kegha rre ogba nii. Osanobua keghi loo ekẹn ya ma okpia nokaro nọ re Adam, ọ na vbe hiọnrọn ye ọre ihue. U rẹn emwi nọ ghi sunu ra? Okpia nii na do gha rrọọ! E Jehova na tama Adam nọ gha gbaroghe ogba nii, ọ na wẹẹ ne Adam vbe mu eni ne aranmwẹ hia.

E Jehova keghi gbe uhi ne Adam. Ọ na tama Adam wẹẹ: ‘Gha rri avbe ọmọ erhan hia vbe ogba na, sokpan ghẹ rri ọkpa kẹkan vbọ. Adeghẹ u na rri ọre, u gha wu.’

Vbọ ghi zẹ kpẹẹ, e Jehova na kha wẹẹ: ‘I gha yi ọyobọ ne Adam.’ Osanobua keghi bọ re ye ovbe nọ dinmwi, iyeke ọni, ọ na rhie ọkpa vbe ifẹnmwẹ aguẹ ọghe Adam, ẹre ọ na yae yi okhuo nẹẹn. Eni okhuo na ọre Ivi. Adam vbe Ivi na do gha re ẹgbẹe nokaro. Vbọ ghaa ye Adam hẹ vbe ọ bẹghe ọvbokhan rẹn? Adam na gha ghọghọ. Vbene Adam ghi ghọghọ sẹ, ọ na kha wẹẹ: ‘Ọmwa ne Jehova loo ifẹnmwẹ aguẹ mwẹ ya yi wa na khin na! A ghi he vbe miẹn ọmwa ne ima gba re ọkpa!’

E Jehova keghi tama Adam vbe Ivi ne iran biẹlẹ vuọn agbọn na. Ọ na wẹẹ ne iran ru ẹre ne uhunmwu otagbọn hia khian e paradais vbene ogba ọghe Idẹni ghaa ye. Sokpan ọ ma ghi sunu vberriọ. Vbọsiẹ? Ma gha ziro yan ọni vbe uhunmwuta nọ lelẹe.