Hanna Keghi Na Erhunmwu Ne Osanobua Rhie Ọmọ Okpia Ne Irẹn

Ovbi Izrẹl ọkpa na tie ẹre Elkana kegha mwẹ okhuo eva na tie ẹre Hanna kevbe Penina, sokpan Hanna ẹre ọ hoẹmwẹ ọnrẹn sẹ. Rhunmwuda ne Penina na gha re umọbiẹ, ẹghẹ hia ẹre ọ ya gha giẹ Hanna nọ ma miẹn ọmọ biẹ. Ukpo ukpo, ẹre Elkana ya gha viọ ẹgbẹe ọre yo ibọkpọ nọ rre Siailo. Ọ ghaa mwẹ ẹghẹ ọkpa ne iran yo e Siailo, Elkana na do bẹghe ẹre wẹẹ Hanna i ghọghọ. Ọ na tama rẹn wẹẹ: ‘Ghẹ ghi viẹ Hanna. I rre emwa nuẹ. I hoẹmwẹ ruẹ.’

Vbe ọ ma he kpẹẹ vba, Hanna keghi ya na erhunmwu. Vbene Hanna ya gha na erhunmwu gie Jehova, erriọ amẹ eve ya gha rhọọ kua vbe aro ọre. Ẹre ọ na ghi ru eyan ma e Jehova wẹẹ: ‘Adeghẹ u na rhie ọmọ okpia mẹ, I gha yae fiohan nuẹ, ne ọ ya ẹdẹ agbọn rẹn hia ga ruẹ.’

Vbe Ogiohẹn ighẹ Elai ghi bẹghe ẹre wẹẹ Hanna guọ vbe unu, ọ na gha roro wẹẹ te ọ da ayọn. Hanna keghi tama rẹn wẹẹ: ‘Ẹn o, nọyaenmwẹ, I ma wọn ayọn. Ọlọghọmwa ne I ye ẹre I mu ma e Jehova.’ Ẹghẹ nii, ẹre Elai ghi ya rẹn wẹẹ, ẹi re vbene irẹn te roro ẹre, ọ na ghi tama e Hanna wẹẹ: ‘Te Osanobua gha rhie emwi ne u gualọ nuẹ.’ Orhiọn na ghi vbe la Hanna iwu, ẹre ọ na gha rrie owa. Vbe ọ ma he sẹ ukpo ọkpa, Hanna keghi biẹ ọmọ okpia ọkpa na tie ẹre Samuẹl. Ọna keghi ya e Hanna gha sọyẹnmwẹ ẹsẹsẹmwẹse.

Hanna ma mianmian eyan nọ ru ma e Jehova. Vbe Samuẹl ghi fian ewẹn nẹ, Hanna keghi muẹn gha rrie ibọkpọ ọghe ugamwẹ nọ ya ga e Jehova vba. Hanna keghi tama Elai wẹẹ: ‘Ọmọ ne I rinmwian Osanobua re vbe ẹghẹ nii ẹre na khin. I yae fiohan ne Jehova.’ Ukpo ukpo ẹre Elkana kevbe Hanna ya gha mu otuẹ gie Samuẹl; iran ghaa khian, iran ghi se ukpọn ọkpa ne ẹi mwẹ obọ giẹ. E Jehova keghi ya emọ ikpia eha ọvbehe kevbe emọ ikhuo eva we Hanna.